QARABAĞ VƏ ZAMİN HACI

	25 may 2012


Onlayn ictimai-siyasi qəzet

Şahvələd ÇOBANOĞLU

QARABAĞ VƏ ZAMİN HACI

Jurnalistə basqın edənin kim olduğunun fərqi yoxdur: Moşu Göyəzənlinin İrasimi olsun, hansısa nazirin qoçusu - mahiyyətcə eynidir. Eyni əməl, eyni cinayətdir! Amma bu işə adında “azadlıq” kəlməsi olan bir təşkilatın sədrinin baş vurması çox təzadlıdır. Deyəsən, bizim ölkədə adamlar artıq adlarını da yaddan çıxarır. Deməli, böyük bir iddianı özündə ifadə edən adlar, bu adlar altında mövcud olan təşkilatlar, bu təşkilatları təmsil edən vəzifələr sadəcə imitasiyadır. Sən bu adı doğrudan daşısan, hər əməlində onu nəzərə alarsan. Kim olduğunu unutmazsan.

Akif Nağının mətbuatla problemi də elə bundan doğur. Mətbuat da Akif Nağıya elə bu yanaşmadan çıxış edir. Problemin kökü budur - imitasiya, gözdən pərdə asmaq. İllərdir bu adam jurnalistlərin ironiyası ilə üzləşir. Mən istərdim ki, nəhayət, Akif Nağı özünə bu sualı versin: ona niyə ironik yanaşır, onu niyə qəbul etmirlər? Nədən? Niyə o, Zamin Hacının qələminə düşüb? Nə üçün zaman-zaman bizlərin hədəfinə çevrilir? Axı Qarabağın azadlığı doğrudan da müqəddəs işdir, üstəlik, hər halda bu adam Azərbaycanı talayan oğru məmurlardan da biri deyil. Üstəlik, onun şəxsi həyatı, şəxsiyyəti heç kimin marağında deyil. Akif Nağı özünü aldada bilər, amma bütöv bir toplumu, onun ayıq adamlarını aldada bilməz: azacıq ağlı olan istənilən kəs bilir ki, Qarabağı təşkilatla (QHT ilə) azad etmək mümkün deyil. Mübarizəni dövlət özü aparmayınca bu problemin həllində biz xalq olaraq öz sözümüzü deyə bilməyəcəyik.
Əvvəla, bizim çağda xalqlar yalnız dövlət təşkilatlanması ilə hədəflərinə çatır. Hətta istənilən toplum mövcudluğunu da yalnız dövlət halında qoruya bilir. İkincisi, Qarabağ kimi ağır düyünü külli dövlət halında səfərbər olmadığımızda aça bilmərik. Üçüncüsü, istənilən yanlış və anlaşılmaz fəaliyyət Qarabağ uğrunda mübarizəni gözdən salır, əsl mübarizənin necə olduğunu dərk etməyə mane olur. Gerçək və faydalı mübarizənin qarşısını alır. İmitasiyanın ziyanı da elə budur. Az deyil, hətta təhlükəlidir.
Heç kimin Qarabağ sevgisinə şübhəmiz yoxdur, amma çox qışqırmaqla, Jirinovskini qovmaqla, hava limanında erməniləri söyməklə Qarabağ üçün faydalı olduğunu iddia edə və bununla toplumu əsl hədəfdən yayındıra bilməzsən. Bilirsinizmi hansı hədəfdən söhbət gedir? Sadalaya bilərəm.
Qəti bilməliyik ki, ölkənin istənilən probleminə, o cümlədən Qarabağın azad edilməsinə görə məsuliyyəti hakimiyyət, konkret olaraq dövlət başçısı daşıyır. Korrupsiyaya qurşanmış, qanunları və xalqın maraqlarını saya salmayan, seçkiləri saxtalaşdıran, özünü qorumaqdan başqa qayğısı olmayan bir hakimiyyət əsl xalq hakimiyyəti ilə əvəzlənmədikcə, ölkədə demokratik hakimiyyət formalaşmayınca Qarabağ problemi həll edilməyəcək. Əksinə, xalqdan dayağı olmayan belə bir hakimiyyət özünü qorumaq üçün təhlükəli güzəştlərə də gedə bilər. Yəni ölkənin azad torpaqlarında yaşayan vətəndaşları azad olmayınca işğalda olan torpaqları da azad edilməyəcək. Gedən danışıqlar da, yaranmış ümidlər də, verilən vədlər də mənasızdır, gözdən pərdə asmaq üçündür.
Bu hədəflər qarşıda dayanmışkən Bakıda erməniləri söymək, əlbəttə, çox ironik görünəcək, hökmən ifşaya məruz qalacaq. Bu fəaliyyət Qarabağ hisslərini korşaldacaq və yalnız bizim şanlı hakimiyyətin apardığı planlı imitasiya işinə yarayacaq. Axı Qarabağı azad etmək istəyən bir təşkilat ciddi bir konsepsiya ilə hakimiyyətə gəlməyi, xalqı səfərbər etməyi hədəf seçməlidir. Ya da başqa bir konkret hədəfə xidmət etməlidir. Zamin Hacı da öz yazısında bundan çıxış edib. “Əkə” sözü bir bəhanədir.
Nəhayət, bir şeyi deməliyəm. Zamin Hacı sıradan bir yazar deyil. O, Azadlıq yazarıdır. Bəli, sərt yazır, lakin bu, onun qüsuru yox, qiyməti və üstünlüyüdür. O, heç kəsi hədəf seçməkdən çəkinməz. Amma nə üçün hədəf seçər? Şəxsi marağı, partiya marağı varmı? Mənafe güdərmi? Hamı bilir ki, yox! İstedadı və ağlı bir yana qalsın, onun vicdanı bir ölkə üçün örnəkdir. İllərdir heç bir maraq və mənafe güdmədən, heç nə qazanmadan yazır. Qarşılaşdığı basqılardan çəkinmədən, dayanmadan yazır. Ölkənin ən çox oxunan yazarıdır. Şişirdib-eləmirəm, onun yazması bu gün bizim ölkədə azadlığı bərqərar edən amillərdən biridir. Şübhəsiz, ona hücum bu ölkənin azadlığına olan hücumdur.
Azərbaycanın azadlığını düşünən kəs belə yazara necə hücum bilər? Belə yazara hücum edən adam Qarabağı necə sevir? Üstəlik, bu, müzakirə və mübahisə zəminində yaranan insident deyil, təşkil olunmuş hücumdur.

1191 dəfə baxılıb