MƏCLİS BİZİM MƏCLİSƏ BƏNZƏR

	25 may 2012


Onlayn ictimai-siyasi qəzet

Şahvələd ÇOBANOĞLU

MƏCLİS BİZİM MƏCLİSƏ BƏNZƏR

Dünən Türkmənistanda seçki bayramı idi

Maraqlı əhvalat seçkiyə az qalmış baş verib. Beynəlxalq təşkilatların nümayəndələri ilə görüşdə qonaqlardan biri Türkmənistan prezidentinə sual verib ki, bəs namizədlərin televiziyadan çıxışları ilə bağlı vəziyyət necədir. Böyük lider (Qurbanqulu Berdıməhəmmədovu ölkədə belə adlandırırlar) bir azca duruxub, amma yenə hər şeyin yaxşı olduğunu söyləyib:

- Bizdə hər şey demokratik seçki standartlarına uyğun gedir.
Amma həmin günə kimi namizədlərin televiziyada çıxışları yaddan çıxıbmış. Tərslikdən Berdıməhəmmədov göstəriş verməyi unudub, qalanları isə yada salmağa cürət etməyib. Fəqət, görüşdən dərhal sonra ali əmr verilib və bütün qüvvələr deputatlığa namizədlərin televiziya çıxışlarını çəkməyə səfərbər olunub. Hətta baytarlıq idarəsi də bu işə cəlb edilib. Çünki namizədlərin platformaları belə hazır deyilmiş. Çəkilişlər vüsət alıb, lakin axıra yaxın bəlli olub ki, bütün çəkilişlər arxada prezidentin böyük portreti olan fonda aparılıb. Bu isə düzgün deyil, çünki onda deyərlər ki, seçkilər alternativsiz keçib. Odur ki, çəkilişlər təzədən aparılıb.
Bu seçkilərin baş rejissoru Qurbanqulu Berdıməhəmmədovun sələfi Türkmənbaşıdan prinsipcə bir fərqi var. Dünyanın rəyi Niyazovun vecinə deyildi. Bəyəndilər, ya bəyənmədilər, istədiyini edirdi. Amma Qurbanqulu müəllim Azərbaycan yolunu tutub. İmitasiya etmək, bənzətmək, təqlid etmək: guya hər şey standartlara uyğun gedir. O, Türkmənistanı Azərbaycana yaxınlaşdırır, baxmayaraq ki, Azərbaycan özü il-ildən Türkmənistana yaxınlaşır.
Seçki isə baş tutub. Seçicilərin 88,41 faizi vaxtından əvvəl seçkiyə gəlib. Vaxtından əvvəl seçilən Türkmənistan Məclisi isə tezliklə işə başlayacaq. Seçkini izləyənlər də olub; ATƏT-in xüsusi bürosundan gələnlər, müxtəlif beynəlxalq qurumlar, Sergey Lebedev başda olmaqla MDB nümayəndə heyəti və s. Yəqin, doğma Azərbaycandan da gedən olub. ABŞ isə Böyük Liderin seçkilərinə ağzını büzüb, onu müşahidə etməkdən boyun qaçırıb. Dövlət Departamentinin sözçüsü deyib ki, plüralizm və alternativlik təmin edilmədiyi üçün, yaxud həqiqi xarakter daşımadığı üçün bu seçkilərin demokratik standartlara uyğun olmayacağı əvvəlcədən bəllidir. Biz bilirik ki, bu amerikalılar çox ayıq olur, onlara bizim son seçkilərdə fontan vuran alternativlik lazımdır ki, gəlib müşahidəçi olsunlar.
Seçki günü ölkədə mobil telefonlar işləməyib. Əhali əsgər dəstələri kimi şəffaf qutuların başına səfərbər olunub. Qanuna və ictimai təhlükəsizliyə əməl edilib. Prezidentin göstərişlərinə uyğun olaraq, xalq seçkini bir bayram kimi keçirib.
Seçkidən öncə isə Türkmənistan Neytrallıq bayramını qeyd etmişdi. Bu bayram orada çox yüksək qeyd olunur. Ölkənin aparıcı qəzetlərindən biri də “Neytral Türkmənistan” adlanır.
Burada qısa bir haşiyəyə çıxmalıyam. Həmin qəzet barədə soruşduğum bir türkmən dostum mənə yazmışdı ki, onların ölkəsində əla “Realnıy Türkmənistan” və “Gündəlik Türkmənistan” qəzetləri buraxmaq olar. Yazmaq üçün isə maraqlı materiallar və mövzular var. Mən də yazdım ki, Eynulla həbsdən çıxsın, yığışıb gələrik sizin türməyə.
Xatırladım ki, builki Neytrallıq bayramı qardaş ölkədə ikiqat bayram olub. Çünki həmin gün Qurbanqulu müəllimin “Seçilmiş əsərləri”nin birinci cildi işıq üzü görüb (əslində “qaranlıq üzü görüb” demək daha doğrudur). Kitab “İnkişafın yeni zirvələrinə doğru” adlanır. Adını eşidəndə mənə elə gəldi ki, əsər plagiatdır və bizim ölkədə dərc olunmuş kitabların birindən köçürülüb.

***

Çox maraqlıdır ki, o Məclisdə də 125 deputat yeri var. Etiraf edim ki, elə yüksək səviyyədə keçən demokratik seçki damarlarımdan axan türk qanını coşdurmaqda davam edir.

1030 dəfə baxılıb