ASQIRAQLI SİYASƏT | Yeni Müsavat

	25 may 2012


Onlayn ictimai-siyasi qəzet

Zamin HACI

ASQIRAQLI SİYASƏT

Milli Teleradio Şurasının burnu axır

Əgər bu saat “Azadlıq” radiosuna FM tezliyində qulaq asıb məmnun ola bilirsənsə, kimə minnətdarlıq eləməlisən? Əlbəttə, qrip virusuna! Haş bir en bir, yaxud haş iki en iki - dəqiq məlum deyil. Bu qrip elə zibil xəstəlikdir ki, yüzlərlə növü var. Dünya tibb elmi de-fakto qripin əlində acizdir. Hətta təzə növləri çıxanda çatdırıb elmi ad da qoya bilmirlər, eləcə quş qripi, “ispanka” - filan adlandırırlar.

Qripin niyə müalicəsi yoxdur? Səbəb çox sadədir: bu xəstəliyin virusları daim inkişafdadır (Eynən yapçıların qurduğu Azərbaycan iqtisadiyyatı kimi). Sübut olunub ki, bir insan həyatı boyunca fərqli qrip viruslarına yoluxur, nəticədə bədənin immun sisteminin müqaviməti mənasızlaşır. İmmun sistemi yeniləşmiş (lənət şeytana, yenə ağlıma YAP gəldi) qrip virusunu, sadəcə, tanıya bilmir, bədənə qəbul edir. Bundan sonra da gəlir burun suyu axması kimi zəhlətökən proses, asqırmaq, öskürmək, qızdırma və sairə. Xalqımız müdrikdir, o üzdən vaxtilə məsəl qayırıbdır. Deyir, qrip ya 7 gün çəkir, ya da bir həftə. Müalicənin-zadın qəti xeyri yoxdur. İstəyirsən özünü öldür - məsləhət görmürəm, sözgəlişi yazdım - virusun müddəti bitməyincə əl çəkməyəcək.
Nə qədər ki, bu cür tibbi savadla gedib Oqtay Şirəliyevin sınıq-salxaq xəstəxanalarında həkim işinə düzəlməmişəm, qrip araşdırmasına son qoyuram. İndi sizə izah edim nə üçün “Azadlıq” radiosu qripə minnətdar olmalıdır. Lənət şeytana, bu dünyada bir çox qlobal məsələlərin gicgici (Elçin Səlcuq demişkən) səbəbləri var əslində.
Milli Teleradio Şurasının sədri Nuşirəvan əkə - bu saat xalq Nizami Gəncəvini, onun məhşur əsərini, bayquşları məhz əkəmizin hesabına yada salır - möhkəm dirənmişdi, deyirdi 25 dekabrda “Azadlıq” radiosunu FM tezliyindən siləcəm. Qoy camaat ancaq “Ben neşeli Çiçək”, “Zaur hər gün efirdə” tipli düşük verilişləri dinləsin. Söz azadlığı, ölkədəki fikir plüralizmi böyük təhlükə qarşısında idi. Hamımız qulaqda qulaqcıq, əsə-əsə, həyəcanla 25 dekabrı gözlədik. Amma heç zad olmadı. Nuşirəvan yoldaş dedi ki, MTRŞ-nin iclası təxirə salınıbdır, çün şura üzvlərindən eyni vaxtda bir neçəsi... qrip olubdur.
Pah! Gördünmü? O boyda, zırpı Amerika öz radiosunu Nuşirəvan əkənin cəngindən xilas edə bilmirdi, ancaq qrip elədi! Qripdən də bu ölkəyə xeyir gəlirsə, ta neyniyək. Bu saat oğul lazımdı, “Qrip və söz azadlığı”, “Asqırağın mediada rolu” kimi mövzuları götürüb elmi iş yazsın.
Yaşım çoxdur, indi yadıma gəlir ki, 1812-ci ildə də belə şey olubdur. Bir çox tarixçilərə görə, Napoleonun Borodino döyüşü zamanı bivecliyinə, böyük itkilər verməsinə qrip səbəbkarmış. Döyüş ərəfəsi Napoleon qrip olubmuş, o üzdən qoşuna nəzarət edə, göstəriş verə bilməyibdir. Nuşirəvan Məhərrəmli də bizim Napoleon Bonapartdır. Düzdür, media sərkərdəmizin özü cağbacağdır, ancaq qoşunu azarlayıb.
Bəlkə də bu əməldə düşmən təxribatı var. Amerika radiolarını xilas etmək üçün MTRŞ üzvlərinə qrip yoluxdurubdur. Onlar belə bioloji silahın ustasıdır.
İndi xalq nigarançılıqla gözləyir ki, Nuşirəvan əkənin şurası haçan asqırıb ayılacaq, xarici radioların fatihəsini verəcək.
Əgər srağagün Milli Məclis, ondan qabaq Konstitusiya Məhkəməsi, lap ondan da öncə Əli Əhmədov qrip olsaydı, indi biz 18 martda referenduma hazırlaşmazdıq. Siyasət bax bu cür, sadə elmdir.
Əlimizdən nə gəlir, ümid edək ki, 18 martda xalq qrip olub referenduma heç gəlməsin...

2150 dəfə baxılıb