ÖKÜZ APTEKƏ BAXAN KİMİ...

	25 may 2012


Onlayn ictimai-siyasi qəzet

Sevinc TELMANQIZI

ÖKÜZ APTEKƏ BAXAN KİMİ...

Siz çötkəni qabağınıza qoyub hesab-kitab işləri ilə məşğul olmaqda, köhnə il də məşhur lətifədə deyildiyi kimi, yavaş-yavaş aradan çıxmaqdadır. İlin başlanğıcında özünüzə verdiyiniz sözlər, qurduğunuz planlar, arzular... hansı sizi yarı yolda qoyub, hansıyla birgə yeni ilin astanasına gəlmisiniz? Boz və xəsis siçanın quyruğunu bulamasından nə xeyir gördünüz? Bu öküz buynuzunda nələr gətirəcək? Gözü qızanda hansımızı ayağının altına salıb tapdayacaq? Siz bu suallara cavab tapmaqda olun, mən köşəmi davam edim, vaxtım azdır.

Bütün yaxın çevrəm, dost-tanışlarım yenə internetdə itib-batıblar. Dünyaca məşhur astroloqların proqnozlarında bu ilin onların bürcünə, ilinə, nə bilim doğulduğu saata nə qədər düşərli olmasını öyrənməyə çalışırlar. “Bu il mənim ilimdir” deyib, ayağını ayağının üstünə aşıranlar da var, onunçün çətin günlərin gələcəyini “öyrənib” indidən əl-ayağa düşənlər də. Sonuncuların imkanı olsa, həmin o öküzü elə indidən buynuzundan tutub qapıdan geri qaytararlar... Daha neyləyəsən ki, öküz də öküzdü ha.
Yenə də bəşəriyyətin özü qədər qədim olan “yeni ildən heç nə gözləmə, onda yaşamaq asan olur” və “gözləntilərin nə qədər böyük olsa, uğurların da bir o qədər böyüyər” tezislərinin “müharibəsi” başlayıb. Bilmirsən, bu ildən nə gözləyəsən. Və ya ümumiyyətlə, bir şeylər gözləməyə dəyirmi? Atalarımız nahaq yerə “ümid kasıbın çörəyidir” deməyib ki. Bizə ümid eləmək, yəni eləcə quru çörəklə kifayətlənmək qalıb...
Ümid demiş, dostlardan biri neçə gündür 31 dekabrda Azadlıq meydanında atəşfəşanlıq olmamasına elə sevinir ki, gəl görəsən. Guya atəşfəşanlıq olsa, iki yüz-üç yüz nəfər ev-eşikdən aralanıb, bir az açıq havada əylənsə, nə olacaqdı?
Biz getmiriksə, bundan xoşlanmırıqsa, bundan zövq alanların nə günahı? Nəymiş? Ora xərclənən pullarla neçə kasıbın problemi həll olunarmış, təqaüdlər, maaşlar artarmış... Yəni mış-muş-müş. Felin rəvayət forması. Bunların hamısı rəvayətdir. O əyləncələrin keçirilmədiyi illərdə guya ki, pullar elə camaatın maaşına sərf olunurdu, yoxsa onu bölüb qapı-qapı paylayırdılar? Heç olmasa, qarnı doymayanların gözü bir balaca doysun. Əgər onlar bu cür əyləncədən zövq alırlarsa, Allah eşqinə, qoy getsinlər. Ruslar demiş, na zdorovye...
Şəxsən mən hər Yeni il gecəsi (eləcə də digər bayramlarda) evimin balkonuna çıxıb, “Delfin” hotelindən göyə atılan fişənglərə baxıram. Noolsun gedə bilmirəm, fişənglərə ki baxmaq pulla deyil? Ev əhli həvəslə həmin fişənglərdən birinin neçəyə başa gəldiyini, bu pulla neçə-neçə məmləkət probleminin həll olunacağını saydığı dəqiqələrdə mən o mənzərədən, sadəcə, zövq almağa çalışıram. Çünki mənə burdan qalan ancaq həmin dəqiqələrin təəssüratıdır.
Və ilin o məşhur personası olan Şaxta Baba. O gün xaricilərin bir kəşfini oxudum ki, sən demə, Şaxta Baba dünyadakı bütün uşaqlara hədiyyə çatdıra bilmək üçün saniyədə 5800 kilometr sürətlə hərəkət etməli, 2,5 milyard dəfə nəfəsini dərib fasilə verməlidir. Zamandan səmərəli şəkildə istifadə edəcəyi təqdirdə isə cəmi 48 saata bütün uşaqlara hədiyyələrini çatdıra bilərmiş. 48 saata bütün bəşəriyyət cocuqlarını sevindirmək. Bir ay bundan qabaq mənim 5 yaşlı qızım da atasının köməyi ilə Şaxta Babaya bir məktub yazıb, poçta atdı. Bir oyuncaq istəyirdi, atası da alıb, evdə saxladı (yaxşı ki, uşaq köşə oxuya bilmir). 31 dekabrda saqqallı babanın adından uşağa sürpriz ediləcək.
Mənsə daha realistəm. Bax bu yazını bitirən kimi gedəcəm çoxdan gözaltıladığım bir hədiyyəni almağa. Və elə Yeni il gecəsi öz adımdan uşağa hədiyyə edəcəm. Onsuz da bu dünyada bir qara qəpiklik dəyərimizi bilən yoxdur. Halal pulumla aldığım hədiyyəni də Şaxta babanın adına çıxacamsa, daha nə oldu? Demirəm, bu hərəkətimlə tarixə düşəcəm, amma heç olmasa uşaq biləcək ki, anası Qar qızdan bircə qar kimi ağ paltarının olmamasıyla fərqlənir. Siz siz olun, mənim dediyimi qəribçiliyə salmayın.
Və bir də... İnsanlar nəyəsə və ya kiməsə key-key baxanda “nə öküz aptekə baxan kimi baxırsan?” deyirlər. Öküz bir növ keylik, habelə kobudluq, qabalıq rəmzidir. Kaş bu ili də key-key yaşamayaq, yazığıq...

1275 dəfə baxılıb