FİLOSOFLARIN GÜNDƏMİ

	25 may 2012


Onlayn ictimai-siyasi qəzet

Şahvələd ÇOBANOĞLU

FİLOSOFLARIN GÜNDƏMİ

Yaxud Fukuyamanın sonu

Fəlsəfə elmləri doktoru Ramiz Mehdiyev son yazısında (“ZAMAN HAQQINDA DÜŞÜNƏRKƏN və ELİTANI TRANSFORMASİYA EDƏRKƏN: VARİSLİK VƏ İNNOVASİYALILIQ”) Elçibəy hakimiyyətini bacarıqsızlıqda, mənəviyyatsızlıqda, rüşvətxorluqda ittiham etdiyi günlərdə AXCP hakimiyyətinin yadigarlarından olan fəlsəfə elmləri namizədi Fazil Mustafa (Qəzənfəroğlu) da qərargah tələbi ilə çıxış edib.

Bəs görəsən, AXCP hakimiyyətinə qarşı bu ağır ittihamlara kim cavab verməlidir?
Bəlkə də ölkədə neomonarxizm fəlsəfəsinin qalib gəldiyi bir vaxtda partiya sədrinin qərargah qayğısı sizə qəribə gələ bilər. Amma təəccüb doğuran bu da deyil. Seçkilərdə iştirak etməyəcəyini deyib birdən-birə də seçkiyə qatılan, bunu partiyasına qərargah və MSK-da yer verilməsi ilə izah edən Fazil bəy indi də deyir ki, hələ qərargah almayıblar. O zaman söyləmişdi ki, verilən qərargah təmir edilir və yalnız təmir başa çatandan sonra jurnalistlərə oranın ünvanı açıqlanacaq. Bəs necə oldu təmir edilən həmin qərargah? O zaman yazmışdım ki, belə qərargah yoxdur və seçkidə iştirak sadəcə yuxarıdan gələn tapşırıqla bağlıdır. Amma Fazil bəy onda mənə belə cavab vermişdi: “Mənəviyyatsız jurnalistlər qərargahın olmaması haqda yalan fikirlər yazır”. İndi hər şey aydınlığa çıxdı.
Ramiz Mehdiyevin son yazısında olduqca maraqlı yerlər var. Məsələn, o yazır: “Bir neçə il bundan əvvəl mən prezident Elçibəyin yanında keçirilmiş iclasların stenoqramlarını oxudum, iş o yerə gəlib çatmışdı ki, ölkənin prezidenti və eyni zamanda AXC-nin sədri özünün vəzifəyə təyin etdiyi adamlara müraciətlə deyirmiş: ”Rüşvət alırsınızsa, heç olmasa vicdanla alın, çox almayın". İqtidar bu vəziyyətlə əslində barışmışdı".
Bilirəm, çoxları indiki hakimiyyətin korrupsiya qazanını, rüşvət piramidasını düşünüb qəzəblənmiş oldu ki, gör, kim kimə nə deyir. Mən isə şəxsən bu hissəni oxuyanda üzümü indiki hakimiyyətə tutub demək istədim: “Rüşvət alırsınız, heç olmasa vicdanla alın, çox almayın”.
İş o yerə çatıb ki, Azərbaycan gömrüyündə pulu rəsmi işçilər yox, qeyri-rəsmi mülki şəxslər yığır. Ramiz Mehdiyev isə elə yazır ki, sanki bu hakimiyyətin adamları rüşvətə və pula həsrətdir. Bu yaxında tanınmış vəkillərdən biri söyləyirdi ki, Bakıda hakimlərdən biri ona vəd edilən pulun çatmamasını biləndə müttəhimə ittiham maddəsinin maksimum səviyyəsindən bir il artıq iş kəsib, məcəllədən də kənara çıxıb.
Bəlkə də elə bunların adı innovasiyadır, bəlkə də varislikdir. İndiki zaman haqqında düşünərkən mən özüm də bəzən AXC hakimiyyətini ittiham edirəm. Nəticə hələ də göz önündədir.
Ramiz Mehdiyev yazır: “Hakimiyyətə gələndən sonra AXC-nin bütün fəaliyyəti səriştəsiz, xaotik və perspektivsiz təsir bağışlayır, bu isə vəziyyəti daha da gərginləşdirirdi... Jurnalistlərin və siyasi opponentlərin döyülməsi adi hala çevrilmişdi: bir şəxsin fəaliyyət spektri olduqca geniş idi”.
Bu cümlələri oxuyun və zamanı bir daha düşünün. O fikirlər daha çox hansı dövrə uyğun gəlir? Üstündən 15 il keçmiş AXC dövrünə, yoxsa indikinə?!
Sonuncu cümləyə xüsusi fikir verin: “Bir şəxsin fəaliyyət spektri olduqca geniş idi”. Bu gün bir şəxsin ömürlük prezident olmasını gerçəkləşdirmək üçün konstitusiyadakı məhdudiyyəti aradan qaldıracaq referenduma hazırlıq gedir.
Maraqlıdır ki, Ramiz Mehdiyev bu yazısında Frensis Fukuyamadan sitat gətirməyib.

868 dəfə baxılıb