İMZA “SEZONU”ndan ÇIXAN DƏRSLƏR

	25 may 2012


Onlayn ictimai-siyasi qəzet

Şahvələd ÇOBANOĞLU

İMZA “SEZONU”ndan ÇIXAN DƏRSLƏR

Referendum əleyhinə yaradılan təşəbbüs qruplarının imza toplaması əngəllərlə üzləşir. Həbslər başlayıb. Səbəb bizə bəllidir, üstəlik, bunu həyata keçirən hakimiyyəti də yaxşı tanıyırıq. Bu hakimiyyət nə qədər özünə arxayın görünsə də təlaşını boğmağı bacarmır, narahatçılığını gizlədə bilmir. Xalqın siyasi fəallığının ən zəif durumda olduğu və müxalifətin ağır repressiyalarla küncə sıxışdırıldığı bir vaxtda da xof yaratmaqdan, təşəbbüsləri boğmaqdan, fəaliyyətlərə əngəl törətməkdən, repressiyalardan əl çəkmir. Çünki hakimiyyət özünə arxayın deyil və xalqa güvənmir.

Üstəlik, özündə müxalifətin və vətəndaş cəmiyyətinin geniş spektrini birləşdirən bir hərəkatın yaranması onun narahatçılığını xüsusən artırır. Sabir Rüstəmxanlının timsalında bu hərəkatın böyüməsi onun genişlənməsinə ümid yaradır və Məzahir Pənahovun verdiyi nəticələrdən asılı olmayaraq referendumun xalq tərəfindən dəstəklənmədiyini nümayiş etdirir. Həmin ovqat hətta referendumdan sonra da davam edəcək və hakimiyyət öz məqsədinə çatsa belə, bu gün dəyişikliklərin əleyhinə olan qüvvələr indidən öz üzərinə monarxiyaya qarşı mübarizə aparmaq missiyası götürmüş olurlar. Ona görə də hakimiyyətin narahatçılığı artır və cəmiyyətin gözünü indidən qorxutmağa çalışır.
Biz belə hallarla ilk dəfə rastlaşmırıq, amma bu dəfə çıxarılacaq ayrıca dərslər var. Məsələn, hakimiyyət referendumun necə keçəcəyindən indidən əndişələnirsə, konstitusiyaya ediləsi dəyişikliklərə qarşı olan qüvvələrin yaratdığı təşəbbüs qruplarının birini və ya hər ikisini ümumiyyətlə qeydə almaya bilər. Bir halda ki, imzaların toplanmasına əngəl yaradılır, deməli, toplanmış imzaları da saxta saya bilərlər. Əvvəldən də bunu güman etmək olurdu, amma indi həmin gümanlar daha da böyüyür.
Lakin belə olduqda da antireferendum qüvvələri səylərini zəiflətməməli, birgə fəaliyyətini davam etdirməlidir. Söhbət Qarabağ və Respublika Uğrunda Hərəkatın fəaliyyətindən gedir.
Təşəbbüs qruplarının biri ilk öncə Müsavat Partiyası tərəfindən elan edilsə də sonradan onların hər ikisi Müsavatın da daxil olduğu Qarabağ və Respublika Uğrunda Hərəkatın tərkibinə daxil edilib. Bu qrupların hər ikisinə eyni münasibət axıracan saxlanılmalıdır.
Hakimiyyət yalnız Müsavatın öncə elan etdiyi “Respublikaçılar” təşəbbüs qrupunu qeydə alacaqsa, onda hamı bu təşəbbüs qrupu ətrafında güclərini birləşdirməli, bu ayrı-seçkilikdə müəmmalı heç nə axtarmamalı, vahid hərəkat kimi və qeyd-şərtsiz olaraq birlikdə çalışmalıdır. Həmin halda Müsavat da bu təşəbbüs qrupuna özününkü kimi deyil, bütün hərəkata aid struktur kimi baxmalıdır.
Əgər “Respublikaçılar”ı qeydə almayıb, digər təşəbbüs qrupuna - “Qarabağ və Respublika Uğrunda Hərəkat”a yaşıl işıq yandırılarsa, bu halda da vahid hərəkat taktikası saxlanılmalıdır. Bütün tərəflər resurslarını əsirgəməməli və birlikdə çalışmalıdır. Hakimiyyətin ayrı-seçkiliyi monarxiya əleyhinə olan qüvvələr arasında ayrı-seçkiliyə yol açmamalıdır.
Bu mövzuya qayıtmamaq da olardı, çünki həmin təşəbbüs qruplarının hər ikisinin vahid hərəkata məxsusluğu barədə rəsmi qərar var. Lakin hakimiyyətin indidən göstərdiyi narahatçılıq onun ayrı-seçkilik edəcəyi, yaxud təşəbbüs qruplarının birinin, yaxud hamısını qeydə almaya biləcəyi haqda ciddi düşünməyə vadar edir.

1009 dəfə baxılıb