YARIYA QƏDƏR DOLU STƏKANA YENİ BAXIŞ...

	25 may 2012


Onlayn ictimai-siyasi qəzet

Sevinc TELMANQIZI

YARIYA QƏDƏR DOLU STƏKANA YENİ BAXIŞ...

Dad bu oxucuların əlindən, dad. Məşhur tamaşadakı kimi qəzeti oxuyub, “hə, nooolsun” deməyə bir candılar. Məsələn, mən texnikanın, internetin nailiyyətlərindən yenicə xəbər tutan müəllimlərin məktub bombardmanının hədəfi olmuşam. Elə bil sözləşiblər. Bir neçəsini çıxmaq şərtilə, hamısı da orta məktəb, bağçalardakı kristal təmizlikdən, nə bilim, məsum müəllimələrdən danışır. Tam “zəhmətkeş hücumudu”, inanın. Belə başa düşürsən ki, sonuncular evdən çıxmamış mələk qanadlarının tozunu silib, şkafdan asırlar. Ona görə biz onların mələkliyinin fərqində olmuruq. Sən demə, o savadsız şagird, tələbə ordusunun yaranmasında müəllimlər, məktəblər günahkar deyilmiş. Uşaqlar özləri durduqları yerdə, səbəbsiz-filansız korlanıblar. Lap “kitayski” maqnitafonlar kimi.

Şikayətin biri beş qəpikdəndi: biz daim pis şeylərdən yazırmışıq, halbuki ölkədə müsbət şeylər də baş verirmiş və sair və ilaxır....
Səhər-səhər yükləndim doğrusu. Və qərar verdim. Biz azərbaycanlıların çox sevdiyi məsəldəki kimi, bundan sonra “yeməyimə fikir verib, dərindən düşünməyəcəm. Ayağımı qalın, başımı isə sərin edəcəm”. Gənclər Günü olduğunu da nəzərə alıb, tam bir gənc kimi yaşayacam. Gözümü yumub düşünəcəm ki, hər şey yaxşıdır. Lap Az.TV-nin aparıcıları kimi. Dərələrdən sel kimi, təpələrdən yel kimi süzülüb məmləkətimizə təşrif buyuran xoş xəbərlərdən yazıb, sizi də, özümüzü də optimizmə kökləyəcəm. Lap elə bu gündən...
Bax, nə başlamısınız ki, bağçalarda, orta məktəblərdə özbaşınalıq hökm sürür, körpələr, məktəblilər naşı müəllimlərin əlində qalır? Noolsun, uşaqdı da. Başı qapaz yeyə-yeyə böyüyəcək də. Biz yaxşı oxuduq, yaxşı müəllimlərin əlindən çıxdıq, başımıza qızıldan tac qoydular? Onsuz da bu ölkənin əksər varlıları kitab-dəftəri cin-şeytan gözündə görürlər. Özü də... Bayaq internetdə oxudum ki, yenicə dünyaya gələn meymun balası yenicə doğulan körpədən ağıllı olur. Bir meymun qədər də ağlımız yoxsa, uşağa görə saldığımız bu hay-həşirin nə mənası var ? Uşaqlarla belə...
Kim deyir ki, polis, həkim, müəllim ordusu rüşvətxor, ələbaxandır? Əyri oturaq, düz danışaq, bu adamlar neyləməlidir? Evlərində dovşan balası saxlayıb, onlara kələm yedirdirlər? Bunların uşağı gedib küçələrdə dilənməlidi? Onda da başqa cür deyinəcəyik axı: polis uşağı küçədə dilənçilik edir, atası göz yumur. Gəlin, Türkiyədəki məşhur məsəli bax, bu cür yozaq: sən yanmasan, mən yanmasan, nasıl çıxar qaranlıqlar aydınlığa? Gərək kimsə yansın də...
Hüquq müdafiəçiləri alver edirmiş, jurnalist təşkilatları aldıqları qrantı səmərəsiz şəkildə xərcləyirmiş. Yaxşı, bunlar almasın kim alsın? Hökumət? Axı onda da şikayətlənəcəyik.
Camaat acından ölürmüş, insanlar səfalət içində yaşayırmış. Bəs sayı gündən-günə artan şadlıq saraylarında kimlər toy edir, restoranlara kimlər gedir, ucaldılan göydələnlərdə kimlər yaşayır? Bəlkə marsiançiklər?
Efir manıslarla dolur, insanlarımızın zövqü korlanırmış. Yox bir, əjdaha... Pisdisə, camaat ona niyə baxır, niyə uşaqlarının toyuna çağırmaq üçün ətək-ətək pul tökür? Yaxşıdısa, nə istəyirsiniz camaatın “elit star”ından, “toylar kralı”ndan, “yeni ulduz”undan?
O gün bir məclisdə manıs türkiyəli müğənni Fateh Ürəyin “Hadi, hadi” adlı mahnısını oxuyurdu. Təxminən belə: Boş ver bə, el aləm nə dersə (deyirsə) desin. Hadi, hadi, hadi...(sonra da rakkıtı-çıkkıtı, ləhlülü)... Siz görəydiniz, həmin mahnının sədaları altında neçə-neçə yoğun peysər kişi meydana çıxıb oynayırdı. Varlı-hallı əmilər olduqları ilk baxışdan görünən bu adamlar xüsusən də mahnının “hadi-hadi” (bu, sözügedən mahnıda təxminən bizim “get işinlə məşğul ol” ifadəsinin sinonimidir) hissəsində necə əllərini yelləyirdilər... Bu mənzərəni görən kimi adam başa düşür ki, heç biz də fransız xalqından geri qalmırıq, kef edirik. Üstəlik, əlimizi yelləyərək.
Qoy yazını filosofyana qurtarım, desinlər, ağıllıdır. Yarıya qədər dolu stəkana iki cür yanaşmaq olar: onun yarısı doludur və ya yarısı boşdur. Deyəsən, bu ölkədə birinci variantı seçənlər “çalır”... Özü də belə: “hadi, hadi, hadi...”

1279 dəfə baxılıb