AZƏRBAYCAN - ƏN BÖYÜK QƏZZA...

	25 may 2012


Onlayn ictimai-siyasi qəzet

Sevinc TELMANQIZI

AZƏRBAYCAN - ƏN BÖYÜK QƏZZA...

Qərəzli-filan deyiləm. Heç bu məsələdə ura patriotluq etdiyimi də düşünməyin, lütfən. Ya papağınızı, ya da ləçəyinizi qabağınıza qoyub, düşünün. Əminəm, dediklərimə haqq verəcəksiniz. Demək, nə baş verdi? Nəqliyyat naziri, körpülər, avtovağzallar, nə bilim yeraltı keçidlər padşahı Ziya Məmmədovun oğlu Anar gözlənilmədən xeyriyyəçilik etdi. Ötən bazar günü türkiyəli sənətçi İbrahim Tatlısəsin canlı verilişinə zəng vuraraq fələstinlilərə yardım kampaniyasına nə az, nə çox 22 min avro bağışladı. Mətbuat yazdı, iqtidar qəzetləri təriflədi, hökumətin əlinə öyünməyə rus demiş, daha bir “kozır” düşdü.

İnkar etmirik ki, Qəzzada ölənlərin ailəsinə, yaralananlara, körpə cocuqlara yardım kampaniyasına qatılmaq alqışlanası addımdır. Kazinolara, bara, narkotikə, digər zərərli vərdişlərə pul xərcləməkdənsə, onu xeyirli istiqamətə yönəldənə “afərin” deməmək ən azı ədalətsizlik olar. Bura qədər mən deyənlərlə razısınız? Onda davam edək.
Ancaq insaf xatirinə, bəlkə dönüb bir ölkəmizə nəzər salasınız? Heç uzağa getmirəm, bu günə qədər paytaxtda neçə-neçə binalar çöküb, sürüşüb, partlayıb... Olaylardan hansı birində bu xeyriyyəçilər əllərini cibinə salıb, oxşar addım atıblar? Hər gün xəbərlə nəfəs alan adamlarıq, biz onların xeyriyyəçiliyi barədə eşitməmişiksə, demək ki, ya bu baş verməyib, ya da baş verib, amma özləri məqsədli şəkildə gizlədiblər. Bu gizlətmək məsələsinə qayıdacağıq.
Bəs qaçqın düşərgələri, yataqxanalar, çadırlarda yaşayan həmvətənlərimiz? Hansı məmur balası çırmanıb, həmin düşərgələrə baş çəkib, 22 min demirəm, 2 min avroluq yardım edib? Təmirə möhtac, bərbad Azərbaycan məktəblərini, 3 xəstəyə bir çarpayısı olan xəstəxanaları, şadlıq sarayları, gözəllik salonları ilə əvəzlənən kitabxanaları da bu siyahıya əlavə edin. Onlara maliyyə ayrılması minlərlə, yüz minlərlə həmvətənimizin həyatını yüngülləşdirmək, savab qazanmaq deyilsə, bəs nədir?
Yeni iş yerləri açıb, işsizlər ordusunu bataqlıqdan çıxarmağımı deyim, yardıma möhtac insanların həyatını qurtarmağımı, ucqar bölgələrdə bir məktəb, xəstəxana tikdirməyimi? Bu xalq dediyim əməllərin hansı birini edən nazir oğlunu öpüb başının üstünə qoymaz ki? Azərbaycan - ən böyük Qəzzadı, buna şübhə etməyin. Uçan binaları, fəlakət içində yaşayan insanları, qaçqınları... ilə həm də.
O başqa məsələ ki, Azərbaycan kimi məmləkətdə insanların xeyriyyə tədbiri görüb, bunu gizlətməsi adi hala çevrilib. Təkcə ona görə yox ki, “sağ əlin verdiyindən sol əlin xəbəri olmamalıdır”. Allaha şükür, biz azərbaycanlılar (xüsusən də sonradan görənlərimiz) publikaya oynamağı sevirik. Metro önündəki dilənçiyə də pul verəndə cibimizdəki qalaq-qalaq pulu elə şəstlə çıxarırıq ki, Bill Qeyts yanımızda qələt eləyir. Amma televiziya, qəzet, nə bilim, radioda bunun reklam edilməsinə gəlincə, “stop” deyib, balıq kimi səssiz oluruq. Axı xeyriyyəçilik edən adamın həmin o bərli-bəzəkli televiziya süjetindən, qəzet materialından sonra aqibətini görmüşük. Bir növ gözü çıxmış qardaşlarımızdan dərs götürmüşük. Səhəri gün vergi, maliyyə, nə bilim “fövqəladə”dən gələcək ordunun qabağında hansı oğul dayana bilər? Ziya Məmmədovun oğlu olmur, kim olur olsun. Bu ölkədə “kimlərin oğulları” nələrin güdazına gedib, unutmuşuq? Həm də elə belə-belə problemlərin yaranmasında həmin oğulların ataları da az məsuliyyət daşımır axı. Nəsə...
Ona görə də, əziz oxucu, məni qınama. Ziya Məmmədovun oğlunun bu jestinin sırf Türkiyə publikasına, həmin verilişin aparıcısı İbrahim Tatlısəsə, azəri qızı Günelə, lap elə müğənni Ebru Polata (adı Anarın 22 min avroluq çanta bağışladığı sevgilisi kimi hallanan xanım) hesablandığını düşünürəm. Nə çox bu nazirlərin əlində qəzet, televiziya kanalı, informasiya agentliyi? Bir barmaqlarının işarəsi bəsdi ki, həmin KİV-lərdə yardım kampaniyasına start verərək, Qəzzaya Azərbaycan adından yardım edilsin. Edilmir. Niyə?
Məncə, bax indi sözün qurtardığı yerdəyik...

1330 dəfə baxılıb