HEYF PƏNAH HÜSEYNİN VAXTINDAN

	25 may 2012


Onlayn ictimai-siyasi qəzet

Şahvələd ÇOBANOĞLU

HEYF PƏNAH HÜSEYNİN VAXTINDAN

Yaxud daha bir sual: “Azadlıq” radiosu öz yerində, bəs İTV?

Bahar Muradova “Azadlıq” radiosunun əvvəlki tezliyə qayıtmasına nöqtə qoyub. Deputatxanada əminliklə bəyan edib ki, daha bu məsələ bitdi. Aydındır ki, bu cür qətiyyət xanımın özündən gəlmir, oralarda qəti qərar vermiş kişilərin son sözü var, bunu bilənlər də məsələyə məhz o tonda nöqtə qoyurlar. Amma hələ də hökumətlə danışıqlara ümid edənlər var. Bir şey yaxşıdır ki, bu radioların taleyi ilə bağlı ABŞ-la yanaşı, Avropa qurumları da israrlarını davam etdirir, radioların yerli dalğalarda yayımının dayandırılmasını demokratiyaya zidd və öhdəliklərə uyğun gəlməyən bir addım kimi qəbul edirlər. Onlar “Azadlıq” radiosunun əhəmiyyətini yüksək qiymətləndirir, onun yayımının bu cür məhdudlaşdırılmasını böyük itki sayırlar.

Az vaxt keçib, lakin doğrudan da bu itki hiss olunur. Fəqət bir sual hər kəsi, o cümlədən həmin beynəlxalq təşkilatları, ABŞ-ı, AŞ və AB-ni hökmən düşündürməlidir. “Azadlıq” radiosu niyə belə yüksək qiymətə sahib oldu? Niyə bir radionun yoxluğu bu qədər böyük itki yaradır? Nədən Azərbaycan “Azadlıq” radiosu olmadıqda söz azadlığının, debatların, alternativ xəbər və fikir yayımının kəskin böhranlı vəziyyətə gəldiyi bir ölkəyə çevrildi? Niyə durum bir radionun yoxluğu ilə böhran yarana biləcəyi səviyyəsinə çatdı? Nədən həyəcan siqnalı indiyədək ucadan səslənmirdi?
Təsəvvür edin ki, İran illər öncə kağız üzərində nüvə tədqiqatları aparmağa başlayandan ABŞ və Avropa bilir və deyirdi ki, molla rejimi nüvə silahı hazırlayır. Amma bu illərdə Azərbaycanda işlərin gedişindən bilməyiblər ki, bir gün “Azadlıq” radiosunu soyuq müharibə dövründə yayıldığı küncə sıxışdıra bilərlər və bu, ölkə üçün, beynəlxalq əməkdaşlıq üçün böyük itkiyə çevrilər. Halbuki, indiyəcən olanlara baxarkən hətta “Azadlıq” radiosunun yerli müxbirləri bu sonluğu görürdü. İndiyəcən olanları isə sadalamağa ehtiyac yoxdur, çünki hamı bunu bir-birindən yaxşı bilir.
“Azadlıq” radiosunun yayımının məhdudlaşdırılmasının söz azadlığı, ictimai debatlar baxımından böyük itki olduğunu deyən və bu sahədə Avropa Şurası qarşısındakı öhdəlikləri yada salanlar bir suala da cavab axtarmalıdırlar. Bu qurumla Azərbaycan arasında eyni sahədə daha konkret öhdəlik vardı -İctimai Televiziya. İTV bu sahədə götürülmüş öhdəlik kimi yaranıb. Bəs nə əcəb həmin qurum söz azadlığı və ictimai debatlarla bağlı boşluğu doldurmur? Nədən bu yükü təkcə “Azadlıq” çəkib indiyə kimi?
Bu yükü çəkən digər radio və televiziyalar, qəzetlər hanı?
“Azadlıq”la bağlı hələ də davam edən israr və təlaşlar çox yaxşıdır. Lakin bunlara çox gec başlayıblar və onlar olduqca yarımçıqdır. Bu gün də yarımçıqdır.

***

Uzun müddətdir ölkə ictimaiyyətini İTV ilə mübarizə aparmağa çağırırıq. Onun bir hakimiyyət televiziyasına çevrilib öz həqiqi vəzifəsini imitasiya etməsinin qarşını almaq üçün daha effektli addımlar atmağın zəruriliyini yazırıq. Bəzi demokratlar isə bu televiziyanın boz ekranlarına çıxıb NATO-dan, Ermənistandan, Amerikadakı böhrandan, arvad-uşaq, nənə-baba problemlərindən danışırlar. Bu da olur plüralizm. Hətta bu günlərdə ciddi polemika etdiyimiz yerdə hörmətli Pənah Hüseyni bu televiziyanın əməkdaşları müsahibə almaq üçün söhbətdən ayırdılar. Daha heç bir sözüm qalmadı. Heyf Pənah Hüseynin vaxtından və heyf İTV ideyasından.
Bizim İTV yerli dalğalarda yox, Özbəkistan dalğalarında yayılır.

996 dəfə baxılıb