DÖVLƏT SİYASƏTİNDƏ AYGÜNÜN QARDEROBU

	25 may 2012


Onlayn ictimai-siyasi qəzet

Şahvələd ÇOBANOĞLU

DÖVLƏT SİYASƏTİNDƏ AYGÜNÜN QARDEROBU

General Rzayevin qətli bizi hər gün dediyimiz, lakin səsimizin eşidilmədiyi məsələlər barədə bir daha düşünməyə vadar edir. Bu barədə dünən yazdığım “Qətldən də təhlükəli” başlıqlı məqaləyə oxucu reaksiyalarından anladım ki, ölkədəki təhlükəli və acı durum bizim düşündüyümüzdən də ağırdır. Bəli, daha qorxulusu odur ki, bizim ölkədə dövlətin mahiyyəti və funksiyası məhv edilib. Ədalət sistemi dağıdılıb, insanlarda dövlətə inam və Vətən hissi öldürülüb. Belə bir durumda ölkə və vətəndaş üçün təhlükə birə-min artır.

Dövlətin bütün qurumları, başda hüquq-mühafizə orqanları olmaqla, yalnız siyasi hakimiyyətin qorunması və şəxsi mənafelərin ödənməsi üçün çalışır. Məmurlar pul üçün hər şeyə gedirlər. Belə ölkədə Vətəninə və həmvətəninə qarşı alətə və tətiyə çevriləcək nə qədər istəsən adam tapmaq olar. Beş-on manata görə nəyəsə göz yuman, yaxud “nəyəsə” hazır olan adamlar bolluğunda isə xarici düşmən də at oynadacaq.
Digər tərəfdən, xarici düşmən bir yana qalsın, ölkə vətəndaşını öz polisimizdən, çekistimizdən, prokuror və hakimimizdən qoruyan yoxdur. Oxucumuz Elşad müəllim yazır: “Bizi oğru və rüşvətxor məmurlardan qoruyun ki, xarici düşmənə qarşı döyüşə qədər ayaq üstə dura bilək.”
Elşad müəllimin başına gələnlər ayrı bir mövzudur, özü yazır ki, onu da mərhum generalla bir yerdə diri-diri ağlamaq lazımdır. Görün, vətəndaş nə günə qalıb.
Bu ölkə təkcə nazirlərin, məmurların vətəni ola bilməz. Onların ağalıq etmək hüququ yoxdur. Üstəlik, hər kəs anlamalıdır ki, güclü siyasi rejim hələ güclü dövlət demək deyil. Bəli, xalq öz polisindən, prokurorundan, xüsusi xidmət orqanlarından, məhkəməsindən, nazirindən, generalından, prezidentindən qorxur. Bəs qorxaq hala salınmış bir xalq hansı xarici gücə qarşı Azərbaycanı qoruyacaq? Qoruyacaqmı?
Serj Sərkisyan son bəyanatında yenə Azərbaycana meydan oxuyub. Çünki qarşısında güclü Azərbaycan xalqını görmür. Tarix göstərdi ki, neftlə torpaq alınmır, neftlə qələbə olmur. Öncə güclü və parçalanmaz bir topluma sahib olmalısan.
Xaricdə yaşayan bir soydaşımız yazıb: “Rail Rzayev çox bacarıqlı zabit olub. Heyf ondan. Amma onun kimi bir zabit korrupsiya içində üzən orduda və ölkədə necə generallıq edib?”
Suallar çoxdur. Görürsünüz ki, bizim belə zabitlərimiz də var. Bizim bacarıqlı insanlarımız çoxdur. Amma ölkədəki yanlış idarəçilik elə vəziyyət yaradıb ki, hətta onlar Azərbaycanın maraqlarına xidmət edə bilmirlər. Bu idarəçilik bizi bir-birindən ayırıb, bizi bir-birimizə qarşı qoyub, nəticədə acı və zəmanətsiz günlərə gəlmişik.
Biz az qala hər gün deyirdik ki, tapın Elmarın qatillərini. Yenə də deyirik! Üstəlik, deyirik ki, generalın da qatillərini tapın. Amma bu ölkə yenə Siyavuş Novruzovun təfəkkürü ilə idarə olunur. Fukuyamadan sitat gətirməklə deyil ki! Yenə də hər gün vətəndaşların haqqı palçıq kimi tapdanır.
Dünən bir qrup gənc mədəniyyət adamı - Ələkbər Əliyev, Seymur Baycan, Qan Tural, Firudin Allahverdi müğənni Aygün Kazımovaya müraciət edib (www.kultura.az). Onlar Aygünü ölkə başçısının ona ev bağışlaması ilə bağlı təbrik edir, çoxlu tərifləyir və ondan köhnə evdə atılıb qalmış kişi corabları, alt və üst paltarlarını istəyirlər. Yazırlar ki, evsiz-eşiksiz kasıb adamlar kimi onların bu köhnə paltarlara ehtiyacları var. Bu xahiş bizim günümüzü gözəl açır.
Aygün Kazımova bəyan edib ki, onun geyim və bəzək əşyaları çoxdur və təzə evə sığmadığı üçün köhnə evini qarderob kimi istifadə edəcək. Müraciət müəllifləri yazır ki, onlar Aygünü çox səxavətli bir adam kimi tanıyırlar və xahiş edirlər ki, bəlkə müğənni köhnə evini sata və onlara xırda daxmalar ala.
Müraciətdəki ritorik suallara baxın: Sizə də verməyib, dövlət evi kimə verməlidir? Sizin köməyə ehtiyacınız hamıdan çox deyilmi? Bizim xalqımız Sizlə deyil, bəs kiminlə fəxr edəcək?! Məncə, bu ironiya üçün şərhə ehtiyac yoxdur. Bəli, bizim dövlət və onun idarəçiliyi belə əcaib günlərə gəlib çıxdı.

1386 dəfə baxılıb