YAP-dan GƏLƏN XALQ SİFARİŞİ

	25 may 2012


Onlayn ictimai-siyasi qəzet

Şahvələd ÇOBANOĞLU

YAP-dan GƏLƏN XALQ SİFARİŞİ

Görəsən, nə üçün YAP-dan gələn referendum təşəbbüsü xalqın sifarişi sayılır, amma Müsavatdan, AXCP-dən, ADP-dən və yaxud digər partiyalardan gələn antireferendum təşəbbüsü və çağırışları xalqın sifarişi sayılmır? Doğrudanmı xalq konstitusiya oxuyur və İsa Qəmbər demişkən, oradakı maddələrdə bir-iki sözün əvəzlənməsi üçün təşəbbüs qaldırır? Haradadır o xalq?

Bu ölkədə professorlar, müəllimlər konstitusiyanı oxumur. Hətta hüquqşünaslar və siyasətçilər də onunla doğru-düzgün maraqlanmır. Bunu referendumun keçirilməsi zamanı konstitusiyanın tələblərinə əməl edilməməsi faktı ortaya çıxanda daha yaxşı gördük. Referenduma çıxarılan sənəd “Konstitusiyaya dəyişikliklər və əlavələr” adlanır, onun parlamentdə qəbul edilməsindən xeyli vaxt keçəndən sonra müxalifət liderləri məsələ qaldırdı ki, konstitusiyaya əlavələr parlamentdə qəbul edilməlidir, çünki bunu elə konstitusiyanın 12-ci fəsli tələb edir.
Eyni zamanda bəlli oldu ki, nə iqtidar, nə də müxalifət tərəfdə konstitusiyanın özü ilə ciddi tanışlıq yoxdur. Onun məzmununu prinsipial olaraq bilirlər, lakin bütün təfsilatı yaddaşlarda yer tutmur. Bunun da bircə səbəbi var, o da konstitusiyanın həyatımızda iştirak etməməsidir. Şəxsən mən referendum məsələsi çıxana qədər ölkənin Əsas Qanununa axırıncı dəfə nə vaxt baxdığımı xatırlamıram. Yalnız bu arada onu yenidən oxudum. Axı biz konstitusiya ilə deyil, YAP-dan gələn “xalq sifarişləri” ilə idarə olunuruq. O bizim həyatımızda formal olaraq mövcuddur. Bəs xalq kütlələri nə vaxt bu konstitusiyanı oxuyub orada sözlərin yerini dəyişmək haqda düşündü?
Xalq özü bir məsəlində belə deyir: ayının min oyunu var - bir armudun başında. Hamı bilir ki, bu referendum yalnız və yalnız İlham Əliyevin prezidentlik müddətinin uzadılması, hakimiyyətin əbədiləşməsi üçündür. Dəyişiklik olmaması üçündür.
Hakim partiyanın nümayəndələri hey deyir ki, onlar Heydər Əliyevin kursunu davam etdirirlər. Bəs nə üçün onun dövründə qəbul edilən konstitusiyaya dəyişiklik edirlər? Əgər dəyişiklik bu qədər yaxşı şeydirsə, niyə prezidentlərin dəyişməsini məcburi hala gətirən bir məhdudiyyəti konstitusiyadan çıxarırlar? Necə deyərlər, dəyişiklik tələbini aradan qaldıran dəyişiklik həyata keçirirlər?
Keçirilən referendum demokratiyanın əsasında duran bir prinsipə qarşıdır. Bu prinsip xalqların yeni ümidlərinin siyasi hakimiyyətlərin, idarəçilərin dəyişməsi yolu ilə gerçəkləşməsinə söykənir. Məhz bu prinsipə görə indi ABŞ kimi demokratik və zəngin ölkədə Obamanın gəlişi xalqa böyük ümidlər gətirib. Dəyişiklik ona görə vacibdir. Hətta eyni adamın təkrar-təkrar seçilməsindənsə eyni partiyadan fərqli adamların olması daha məqbul sayılır.
Aydındır ki, istənilən dəyişiklik təsəvvürü YAP-ı dərhal həyatdan silərdi. Bu partiya yalnız və yalnız bürokratik mövcudluğa sahibdir və hakimiyyətin dəyişməsi real görünən kimi orada adam qalmayacaq.
Lakin referendum Azərbaycan hakimiyyətinin əsas problemini həll etmir. Axı bununla seçkiləri demokratik yolla udmaq, ölkədə xalqı təmin edən hüquqi cəmiyyət qurmaq, korrupsiyanın və rüşvətin kökünü kəsmək, əhalinin rifahını qaldırmaq, insan haqlarının qorunması, ədalətli məhkəmə və s. problemlər həll olunmur. Yalnız hakimiyyətin ömrü uzana biləcək. Amma bütün dünyanın qəbul etmədiyi bir yolla. Bu da yeni bir problemdir.

***

Müsavat başqanı teledebat zamanı sual verdi ki, qarşı tərəf ora niyə Səfa Mirzəyev və Şahin Əliyev kimi mütəxəssisləri göndərməyib. Xatırladım ki, jurnalistlər bu arada Şahin Əliyevin bir kitabını tapmışdı. Müəllif iki dəfədən çox prezident seçilməmək məhdudiyyətini o kitabda vazkeçilməz zərurət kimi şərh edir. Belə çıxır ki, o, referendumun əleyhinədir.

1123 dəfə baxılıb