QAÇAQMALÇI ELXANIN ARZUSU

	25 may 2012


Onlayn ictimai-siyasi qəzet

Şahvələd ÇOBANOĞLU

QAÇAQMALÇI ELXANIN ARZUSU

Yaxud xalqın yeni vəzifəsi - bir nəfəri həmişə prezident seçmək Konstitusiyanı dəyişməyin və hiyləgər bir referendum keçirməyin yalnız bir izahı var: hakimiyyətdə qalmaq istəyi hər şeydən üstün tutulur. Konstitusiyadan da, dövlət quruluşundan da, tarixin tələblərindən də...

Çox sadə və aydın bir məntiqdir. Hər şeydən üstün tutulan bir istək varsa, deməli, bütün digər şeylər bu istəyə qurban verilə bilər - konstitusiya da, qanunlar da, xalq maraqları da, vətəndaş haqları da, vətəndaşlar da.
Əslində, bu referendum bütünlükdə Azərbaycanın bir ailənin hakimiyyətdə qalmasına qurban verilməsinin illərlə davam edən məşəqqətlərinin ən bariz nümunəsidir. Bu yolla siyasi ömrünü əbədiləşdirmək cəhdi mövcud hakimiyyətin mahiyyətini və niyyətini tam aşkara çıxarır. Adətən deyirlər ki, niyyət əməldən üstündür. Amma arqumentlər, sübutlar, hüquq və demokratiya prinsipləri, dünyadakı tendensiyalardan yaranan ictimai tələblər, Azərbaycanla bağlı arzular bir yana qalsın, bu əmələ haqq qazandıran xoş niyyəti də biz indiyədək görməmişik. Ən başlıcası odur ki, biz xoş niyyətin olmadığını bilirik.
Axı konstitusiya indiyəcən də vardı. Biz onun dəyişdirilən və dəyişdirilməyən maddələrinin xalqın və ölkənin xeyrinə işlədiyini gördükmü ki, indi konstitusiyanın xalqın naminə dəyişdirildiyinə inanmalıyıq? Konstitusiya indiyəcən də vardı, amma formal olaraq vardı... Bu əsas qanunda xalqın öz hakimiyyətini qurmaq hüququ var, xalqın hakimiyyətinə etiraz hüququ var, toplaşmaq hüququ var. Bir sözlə, çox hüquqları var, amma o hüquqlar qapadılıb.
İndi isə guya xalqa yeni bir hüquq verilir - onun bir nəfəri həmişə prezident görmək hüququ. Xalqın lazım olan hüquqları qapadılıb, ona lazım olmayan hüquq yaradılır. Xalqın mövcud olan hüquqları işləmir, ona yeni hüquq bəxş edirlər.
Əslində bu, xalqa verilən hüquq deyil. Xalqın üzərinə qoyulan yeni vəzifədir - sən bir nəfəri, yəni İlham Əliyevi onun istədiyi qədər özünə başçı görməlisən. Elə referendum da xalqın üzərinə həmin vəzifəni qoymaq üçündür. Və buna xalq sifarişi deyirlər. Məgər xalq ucuzluq istəmir? Bəs ucuzlaşmaya niyə getmirlər? Dünyada neftin qiyməti düşüb, babat mineral su indi ondan bahadır. Amma bizim hakimiyyət neft məhsullarının qiymətini endirmək istəmir. Bilə-bilə ki, bu endirim ölkədə bütün qiymətlərin düşməsinə səbəb olacaq, ölkə iqtisadiyyatına, kənd təsərrüfatına yeni nəfəs verəcək.
Özünə Qaçaqmalçı Elxan adı götürən bir oxucu yazır ki, bundan sonra benzinin qiymətinin endirilməsi üçün təbliğat aparmayaq: “Eşidəndə ki Azərbaycan 1 ton benzini xaricə 342 dollara, ölkə daxilində isə 908 dollara satır, yeni arzuya düşdüm. Qaçaqmalçı olacağam. Sərhəddən o yanda bu benzini 342 dollara alıb ölkə içində 908 dollara satacam. Arasındakı fərq mənə də, mənə kömək edən və alverimə yaşıl işıq yandıran hər kəsə də çatacaq. Biz dünyadakı böhran zamanı böyük pullar qazanacağıq. Xahiş edirəm, mənim bu arzuma çatmağıma mane olmayın. İstəyərsinizsə, sizə də bir şey çatar”.
Elxan müəllim yazır ki, bu əməliyyatı ölkə içində də kağız üzərində həyata keçirmək olar. Benzinin bir hissəsi xaricə satılmaq adı ilə elə buradaca üyüdülə bilər. Bahalı bazar burada deyilmi?
Oxucunun ağlına gələn bu ideya yəqin ki, tək onun ağlına gəlməyib. Hər şey mümkündür. Konstitusiya yeni arzulara uyğun dəyişdirilirsə, benzin niyə bu cür satılmasın?!

831 dəfə baxılıb