POLİS DƏYƏNƏYİNİN NİTQİ

	25 may 2012


Onlayn ictimai-siyasi qəzet

Şahvələd ÇOBANOĞLU

POLİS DƏYƏNƏYİNİN NİTQİ

Referendumla bağlı qısa debatlar bildiyimiz bir həqiqəti yenidən sübut etdi. İstənilən açıq müzakirə avtoritar hakimiyyəti yerindən oynadır. Cəmi 10 dəqiqə bəs edir ki, bu hakimiyyəti təkzibolunmaz ifşa ilə üz-üzə qoyasan.

İfşa deyəndə fikir çox uzağa yön alır, amma onun mənası, sadəcə, açmaq, aydınlaşdırmaq deməkdir. Biz Əli Kərimlinin çıxışından sonra Siyavuş Novruzovun necə pərt olduğunu gördük, hətta cümlələri axıracan deyə bilmirdi. Zahid Oruc isə əsəbi və gərgin idi, başqa birisi - Elşən Mustafayev isə bu fürsətdən istifadə edib ritorikasına güc verirdi. Yəqin ki, qarşıda onu deputat edəcəklər, çünki Siyavuş Novruzovu və Zahid Orucu arxada qoydu.
Gərək yalanı da ürəkdən danışasan, bəzəyəsən. Amma yalanla neyləmək olar? Bu sətirləri Henrix Heyne deyib, sanki bizim hakimiyyətin yalançı təbliğatı haqdadır:

Allahın özü də yarada bilmir
Əsası olmayan bircə zərrəni.

Bu adamların dediklərinin heç bir əsası yoxdur. Allah da, bəndə də bilir ki, Azərbaycan rüşvətin və korrupsiyanın içində üzür. Ədalət tapdanıb, qanunlar işləmir. Məgər ölkədə sabitlik olması üçün onu korrupsiya ilə talamaq lazımdır? Tutaq ki, bu hakimiyyətdən yaxşısı yoxdur ölkədə, bu halda ölkənin sərvətləri oğurlanmalı, qanunlar pozulmalıdır?
Bu adamları yalnız və yalnız arxalandıqları güc və hakimiyyət danışdırır. Polis rejiminə arxalanıb danışmağa nə var ki?! Üstəlik, bu danışığa görə daha yaxşı mənsəb əldə edə bilərsən. Amma bunlar elə bilir ki, hakimiyyəti onların sözləri, çıxışları, dəlilləri saxlayır. Yox, bu hakimiyyəti zor aparatı saxlayır. Bu hakimiyyətdə ən gözəl nitq və ritorika polis dəyənəyinə aiddir. Bəziləri isə elə bilir ki, onların çıxışları bir iş görür...
Bu referendumun tərəfdarı kimi çıxış edənlərin hamısı bir arqumenti tez-tez təkrarlayır: axı burada nə var ki, yenə də prezidenti xalq seçəcək?
Sən demə, bizdə prezidenti xalq seçirmiş? Bəs biz niyə bunu bilmirdik? Bütün hiylə bu məsələnin arxasında gizlənib, Azərbaycan hakimiyyəti üçün seçkiləri keçirmək və saxtalaşdırmaq çətin deyil. Rəqiblər hamısı sıxışdırılıb, müxalifət üçün fəaliyyət meydanı qapadılıb, yalançı seçkilər keçirməyə və istədiyi nəticəni sənədləşdirməyə problem yoxdur.
Yalnız bir əngəl ortaya çıxmışdı. O da konstitusiyada prezident seçilməyi məhdudlaşdıran maddə. Onu da ləğv edirlər. Bundan sonra istənilən qədər saxtalaşdır, istənilən qədər seçil. Elə referendum keçirmək də problem deyil, istədikləri nəticəni elan edə biləcəklər.
Amma bunlar da Azərbaycan hakimiyyətini onu müşayiət edən problemlərdən qurtarmır. Ən başlıcası odur ki, xalqı qorxutmaq olar, amma zorla ona özünü sevdirə bilməzsən.
Sonda professor Musa Qasımlı haqda danışmaq istəyirəm. Cəmi 25 saniyə. Xahiş edirəm, İTV məmuru saata baxsın. Mən Musa müəllimin nə dediyini başa düşmədim. Çox çalışdım, anlaya bilmədim. Məgər hakimiyyət üçün vacib bir dəyişikliyi belə tərəddüdlə müdafiə etmək olar? Belə müdafiə olar? Heç bir emosiya yoxdur. Hətta müxalifətə qarşı sərt sözlər söyləmir. Belə şey olar? Bəs 10 dəqiqə vaxtı nə üçün götürüb? Burada Engelsin qoca vaxtlarında dediyi bir sözü xatırlatmaq istəyirəm: “Kim özgələrlə vuruşur, qazancı ritorikadır, kim ki öz-özü ilə vuruşur, nəticəsi poeziyadır.” Bəs Musa müəllimin qazancı nədir?! Onun mövqeyi çox şübhəlidir.
...İstifadə etmədiyim 3 saniyəmi isə İTV-yə, şəxsən Anar Yusifliyə hədiyyə edirəm. Siyavuş Novruzova cavab verər.

955 dəfə baxılıb