ŞEYX NƏSRULLAHI DİRİLTMƏK

	25 may 2012


Onlayn ictimai-siyasi qəzet

Şahvələd ÇOBANOĞLU

ŞEYX NƏSRULLAHI DİRİLTMƏK

Bir cəmiyyəti barmağına dolayan bircə nəfər varsa, onu fırladıb aldatmağa çalışan başqaları da tapılacaq. Son günlərin dəbdə olan ekstrasens Zirəddin əhvalatının əsl izahı budur. Ən gülməlisi odur ki, bütün bunlar Şeyx Nəsrullahın tarixi vətənində baş verir.

Şeyx Nəsrullah bədii obraz olsa da, o, bizim ölkədə gerçəkdən yaşamış və yaşayan insanların heç birindən az real şəxsiyyət deyil. Sənətkar qələmi bu ölüdirildənə elə can verib ki, ölünün dirilməsinə inanan insanların cəmiyyətində vətəndaşlıq hüququ qazanaraq real tarixi şəxsiyyətə çevrilib. Başqa sözlə, Şeyx Nəsrullah heç bir ölünü dirildə bilməsə də, özünü diriltməyə nail olub və bu gün bizə elə gəlir, belə bir adam doğrudan da olub və ölüb.
İctimai ekstrasensliyin hakim rolda olduğu bir ölkədə biz Zirəddinlərin çoxlarını görmürük, çünki onların heç də hamısı televiziyalara çıxmır, sakitcə öz məhəllə və ərazilərində müxtəlif statuslarda qazancına qurşanıb işləməkdədir. Şübhə yoxdur ki, təbliğ olunan 750 min yeni iş yerinin real sayında onların da öz payı var. Xeyli artıblar, bazarları da xeyli böyüyüb. Amma bizim üçün daha qorxulu olan bütövlükdə cəmiyyəti ekstrasenslərin, Zirəddinlərin müştəri bazasına çevirən səbəbdir.
Zirəddini cəmi bir neçə dəfə televiziyada göstəriblər, amma hər gün həmin televiziyalardan bizə yalan danışanları xatırlamağa çalışın. Hətta professorlar bizə oradan iqtisadi möcüzələr haqqında danışırlar; Mirzə Cəlili tədris edən müəllimlər oradan başqalarına qırmızı-qırmızı yalanları sırımağa çalışırlar. Azərbaycanı yalan başına götürüb və ölkənin akademiyası, universitetləri bu prosesin avanqard dəstəsinə çevrilib. Tanınmış yazıçılar, rəssamlar, jurnalistlər Şeyx Nəsrullah rolunda bu yalana qoşulub ölkəmizdəki uğursuz və ölməyə məhkum idarəçiliyə can verirlər. Onları görəndə adam ekstrasenslərin, falçıların, cindərlərin atasına rəhmət oxuyur.
Mənə elə gəlir ki, Mirzə Cəlil sağ olsaydı indi tamam başqa bir obraz yaradardı. Məgər bir ekstrasens yalançı hakimiyyətə satılmış ziyalılardan, həkimlərdən, seçkini saxtalaşdıran, büdcəni talayan adamlardan çoxmu günahkardır? O, heç kimi heç nəyə məcbur etmir, inanırsan inan, inanmırsan inanma.
Amma biz zorla, məcburən susdurulmuş, sındırılmış bir cəmiyyətdə yaşayırıq. Və adama sual verərlər ki, bu ölkənin hakimi və həkimi Zirəddindən azmı günahkardır? Bu ölkənin alimi və ziyalısı ilə Zirəddin arasında hansı rasional fərq var? Belə bir ölkədə Zirəddinin ortaya çıxması və adamların ona inanması nə qədər təəssüfedici olsa da, qətiyyən təəccüblü deyil.
Mirzə Cəlildən bu günə qədər dünya xeyli dəyişib. İndi siyasi Nəsrullahlara inanmaq daha böyük dərd, daha böyük üzüntüdür. Həm də indi əsl cahillik budur. İrrasional güclərə inamdan süzülən cahillik bizim dövrün əsas bəlası deyil. Bu indi daha çox fərdi problemdir.
Ölkə konstitusiyasını dəyişib özünə əbədi hakimiyyət yolu açanları müdafiə etmək üçün “Zəka” təşəbbüs qrupu yaradan alimlər Şeyx Nəsrullaha inananlardan çoxmu qorxulu, çoxmu ağıllıdır? Pul verib övladını Azərbaycanın universitetlərində oxudan valideynlər ölünün dirilməsinə inananlar deyilmi? Neft pulları ilə körpü tikməyi qoçaqlıq sayan müasirlərimizin Kefli İsgəndərin müasirlərindən nəyi üstündür?
Bu günün problemi Kefli İsgəndərin dediyindən çox fərqlidir. Bu gün Azərbaycanı “Ağlını itirmiş ölkə”yə (Zamin Hacı) çevirən qoçaqlar Şeyx Nəsrullahın özünə kələk gəlib, onu dirildəcəklərini vəd edə bilərlər. Problem xeyli fərqlidir.

1106 dəfə baxılıb