KEÇMİŞİ BOYKOT ETMƏK

	25 may 2012


Onlayn ictimai-siyasi qəzet

Şahvələd ÇOBANOĞLU

KEÇMİŞİ BOYKOT ETMƏK

İndi mətbuatda tez-tez “birləşmiş müxalifət” ifadəsinə rast gəlmək olur. Ölkə üçün taleyüklü bir məsələdə müxalifətin bir araya gəlməsi çox vacib nəticədir. Artıq ortada birgə verilmiş konkret qərar da var - referendumu boykot etmək.

Etiraz məzmunu daşıyan, konstitusiyaya dəyişikliklərin əleyhinə olan, səsvermənin nəticələrinə birbaşa təsir edən bir qərar dəyişikliklərin əleyhinə olanların hamısı üçün, hətta bütün xalq üçün ümumi qərar kimi qəbul edilməlidir. Kimin nə gücü varsa, bu qərarın həyata keçirilməsinə sərf etməyə borcludur. Real fəaliyyətin başında olan adamların verdiyi bu qərarın niyə bu formada olmasının əsasları onlara daha yaxşı məlumdur. Seçki ilə referendumun mahiyyətində fərqlər çoxdur və indiki halda aktiv boykot səsvermədə iştirakın, əleyhinə səsvermənin bir forması kimi qəbul edilə bilər. İndi vəzifələr də sadə və aydındır. Səsverməyə getməmək, imkan daxilində başqasını da buna inandırmaq. Mövcud reallıqlar daxilində çətin vəzifə deyil.
Bu referendumun ölkəmiz üçün ziyanı haqda yazmağa ehtiyac qalmayıb. Hər kəs başa düşür ki, bu oyunda yalnız bir məqsəd var - o da hakimiyyəti yenidən əldə saxlamaq üçün əngəlləri aradan qaldırmaqdır. Hamı görür ki, Azərbaycan dünyadakı müsbət tendensiyalardan imtina edir və bir nəfərin əbədi hakimiyyətdə qalması qaydası ilə keçmişə qayıdır. Bununla da cəmiyyətin dəyişiklik ümidləri daşlara dəyir. Nəticədə hər dəfə seçkiləri saxtalaşdıra bilərək özünü qalib edən bir hakimiyyəti dəyişməyin konstitusiya yolu bitmiş olur. Xalqın ən böyük hüququ elə xalqın səsi ilə qapadılır.
Bir sözlə, Azərbaycan hakimiyyəti öz mövcudluğunu qorumağın ən pis yolunu seçib. Həm də təkcə ölkəmizin taleyi baxımından deyil, elə özünə münasibətdə də. Hakimiyyəti qorumaq üçün asan yol kimi görünür, amma biabırçı bir yoldur.
Nə edirlər etsinlər, dünya bunu şahlıq qurmaq kimi qəbul edəcək. Elə xalq da. Hətta hakimiyyət bundan sonra böyük işlər görsə də bu qərar müsbət qəbul edilməyəcək. Həmişə dilə gələcək, həmişə etiraz yaradacaq. Hakimiyyəti dəyişməyən ölkə heç vaxt azad ölkə sayılmayacaq. Üstəlik, inkişaf etməyəcək, problemlərini həll edə bilməyəcək. Belə bir ölkə həmişə nisbi-sabit ölkə ola bilər, amma həmişə qeyri-azad ölkə olaraq qalacaq.
Bir kəsim insan dərk etmək istəmir ki, kimin hakimiyyətdə olması Azərbaycan xalqı üçün önəmli deyil, önəmli olan hakimiyyətlərin xarakteri və onları dəyişmək imkanının mövcudluğudur. Yalnız bu halda xalq öz ümidlərini gerçəkləşdirə bilər. Hakimiyyətlərin dəyişməsi xalqın bir hüququ olmaqla yanaşı hakimiyyətlərin məsuliyyəti üçün də bir qarantdır, ümumilikdə demokratik inkişafın vacib mexanizmidir.
Bir qrup insan başa düşmək istəmir ki, hakimiyyətin əbədiləşməsi hər kəs üçün təhlükəli və çətin bir gələcəyə yol açır. Onların özləri, övladları da bu təhlükənin qurbanı ola bilər. Odur ki, Azərbaycanı keçmişə, geriliyə aparan qərar boykota layiqdir. Keçmişə səs vermək olmaz.

***

Yaltaqlar amnistiya aktını əldə bayraq tutub yenə mərhəmətdən və humanizmdən dəm vuracaqlar. Əcəb mərhəmətdir, günahı olanları azadlığa buraxırlar, amma günahsız olanların əksəriyyəti yenə həbsdə yatacaq. Əcəb humanizmdir. Dünya bu cür mərhəmətdən, bu cür humanizmdən çoxdan imtina edib. Bu, rədd edilmiş keçmişdir. Çünki öncə ədalət olmalıdır, günahsızlar həbsdə yatmamalıdır. Sonra mərhəmətdən danışmaq olar.

831 dəfə baxılıb