YAŞAMAQ ÜRƏYƏ ZİYANDIR, BANAN İSƏ XEYİRLİ...

	25 may 2012


Onlayn ictimai-siyasi qəzet

Şahvələd ÇOBANOĞLU

YAŞAMAQ ÜRƏYƏ ZİYANDIR, BANAN İSƏ XEYİRLİ...

(Banan respublikasında yaşamaq duyğusu barədə)

Bananla bağlı araşdırmalarım aylardır uzanır. Suallarım xeyli çoxalıb, onların cavablarını isə çətinliklə toplayıram. Əvvəlcə yalnız bananın qiymətinin bizdə qonşu ölkələrdən xeyli baha olmasından başlamışdım - bunu alverin bir əldə cəmləşməsi, inhisar nümunəsi kimi görürdüm. Getdikcə suallar artdı. Məsələn, sonradan məlum oldu ki, rəsmi rəqəmlərə görə Azərbaycan bir ildə cəmi 9,4 min ton banan idxal edir, Ermənistan isə bundan xeyli çox - 18,2 min ton. Görəsən niyə? Bu göstəriciyə inanmaq olarmı?

Suallar elə bu qayda ilə o qədər artıb ki, elə bil yekə bir banan ağacının başında qalmışam, düşə bilmirəm, yanımda da meymunlar və banan yığan uqandalılar. Bir sözlə, mənim peşə həyatımda əsl banan mövsümüdür. Amma məhsul yığımı çox ağır gedir. Bəlkə də özüm işi dolaşdırmışam. Gərək universitet müəllimimiz Zeynal Məmmədliyə şikayət edəm - tələbə olanda nələrisə kafi öyrənə bilməmişəm.
Tanışlarımdan biri isə bu arada soruşdu ki, mənim banana marağım haradandır? Amma mən hələ cavab verməmiş özü sözə başladı:
- Bilirəm, banan ürəyə çox xeyirdir. Banan yaxşı meyvədir.
Məni gülmək tutdu. Axı heç bilmirdim ki, banan meyvədir, tərəvəzdir, ya nədir. Düzü, onacan dəqiqləşdirməmişdim. Üstəlik, yadıma düşdü ki, bəlkə də bir neçə ildir banan yemirəm. Yemək ağlıma gəlməyib, ya nədir?!
Ümumiyyətlə, bananın bəxti bizim ölkədə gətirməyib. Qiyməti baha, alveri sirli, ona aid rəqəmlər gizli, onun taleyini araşdıran adam isə heç banan yeyən deyilmiş.
Gördünüz ki, mənim bananla bağlı araşdırmalarıma verilən qiymətin isə “tayı-bərabəri” yoxdur. Dəqiqləşmələr üçün adamyeyən Afrika dövlətləri ilə yazışıram, ictimai əhəmiyyətli çox ciddi bir məsələ ilə məşğul olduğumu düşünürəm, lakin bunu bananın “ürəyə xeyirli” olmasını düşünməyimlə izah edirlər.
Yəqin, sizə maraqlıdır ki, bəs mən bananı ürəyə xeyirli hesab edən o tanışımın sualına necə cavab verdim. Cavab verdimmi? Bəli, həm də sualla cavab verdim:
- Sən bilirsən ki, yaşamaq ürəyə ziyandır?
Bilmirəm o adam məni başa düşdümü? Yəqin ki, yox. Çünki çox əcaib bir cavab verdi:
- Doğrudan?
Sonra aramızda nə isə bir anlaşılmazlıq olduğunu başa düşüb, keçdi yenə banandan danışmağa. Bəlli oldu ki, bananın qiymətinin baha olmasını məndən pis izah etmir. Bu yazını oxuduqda isə, yəqin ki, inciyəcək. Çox heyf, bir azərbaycanlı ilə də münasibətim banana görə korlana bilər.

***

Bizim dövrümüzdə adamlar boynuna zəli düzdürür ki, çox yaşasın. Siz deyə bilərsiniz ki, bunun adı müalicədir, tibbi proseduradır. Amma mən deyirəm ki, bunun adı həyatdır. İnsan həyat boyu hər cür iyrəncliyə dözüm göstərir ki, çox yaşasın. Hətta bəzən hər cür iyrəncliklərə təbəssüm göstərirsən ki, ümumiyyətlə, yaşayasan. Hər cür iyrəncliklərə və zəlilərə təbəssüm göstərəndə isə yaşadığın dövlətin banan respublikasına çevrildiyinin fərqində olmursan. Hətta bananın da niyə qıt və baha olduğu səndə narahatlıq yaratmır. Baxmayaraq ki, ürəyə çox xeyirlidir.
Ən gülməlisi odur ki, bananın dünyada ən baha satıldığı ölkə olmasına baxmayaraq, bu gündən biz rəsmən banan respublikası ola bilərik. Bu gün bir ədəd banan yemək pis olmaz. Əliniz cibinizdə olsun, ay banan respublikasının vətəndaşları!

979 dəfə baxılıb