FATI, OTUR, FATI, DUR...

	03 sentyabr 2010


Onlayn ictimai-siyasi qəzet

Sevinc TELMANQIZI

FATI, OTUR, FATI, DUR...

Prezident seçkilərindən dərhal sonraydı deyəsən. Aktrisa Firəngiz Mütəllimova bu iqtidarın necə yaxşı olduğundan dəm vururdu. Özü də nəsə ağıllı görsənmək üçün arqumentlər də səsləndirmişdi. Məlum olmuşdu ki, mərhum dövlət başçısı Heydər Əliyev buna təqaüd, İlham Əliyev isə mənzil bağışladığı üçün özünü hoteldə yaşayırmış kimi firavan hiss edir.

Bu aktrisamıza görə, demokratiya da elə buymuş - insana layiq olduğunu təqdim etmək. Əslində aktrisa-manıs tayfasının siyasət, ümumənsə həyat barədə nitqləri adamın həmişə ürəyini bulandırır. Birincisi, ona görə ki, əksəriyyəti dəhşətli dərəcədə savadsızdır. Bir kitab arası, bir qəzet açmazlar. İşləri-gücləri öz yan-yörələrindəki dedi-qodu, intriqaları təqib etmək, ona şərh vermək, soruşanda isə “mən öz işimlə məşğulam, intriqalarla maraqlanmıram” deyib, saxta sözlər danışmaqdır. Mənə inanmırsınızsa, hərdən lent.az saytındakı “Ciddi-ciddi” adlı bir rubrika var, onu oxuyun. Toylara ətək-ətək pul verib çağırdığınız bu insanların intellektual səviyyəsinin yerlərdə süründüyünü, dünyanı demirəm, öz məmləkətlərində baş verənlər barədə nə dərəcədə cahil olduqlarını görəcəksiniz. İkincisi isə “siyasi dünyagörüşləri” AzTV-də əzbərlədiklərindən uzağa getməz.
Nəsə, o gün buna bənzər daha bir çıxışı aktyor Yaşar Nurinin “ifasında” eşitdim. Sənətini ayaqüstə alqışlamağa hazır olduğum Yaşar müəllim deyirdi ki, prezident seçkisinə səhər saat 8-də getdiyi halda, referenduma bir balaca gecikib. 9-a 10 dəqiqə qalmış qatılıb. Nə böyük fədakarlıq. Üstəlik, prezidentin ömürlük seçilməsinə də bütün ailə üzvləri beşəlli “hə” deyiblər. Yəni o 91,5 faizlik nəticənin 0,2 faizi Nuriyevlər ailəsinin payına düşürmüş, çünki bu ölkə demokratikmiş, bu demokratiyanın davamıyçünsə belə səs vermək lazımmış... İstəməyənin gözü kor olsun.
Amma icazənizlə, ömürlük prezidentliyə beşəlli “hə” demiş Yaşar müəllimlə bağlı beynimə ilişən bir neçə sualı bölüşüm. Yəqin xatırlayırsınız, qısa müddət öncə səhhətindəki ciddi problemlərə görə aktyor bir xeyli əziyyət çəkmişdi. Qaraciyəri köçürülmüş, İstanbulun Memorial adlı bahalı xəstəxanasında günlərlə müalicə olunmuşdu. Kimin hesabına? Dövlətinmi, illərini verdiyi teatrınmı, yoxsa kinonunmu? Türkiyədə yaşayan azərbaycanlı iş adamı Mübariz Mənsimovun. Bəs hardaydı onda Yaşar müəllimin beşəlli dəstəklədiyi bu hökumət? Niyə “xalq artisti” adını verdiyi bu insana yiyə durmur, onu iş adamına möhtac edirdi?
Və ya götürək elə onun yaradıcılıq fəaliyyətini. Azərbaycanda onun dediyi kimi beşəlli dəstəklənəsi hökumət olsaydı, Yaşar Nuri ən pis halda hansısa özəl kinostudiyaya rəhbərlik edər, özəl telekanalların yüksək qonorarlı sifarişi ilə hər mövsüm filmlər, seriallar çəkib, bizlərin könlünü xoş edərdi. Heç uzağa getməyək, qonşu Türkiyədə Yaşar müəllim statusundakı aktyorlar bir serialın bircə bölümünə görə həftədə minlərlə dollar qonorar alırlar. Yaşlarını, səhhətlərini bəhanə edib, çox vaxt öz künclərinə çəkilənlər də olur. Amma türkiyəli aktyorlar bu arada illərdən bəri yığdıqları daşınmaz əmlakın və sairin kirayəsi ilə normal dolanışıqlarını təmin edə bilir. Bizdə isə 300 manat təqaüd alanlar az qalırlar aşıq kimi əllərinə saz götürüb, gecə-gündüz hökuməti tərifləsinlər. Teatra gedirsən, üzgörənlik, kinolara baxırsan, keyfiyyətsizlik. Con Travoltaya, Brus Uilsə, Ancelina Coliyə sənət dərsi keçə biləcək aktyorlarımız mebel dükanlarında səviyyəsiz, şit-şit səhnələr çəkib, taxta-şalbanın reklamıyla məşğul olurlar. Yaşar müəllimin dediyi kimi, demokratik ölkədə yaşasaydıq, indi onun nəinki özünü, hətta kasıb-kusubu pulsuz müalicə etdirəcək xəstəxanası olardı. Bir uşaq evi, məktəb və ya mağazalar şəbəkəsi açardı. Türkiyəli aktyor Tarık Akandan nəyi əskikdir ki? Bu adamın atasının adını verdiyi düz iki məktəbi var, zarafat deyil.
“Axı sən kimsən yoldaş Dadaşov?” Yaşar Nurinin o məşhur “Qatarda” tamaşasının məşhur sitatı yadıma düşdü nəsə. Bir də Dadaşovun ona yaltaqlanan kupe yoldaşına verdiyi “Fatı, otur, Fatı, dur” əmri.
Lənət şeytana, bu ölkədə fatıların sayı niyə belə sürətlə artır...

792 dəfə baxılıb