ELÇİBƏYİN STATUSU | Yeni Müsavat

	25 may 2012


Onlayn ictimai-siyasi qəzet

Şahvələd ÇOBANOĞLU

ELÇİBƏYİN STATUSU

YAP-çılar konstitusiyanı əlləşdirib eks-prezidentlərin statusu məsələsini ora saldıqdan sonra bu barədə maraqlı bir qanun da qəbul etməyə hazırlaşırlar. Siyavuş Novruzov deyib ki, bu qanuna görə, prezidentlik fəaliyyətini başa çatdırmayanlara eks-prezident statusu verilməyəcək. Konkret deyək. Yəni bu status yalnız Heydər Əliyevə aid olacaq, Ayaz Mütəllibov və Əbülfəz Elçibəy isə belə status almayacaq. Belə çıxır ki, nəinki prezidentliyi, heç eks-prezidentliyi də bölüşmək istəmirlər. Prezidentlik bütün predikativlərdə, bütün zamanlarda yalnız bir ailəyə məxsusdur və hətta postprezidentlik statusu da ortaya çıxsa, başqa heç kim bu ada iddia edə bilməz.

Bəs görəsən, Ayaz Mütəllibovun və Əbülfəz Elçibəyin imzası ilə qəbul edilən fərman və qanunlar necə olacaq? Axı bu adamlar nə vaxtsa, bir gün də olsa prezident olublarmı?! Amma YAP-çılara bunu izah etməyin nə mənası var?! Ayaz Mütəllibovu dədəsinin yasına gəlməyə qoymadılar, hələ didərgindir, hətta adam son vaxtlar bu hakimiyyəti tərifləməkdən əldən düşüb, yenə də evinə gəlməyə qoymurlar.
Bəli, bunlar Məhəmməd Əmini qəbul etmədikləri kimi, Əbülfəz Elçibəyi də qəbul etmirlər. O, Əbülfəz Elçibəyi ki, hakimiyyətini rus qoşunlarının Azərbaycandan çıxmasına qurban verdi. O, Əbülfəz bəyi ki, Azərbaycan naminə prezidentliyini yarımçıq qoymağa razı oldu və məğlub siyasətçi kimi tarixə düşdü.
Hakimiyyətini qorumaq üçün Azərbaycanın maraqlarını qurban verməyə, hakimiyyəti saxlamaq üçün hər addımı atmağa hazır olsaydı, Əbülfəz Elçibəy hələ də hakimiyyətdə ola bilərdi. Söz yox ki, hakimiyyəti də qorumalı idi. Lakin Azərbaycanı rus əsarətindən qurtarmaq, rus əsgərinin sapoqundan təmizləmək üçün elə bir təhlükəli işə girişdi ki, hakimiyyəti saxlamaq mümkün olmadı.
Əbülfəz Elçibəy üçün eks-prezident statusu heç nəyi dəyişmir. Heç vaxt adlara, statuslara, hətta prezidentliyə can atmayan bu adam yalnız öz xalqı üçün çalışmağı düşünüb və həyatını şərəflə bu işə həsr edib. O, xalqına sevgisi ilə yaşayan, bütün xalqların haqqına hörmətlə yanaşan əsl demokrat idi. Demokratiyanın xalqının azadlığı üçün qarantiya olduğuna inanır və Azərbaycanın gələcəyini yalnız bu yolda görürdü.
Zaman göstərdi ki, Qarabağ probleminin həlli üçün onun baxışları ən doğru yol idi. O, torpaqlarımızın ruslar tərəfindən işğal edildiyini qəbul edir və deyirdi: “Torpaqlarımızın 20 faizi işğal edilsə də, 80 faizi azad edildi.”
Elçibəy heç vaxt Güney Azərbaycanın dərdləri barədə də susmadı. Mən onun güneyli liderlərlə danışarkən kövrəldiyinin və qəzəbləndiyinin şəxsən şahid olmuşam. Onun yoxluğu bizim xalqı çox zəiflətdi. Sağlığında onu özləri üçün maneə kimi görənlər də onun ölümündən sonra Əbülfəz bəyin yerinin boş qalmasını hiss etdilər.
Belə bir adama eks-prezident statusunun verilməməsi problem deyil. Bəlkə də Siyavuş Novruzovların tanıdığı status ona heç lazım da deyil.
Əbülfəz bəyin vəfatından sonra onun borcları haqda mətbuat xeyli yazdı. O, bu pulları AXC-nin və həbsdə olan cəbhəçilərin problemlərinə xərclətmişdi. Biz ilk dəfə gördük ki, prezident olmuş adamın borcu varmış. Halbuki dövlətdə kiçik bir məmur işləmiş adam dünyasını dəyişəndə özündən sonra onun böyük mal-mülkü qalır. Bu hadisə Bəyin təmizliyinin, əxlaqının, rüşvətsiz və tamahsız işlədiyinin göstəricisi idi. Bu hadisə azərbaycanlı adına bir hörmət və şərəf gətirir. Xalqımıza və dövlətçiliyimizə inam aşılayır.
Mən fəaliyyəti yarımçıq qalmış bu prezidentlə hər gün daha çox fəxr edirəm. Hər gün onun işıqlı millət sevgisindən güc alıb, yıxılmamağa çalışıram. Belə bir adamı şəxsən tanımağımı, dinlədiyimi ömrümün bəzəyi sayıram. Və siyavuş novruzovların ona münasibətini çox rahatlıqla, qanunauyğunluq kimi qəbul edirəm.

937 dəfə baxılıb