KAĞIZ ÜZƏRİNDƏ TİKİLƏN MƏKTƏB

	25 may 2012


Onlayn ictimai-siyasi qəzet

Şahvələd ÇOBANOĞLU

KAĞIZ ÜZƏRİNDƏ TİKİLƏN MƏKTƏB

Yəqin yadınızdan çıxmayıb, bir ara məlumatlar yayıldı ki, bizim Dövlət Neft Şirkəti özünün ofis kimi istifadə etməsi üçün tayı-bərabəri olmayan göydələn inşa etdirir. Binanın eskizini görəndə adamın ağzı əyilirdi, elə bina da özü əyri bir formada idi. Xəbər verilirdi ki, Koreya layihəsi olan bu binanın tikintisinin smetası fantastik bir məbləğdir (hərə bir rəqəm deyirdi), mərtəbələrinin sayı isə 100-dən çox olmalı idi. O zamanlar ayrı bir zaman idi. Onda körpülərin, tunellərin qızğın dövrü idi, hər yanı qazıb, hər yeri boyamağa girişmişdilər.

Üstəlik, hər yanda analoqu olmayan inkişafdan söhbət gedirdi, yeni olimpiya kompleksləri açılır, tar muzeyi tikilirdi. Yəqin yadınızda olar: uzaq keçmiş deyil - təzəcə başa çatıb.
Az qala unutmuşdum ki, yeni tikilən məktəblərin sayı barədə isə yaxın günlərədək ağızlarda dastan gəzirdi. Heydər Əliyev Fondu dövlətdən çox məktəb tikirdi, dövlət özü, hətta xarici ölkələrin səfirlikləri də məktəblər tikirdi. Doğrudan da, ayrı bir zaman idi.
Amma indi il ərzində bircə dənə də məktəb tikilməyəcək. Yəqin bunu da eşitdiniz. Milli Məclisin Sosial siyasət daimi komissiyasının üzvü, millət vəkili Elmira Axundova etiraf etdi ki, bu il dünyadakı maliyyə böhranı ucbatından heç bir məktəb binası tikilməyəcək. Səhiyyə və mədəniyyət obyektlərini də bu aqibət gözləyir. Hətta böhran yeni qanunların “tikintisinə” də təsir edib. Elmira Axundova deyib: “Əmək Məcəlləsində maliyyə tutumlu bir neçə maddə var idi, onlara da dəyişikliklər etdik. Məsələn, uşaq məzuniyyətləri, doğuş məzuniyyətləri, doğuş üçün vəsait və s. məsələlər indi təxirə salınıb”.
Bütün bunları hakimiyyətin təbliğatçısı olan bir adamın dilindən eşidəndə yadıma indi həbsdə olan həmkarımız Qənimət Zahidin bir sözü düşdü. ARDNŞ-in tikməyə hazırlaşdığı yuxarıda söhbət açdığımız bina ilə bağlı xəbərlər yayılanda Qənimət bəy maraqlı bir fikir söyləmişdi ki, hakimiyyət bu binanı ucaltmaqla neftə heykəl qoyur. Çünki onu bu cür şən və məmnun, rahat və arxayın edən yalnız neft pullarıdır. Lakin həmin heykəl ucalmadı, çünki neft özü qiymətdən düşməklə zamanı dəyişdi.
Bəli, neft pulu ilə məktəb tikməyi hamı bacarar. Üstəlik, bu tikintidən yaxşı pul da yemək olursa... Fakt budur ki, Yaponiya səfirliyinin bölgədə tikdiyi məktəb dövlətin tikdiyindən dəfələrlə ucuz başa gəlmişdi. Yadımdadır ki, bir dəfə jurnalistlərə və QHT-çilərə demişdim ki, gəlin bir virtual məktəb tikək - kağız üzərində. Görək 1 məktəb neçəyə başa gəlir. Amma tarix elə gətirdi ki, ölkədə məktəb tikintisi tamamilə dayandı. Gərək biz kağız üzərində mövcud olacaq həmin məktəbi tikək ki, heç olmazsa, ölkədə 1 yeni məktəb tikilsin. Bir işə haram qatanda axırı həmişə belə olur...
Bu illərdə biz deyirdik ki, ölkədəki bəzi irəliləyişlər neftin hesabınadır və bunu uğurlu iqtisadi siyasət adlandırmaq olmaz. Bunu ona görə deyirdik ki, hakimiyyət yanlış siyasətdən əl çəksin və bizi gözləyən gələcək böhrandan ucuz qurtulaq. Amma İlham Əliyev bəyanat verirdi ki, Azərbaycanın uğurlarına paxıllıq edənlər bunu neftlə əlaqələndirir. Çox çəkmədi və bəlli oldu ki, neft qiymətdən düşəndə bizim hökumət bircə məktəb də tikə bilmir.
Fəqət, qarşıda Azərbaycanı daha ağır günlər gözləyir. Lakin hakimiyyət yenə də iqtisadiyyatla məşğul olmaq istəmir. Hər bir problemi də dünyadakı böhranla izah edirlər. Yaxşı söz tapıblar - dünyadakı böhran. Həm də elə bil dünya bizə aid deyil, ya biz dünyaya. Sanki dünya uzaq qonşu ölkədir. Axı biz də bu dünyadayıq, böhran bizə də aiddir. Ona qarşı biz nə etməliyik? Nəsə etməliyikmi?
Yox, bizim hakimiyyət əlini-əlinin üstünə qoyub neftin qiymətinin qalxmasını gözləyir. Neft 10 sent qalxanda iqtidar mətbuatı bunu çox həvəslə yayır...

1054 dəfə baxılıb