AT AVROPADA | Yeni Müsavat

	25 may 2012


Onlayn ictimai-siyasi qəzet

Şahvələd ÇOBANOĞLU

AT AVROPADA

Biz də haray-həşir salmışıq ki, adamlar ölkəni tərk edir. Sən demə, bizim ölkə heç at üçün də yaramırmış. Yoxsa ötən il Pekin olimpiadası üçün 3 milyona aldığımız at nədən Avropada - Belçikanın paytaxtı Brüsseldə olardı? Vətəndaşların ölkəni tərk etməsi fikrini qəzəblə rədd edən Səyavuş Novruzovun izahını xüsusi maraqla dinləyərdik...

Dillərə dastan olmuş bu atımızın Avropada olmasını rəsmən təsdiq ediblər. Şəxsən mən hazırlaşmışdım ki, onun Bakı həyatından, gün-güzəranından, ona göstərilən qulluqdan, yemindən-suyundan, həkimindən-sığalından bir reportaj yazım. Bilmək istəyirdim ki, 3 milyonluq bu heyvana necə baxırlar, onu necə qoruyurlar. Onun axurunun fotosunu da çəkib dəyərli oxuculara göstərmək istəyirdim. Lakin Gənclər və İdman Nazirliyinin mətbuat xidmətinin rəhbəri Səmayə Məmmədova “Yeni Müsavat”ın əməkdaşına bildirib ki, 3 milyonluq at Belçikanın paytaxtı Brüsseldədir.
Bəs niyə oradadır? Məgər bizim ölkədə ata baxa bilmirlər? O ata baxa bilməyəcəyiksə, niyə özü ağırlıqda pul verib onu almışdıq? Başa düşmək olmur. Azay Quliyev gərək sünnət və arıçılıq mövzuları ilə yanaşı, atçılığın monitorinqinə də pul ayıraydı. Görünür bu sahədə çoxlu problemlər var.
At mühacirətə gedə bilməz. At ölkəni özbaşına tərk edə bilməz. At turist səfərinə çıxa bilməz. Bəs at niyə Brüsseldədir? Orada harada qalır? Onun orada qalmasına nə qədər kirayə haqqı verilir? Ona xidmətin xərcləri nə qədərdir? Avropanın ata baxanları da, bilirsiniz ki, az pula bu işi görməzlər, həm də o cür bahalı bir ata qulluqdan söhbət gedir. Yəqin bu ata Brüsseldə qulluq edilməsinin xərcləri 10 nəfərin orada 5 ulduz oteldə qalmasının xərclərindən az olmaz.
Bizim ölkə çox əcaib yanaşmaya sahibdir. Atı Avropadan alır, Avropada saxladır, qazı isə Rusiyaya satır. Avropa Azərbaycan qazını almaq üçün bir neçə zirvə toplantısı keçirib, “Nabucco”nun üstündə söhbətlər bitmir, amma sonda qazı ruslar almaq üzrədir. Həm də Avropa qiymətlərinə. Moskvanın qaz alması bizim 3 milyona at alıb, onu xaricdə bəsləməyimizə bənzəyir. Avropa qiymətinə qaz alıb Avropaya satmaq nəyinə lazımdır bunların? Guya bu Avropaya təzyiq vasitəsi olacaq. Yaxud deyəcəklər ki, əllərində qaz inhisarı var. Axı bunu sonda Avropaya satmaq lazım gəlməyəcəkmi? Qayıdıb bizə satmayacaqlar ki?!
Ruslar bütün gücünü mənasız şovinizm və geostrateji yarışlara həsr edir. Bu, min bir dərdimiz olduğu halda bizim bir ata milyonlar xərcləməyimizə oxşayır. Yəni mənasız nəticələrlə fəxr edirlər, ölkə isə batıb gedir, rus xalqı Avropadakı həyata həsədlə yaşayır. Bunlar isə qaz yığır, qaz alır, bu kimi oyunlara güc qoyurlar. Bəs birdən də sabah neft kimi qazın da qiyməti düşdü. Onda nə olacaq? Axı Avropaya nə var, bir də baxdın, hər evə günəşlə, küləklə işləyən bir mühərrik satdı və qaz problemini həll etdi.
Bəlkə də nə vaxtsa Xəzri küləyini Rusiyaya satacağıq. Azərbaycan, Rusiya, Türkmənistan kimi ölkələr həmişə nəyisə sataraq irəli düşmək istəyirlər, amma heç vaxt da irəli düşə bilmirlər. Hər kəs bilir ki, bu ölkələrdə insanın qiyməti olmayınca irəlidə olan ölkələr sırasına qatıla bilməyəcəklər. Həmişə hansısa oyunda, hansısa alverdə başları qarışacaq, yaxşı nəticə isə alın yazısı kimi gəlib çıxmayacaq. Gələ də bilməz.
Hər şey öz yerində, biz israrla tələb edirik ki, atımızı ölkəmizə gətirsinlər! Onsuz bizə çox çətindir...

778 dəfə baxılıb