NİZAMİNİN ADAŞI | Yeni Müsavat

	30 iyul 2010


Onlayn ictimai-siyasi qəzet

Sevinc TELMANQIZI

NİZAMİNİN ADAŞI

Nizami dahidir... Amma Gəncəvi. Dövrümüzün Nizamisi - söhbət Cəfərovdan gedir - isə son ayların ən qalmaqallı personasıdır.Müqayisə uğursuz olsa da, deyim ki, şou-biznesin qalmaqal qəhrəmanı Əli Mirəliyevdirsə, siyasətinki Nizami Cəfərovdur.

Deputat noyabr ayından bəri susmaq bilmir. Rüstəm və Maqsud İbrahimbəyov qardaşlarına hücumla başlatdığı dalğa sonradan da ara vermədi. Yəqin söhbətin nədən getdiyini xatırladınız. “Bir zooloq öz obyektinə necə baxırsa, mən də İbrahimbəyov qardaşlarına elə baxıram” “kəlam”ını deyirəm. Tozanağın qalxdığı, aranın qarışıb məzhəbin itdiyi vaxtlar yadınıza düşdü? Ziyalılar bir-birinə dəymişdi onda. Zəhmətkeş müraciətləri təşkil edən kim, Cəfərovun cəmiyyətdən təcrid olunması üçün prezidentə müraciət edən kim... Nəsə...
Sonra nə oldu? Dedim axı, qalmaqallı, şok açıqlamalar ara vermədi. Cəfərov bundan sonra Çingiz Abdullayevə hücuma keçdi, onun adını dərsliklərdən çıxardığını və bu adamın Azərbaycan ədəbiyyatına dəxli olmadığını dedi. Növbəylə Tahir Salahovu, Fərhad Bədəlbəylini, Rasim Balayevi də “dişinə çəkdi”. Bir ay əvvəlsə “Ramiz Rövşənin, Vaqif Bayatlı Odərin zamanı keçib”, “Zəlimxan Yaqub dövrün nəbzini tuta bilir” deyib, daha bir bomba partlatdı. Son olaraq da Çingiz Hüseynovla bağlı dedikləri. Nizami müəllim iddia edir ki, 80 yaşlı yazıçını bu yaşında belə səviyyəsinə görə tələbəliyə qəbul etməzdi...
Oldumu? Osmanlı türkləri belə situasiyalarda “dananın quyruğunun qopduğu an” ifadəsini işlədirlər. Yəni bütün sərhədlərin yandırıldığı, münasibətlərin yerlə-yeksan edildiyi məqam. Bəy, bir nəfəsinizi dərin, bir fasilə verin. Bir neçə aya bu qədər hücum çox deyilmi? Nizami müəllim bu çıxışları ilə mənə dövrümüzün postmodernist yazarlarını xatırladır. Daim inkarçılıq xətti tutan, hər şeyi, hamını qapqara rənglərdə görən təbəqədən danışıram. Nizami müəllim də düşünür ki, cəmiyyətin qəbul etdiyi əksər tanınmış imza sahibləri pisdir və ya qədərindən artıq qiymətləndirilir. Bir sözlə, postmodernistləri də ötüb. Amma kiçicik bir fərqlə...
Postmodernist yazarların tənqid hədəfinə zaman-zaman hakimiyyətin nümayəndələri, onların korrupsiya əməlləri, cəmiyyətdəki özbaşınalıqlar da gəlir. Yəni AYB sədri Anarı tənqid etdikləri kimi, iqtisadi inkişaf nazirinə də yeri gələndə döşəyə bilirlər. Halbuki Nizami müəllim daha ehtiyatlıdır. Baxmayaraq ki, bu cür sürət götürən şəxs cəmiyyətdəki daha böyük problemləri də gündəmə çıxara bilər. Axı postmodernistlərdən fərqli olaraq, onun Milli Məclisdə tribunası və mikrofonu var. Heç uzağa getmirəm, elə rəhbəri olduğu mədəniyyət məsələləri üzrə komissiyada televiziyalardakı bərbad vəziyyəti, şou-biznesin əcaib durumu, kitab nəşri, kitab mağazalarının sürətlə azalması kimi problemləri qabardıb, buna həll yolu tapması çoxmu çətindir? Doğrudanmı sözünün Nuşirəvan Məhərrəmlininki qədər kəsəri yoxdur? Adam bircə sözüylə “bir millətin iki dövləti”ndən birinin seriallarını efirdən yığışdırdı, qosqoca Amerikanın səsini kəsdi və sair...
Digər bir tərəfdən, Çingiz Hüseynovu, Çingiz Abdullayevi inkar edən şəxsin Hüseynbala Mirələmov və Yunus Oğuzu tərifləyib, onları yazıçı hesab etməsi də diqqətçəkəndir (son müsahibəsinə diqqət - S.T.) Keçmiş dekan deyir ki, bəzən kimlərsə ondan kitabına ön söz yazmağı xahiş edir, o da ürəyi istəmədiyi, həmin əsərləri zəif hesab etdiyi halda, heç kimin könlünə dəyməmək üçün ön söz yazır. “Bu nə pəhriz, bu nə turşu” deyib təəccüblənməyə bilmirsən. Belə prinsiplərlə müasir ədəbiyyatı formalaşdıran Nizami müəllim daha sonra hansı məntiqlə Çingiz Abdullayevin kitablarını orta məktəb dərsliklərindən çıxarır? Axı ona məxsus olan bu sözlər bir-birinə daban-dabana ziddir.
Daha bir məqam. Ya vəlvələdən, ya zəlzələdən deputatın tənqid hədəfinə tuş gələnlər daha çox hakimiyyətin qara siyahısında olanlardır. Təriflədikləri isə əksinə. Bu halda “yeni postmodernist”in dediklərinin obyektiv olduğunu düşünə bilərikmi?
Bütün hallarda, Cəfərova uğurlar! Mən optimistəm. Bu sürətlə başlayıbsa, ümid edirəm ki, tezliklə bütün sədləri aşacaq, ondan gözlədiyimiz bütün addımları atacaq. Muro demiş, lənət olsun, içindəki insan sevgisinə! Yoxsa etməzdi...

752 dəfə baxılıb