GEDƏK BİZ OLMAYAN YERƏ...

	30 iyul 2010


Onlayn ictimai-siyasi qəzet

Sevinc TELMANQIZI

GEDƏK BİZ OLMAYAN YERƏ...

Belə səhnələri adətən köhnə türk və ya hind filmlərində görmək olur. Qoca bir kişi çarpayısında can verir, bütün övladlarını başına yığıb illərdir saxladığı sirri onlarla bölüşür. “Bu sirr çox ağırdır, onu özümlə qəbir evinə apara bilməyəcəm” deyib, acı göz yaşları tökür öncə. Danışılanlar isə bir qayda olaraq, ya qocanın övladlarından hansınınsa əslində uşaq evindən götürülməsi və ya cavanlığında etdiyi böyük günahla bağlı olur. Bu sirr uzaqbaşı çarpayının həndəvərinə yığılanları ağladır, tamaşaçı isə müdrik-müdrik başını bulamaqla kifayətlənir...

Srağagün təxminən buna bənzər bir səhnə bütün bəşəriyyəti şoka saldı. Bu dəfə vicdanı dilə gələn qoca keçmiş astronavt idi. Aya ayaq basan 6 astoronovtdan biri olan Edqa Mitçel başqa planetlərdə də həyatın olduğunu, lakin bunun ABŞ və digər dövlətlər tərəfindən gizlədildiyini etiraf edib. Keçmiş astronavt Yerin və Günəş sisteminin xaricində baş verənlərin öyrənilməsinə, Yerin də planetlər arxipelaqının bir hissəsi olduğuna və bunun qəbul edilməsinin vacibliyinə toxunub. “Bildiklərimin mənimlə məzara getməsini istəmirəm. Biz bu kainatda tək deyilik və bunu təsbit edə biləcək dəlillər var. Yadplanetlilər bizə düşmən olsaydılar, çoxdan məhv olardıq” - deyə Edqa Mitçel bildirib.
Bax elə bu yerdə Kərəmi ağlamaq tutub... Demək, sən Aya təşrif aparan 6 nəfərdən biri ol, bu boyda faktı bil, özün də illərdir, bütün bəşəriyyəti barmağına dola (yenə bizimkilərə şükür, onlar heç olmasa 8 milyonu aldadırlar-S.T). Özü də məşhur filmdə deyildiyi kimi, ortada bu boyda tale məsələsi olduğunu bilə-bilə. Düzdü, indi çoxunuz deyəcəksiniz ki, onsuz da başqa planetlərdə həyat olduğunu bilirdik, bu barədə minlərlə filmə baxmışıq, minlərlə kitab oxumuşuq, elmi kəşflərlə tanış olmuşuq və sair. Amma bu, başqa ya... Adam ora ayaq basıb, həyatı filmlərdən yox, öz gözlərilə görüb, hətta yadplanetlilərin də dostumuz-qardaşımız olduğunu aşkarlayıb, amma Amerikanın qorxusundan susub. İndi də nəymiş? Bildiklərinin bununla məzara getməsini istəmirmiş...
Eh, o Edqa Mitçelin nə vecinədir ki... Oturub dünyanın ən demokratik ölkəsində, hamburgerdən yeyib, Obamanın cümlələrindəki qrammatik səhvləri tuta-tuta yaşayır özüyçün. Edqa kimilərinin nəyinə lazımdır Mars? Onlar ora uzaqbaşı təqaüd yaşına çatanda, ekzotika üçün səyahətə getmək istəyə bilərlər. O da ki, qolf, bilyard oynamaqdan vaxt tapsalar. Edqa nə bilsin ki, bu informasiya anası ölmüş kasıb azərbaycanlı üçün nə əhəmiyyət daşıyır? Bu, onlar üçün yeni, qayğısız həyat imkanı deməkdir. Ən azı xəyallarda. Oturub təsəvvür edirsən ki, “gedəcəyəm, göylər məni çağırdı, daha burda qalmaq olmur” mahnısını zümzümə edə-edə köç edirsən Marsa. Nə yaşayış dərdi var, nə uşağından hər gün pul istəyən müəllimin tənələri, nə ələbaxan həkimlər (Marsda bütün xəstəliklər avtomatik məhv olur), nə də seçkilərdə işini itirəcəyin qorxusu ilə vicdanını satma təlaşı. Öz əlin, öz gəmin... İstədiyin vaxt min gəminə, get yadplanetli qonşuyla bir çay iç. Axı Edqa deyir, onlar bizimlə düşmən deyil...
Qadınların lap kefidir. Kimdi orda mətbəxə girib qazan-qazan yemək bişirən? Hər şey bir tabletkanın əmrinə baxır. Yeməklər kapsulda olur, hazırca. Ər danlağı yox, uşaq kaprizi yox. Acmısan, at kapsulu ağzına, qurtarsın. Hələ kişilər... Guya onların işləməyinə ehtiyac qalacaq? Yadplanetlilər onlardan əvvəl hər şeyi hazır ediblər, sistem oturuşub, yeganə görəcəkləri iş hansısa düyməyə basmaqdan ibarət olacaq. Yoxsa səhərdən-axşama qədər qan-tərə bat ki, aldığın pulu uşağın əyin-başına, bazarlığa sərf edəssən.
Özü də ora köçdünsə, avtomatik ömrün də uzanır. Bütün planlarını həyata keçirmə şansı qazanırsan. Təsəvvür et, qarğa kimi 300 il yaşayırsan, nəticə-kötücə görür, həyatı öyrəndikcə öyrənirsən, arzularını sıraya düzürsən...
Hər şey bir tərəfə... Bax, indi Marsda yaşasaydıq, kim idi köşə mövzusu barədə düşünən? Kompüterin bir düyməsinə basıb, 100 min tirajlıq qəzet də çıxarmaq olardı, onda qala bir yazı...
Düzünü deyin, siz - ucqar Bakı sakini istəməzdiniz ki, sizi uzaq Marsda görüb bəyənsinlər? “Yox” deməyin. Əks halda, buna veriləcək cavabı da bilməlisiniz...

817 dəfə baxılıb