HERKELİN AĞLAMASI | Yeni Müsavat

	25 may 2012


Onlayn ictimai-siyasi qəzet

Şahvələd ÇOBANOĞLU

HERKELİN AĞLAMASI

AŞ PA Azərbaycanda keçirilən referendumu müzakirə edəcək. Doğrusu, bu xəbər yenidən yadımıza saldı ki, ötən ay bizdə belə bir həngamə olmuşdu. Biz onu tamam unutmaqda idik. Sanki bu ölkədə elə bir şey olmayıb, sanki konstitusiyanı dibindən dəyişib yeni bir tarixə başlamamışıq. Hər şey röya imiş, elə bil. Buna belə deyirlər: arada çox işlər oldu, baş qarışdı, hadisə yaddan çıxdı...

Amma bir şey də var ki, bizim ölkədə konstitusiya ümumiyyətlə ciddi qəbul edilmir. O, bizim həyatımızda bir rol oynamadığından, şanlı ölkəmiz konstitusiya və qanunlarla deyil, bir nəfərin və onun ətrafının iradəsi ilə idarə olunduğundan referendumun nəticəsi cəmiyyət üçün sonuncu hədd kimi qəbul edilmir. Adamlar gözəl anlayır ki, bu referendumla hər şey nə qədər pisə doğru dəyişsə də, çürümə başladıqda, yəni əbədi hakimiyyət qurmaq istəyənlərin əvəzlənməsi üçün məqam olanda xalq kiminsə istəyi ilə kəllə-mayallaq edilən konstitusiyaya baxan deyil. Tarix belə məqamlarda maddələri oxumur...
Hakimiyyətin çürüməsi isə bir az mürəkkəb məsələdir. Uzun illər ləngiyib, bir gündə də baş verə bilər. Uzun illər uzanıb, bir ildə də başa çata bilər. Maraqlıdır ki, hakimiyyətin ətrafından da çürümə söhbətləri eşidilməyə başlayıb. BQP başqanı, deputatxana üzvü Fazil Mustafa bugünlərdə çox sərt açıqlamalar verdi ki, hakimiyyətin içində çürümə başlayıb. Yəni hakimiyyət içindən çürüməkdədir.
Etiraf edim ki, içindən çürümə məsələsinə çox təəccübləndim. Bəs hakimiyyət içindən deyil, çölündən çürüməli deyil ki? Hərçənd bizim hakimiyyətin çölü də var. Fazil Mustafa da daxil olmaqla, onun çölündə bir xeyli təşkilat və siyasətçiləri var ki, çürümə oradan da başlaya bilər. Fəqət mənim təəccübüm buna yönəlməyib. Fazil bəy deyir ki, çürümə hakimiyyətin içindən başlayıb. İçindən - yəni harasından?
Başından, ayağından, qulağından, dişindən, mədəsindən, ya harasından? Fazil bəy yayı atıb, oxu niyə gizlədir? Qardaş, deyirsənsə, açıq de, biz də bilək. Görək bu çürümə hakimiyyətin harasına yol tapıb.
Xeyli fikirləşmişəm, bu hakimiyyətin dişləri çürüyə bilərmi? Ağlım bir şey kəsmir. Mədəsi də yaxşı işləyir, məncə, orada siyasi-qasteroloji bir problem hiss edilmir. Baxmayaraq ki, neftin qiymətinin aşağı düşməsi bir az menyüyə təsir edib, gəyirmələr, köp, qıcqırma artıb, amma həzm əla gedir. Bəlkə çürümə başdadır, ayaqdakı “qribok”lardan çürümə başlamaz ki?!
Çətin məsələdir. Fazil bəy gərək daha bir açıqlama verə və bizə aydınlıq gətirə. Onun Afrikaya səfərindən sonra dəyişməsi şəxsən məndə bir rəğbət yaradıb. Qara qitəyə səfərindən sonra başqan bəyan etmişdi ki, gərək biz Afrika haqqında təsəvvürlərimizi dəyişək. Yəni Fazil bəy oradakı mütərəqqiliklərdən, analoqu olmayan inkişafdan çox məmnun qalıb və anlayıb ki, deyəsən, Afrika elə bizim ölkəmizdir. Belə səfərlərin birində Azərbaycanın başqa bir tanınmış adamı isə zənciyə belə demişdi: “Zənci siz deyilsiniz, zənci bizik, ay zənci qardaş!”
AŞ PA-nın indiki müzakirələrinə Naxçıvandan da nümayəndələr dəvət ediblər. Bəlkə də bu müzakirələr də Afrika söhbəti ilə bitəcək. Səmimi və doğru bir müzakirə etsə, ola bilər, arada Andres Herkel həyəcanla ayağa qalxar, gözləri yaşarar, bir az ağlayar və titrək səslə ingiliscə deyər: Â«Cənablar, biz bu Naxçıvanı gördükdən sonra anladıq ki, Avropa da Afrikadır...Â»

1001 dəfə baxılıb