NAĞIL BİTDİ... | Yeni Müsavat

	30 iyul 2010


Onlayn ictimai-siyasi qəzet

Sevinc TELMANQIZI

NAĞIL BİTDİ...

...Həyata davam!

Daha bir nağılımız da belə sona yetdi. “Min bir gecə”nin ssenaristləri nağıl dinləməyi sevən millətimiz üçün srağagün final pərdəsini qapatmaqla nə cür pislik etdiklərinin bəlkə də fərqində deyildilər. Serial 3 il idi ki, davam edirdi, çəkən şirkət də, yayımlayan kanal da, hətta aktyor-aktrisa heyəti də bəs deyincə ondan pul qazanmışdılar. (Pul demiş, xatırladım ki, həmin serialın baş rol ifaçıları hər bölümdən 10.000 dollardan artıq qazanırdılar). Su qabda çox qalanda isə avtomatik olaraq iylənir, ona görə də serial industriyasını sürətlə inkişaf etdirən abilərimiz “göydən üç alma” ataraq, seriala nöqtə qoydular. Təbii ki, növbəti sentyabrdan etibarən sürükləyici ssenariləri ilə yeni seriallar ekranları bəzəməyə başlayacaq. Türkiyə tamaşaçısıyçün nə fərqi var? Dərd bizim dərdimizdir. Serialsız, boz ekranlara məhkum olunmuş bizlərin...

Mən hələ “Min bir gecə” bitməmiş onun yekunlaşacağı ilə bağlı anonslarından kədərlənən, bunu özüyçün dərdə çevirmiş onlarla qadının söhbətini eşitmişəm. Buna aqressiv reaksiya göstərib, “serial pərəstişkarlığı kütbeyinliyin təzahürüdür” deyən acıqlı kişilərin də. Əslində hər iki mövqe uc nöqtələrdədir, yəni ortasını tapmaq lazımdır. Nə ifrat serial pərəstişkarı olub, gününü, qrafikini, əhvalını, bir sözlə, həyatını ona həsr etmək, nə də bunu kütbeyinlik sayıb, insanların zövqünü aşağılamaq düzgün yol deyil.
Adı üstündə - sabun operası. Bu gün baxıb, sabah unudulması üçün nəzərdə tutulub əslində. Tamam, bəzən hadisələrin ifrat inkişaf xəttiylə qarşılaşırıq, cəmi bir neçə seriyada ağlagəlməz hadisələr baş verir. “Min bir gecə”də də eləydi: Şəhrizadın oğlu ya sağalmaz xəstəliyə tutulurdu, ya qaçırılırdı, ya özü evdən qaçırdı. Daha bir qəhrəman - Onursa bir bölümdə qısqanclıq qurbanı olur, başqa bir bölümdə ailəsi dağılır, sonra gözləmədiyi anda ortaya qızı çıxır, sui-qəsdə məruz qalır, şirkəti böhranla üzləşir və sair. Yəni seriallarda ağlınıza gələ biləcək bütün olayların eyni qəhrəmanın başına gəlməsi tamamilə mümkündür. Amma gəlin bir az realist olaq - çox uzağa getmirəm, son 3 ildə həyatınızda baş verən olayların gedişinə ötəri bir nəzər salın. Azmı şey yaşanıb bu dövr ərzində? Çoxmu adam maraqlanıb həyatınızdakı bu dəyişikliklərlə? Serial da onun kimidir də əslində... Sizin həyatınız onlarla insanı, serialdakılarınkı isə milyonları maraqlandırır.
Məni qınamayın, amma serialın ziyanını heç cür anlamıram. 22 kişinin bir top arxasınca qaçması və bunun nəticələrinə uyğun olaraq, gərilən əsəblər, xərclənən pulları (futbol qumarını nəzərdə tuturam) nəzərə alanda sabun operası insanların əsəblərini “yuyur”. Günün stressi, yorğunluğunu ekran başında çıxarmağın (daha da əsəbləşməyin yox ha) kimə nə ziyanı var axı? Digər tərəfdən, səndən kilometrlərlə uzaq ölkələrdə də sənintək dərdi, qayğısı olan insanları görmək nə qədər eqoistcə görünsə də, insana bir təsəlli verir. Dərdin gözündə kiçilir bir növ...<%1>
“Seriala baxmaqdansa mütaliə etmək daha faydalıdır” deyənlərə gəlincə... Məncə, bunların biri digərinə mane olmur. Məşhur filmdə deyildiyi kimi, bu tərəfdən eşit, o biri tərəfdən də oyna. Yəni qrafikini səmərəli şəkildə bölə bilənlər üçün serialla mütaliənin yeri bir-birindən tamamilə ayrıdır. Həyatı kitabdan da, serialdan da öyrənmək olar. Bu, təxminən insanların qatıldıqları məclisdə bir-birinə “sən niyə filan yeməyi yox, o birini yeyirsən” iradına bənzəyir. Göz zövqü də mədə zövqü kimidir. Hansı saatda nə uyğundursa, onu qəbul etmək lazımdır.
Daha bir məqam...O gün dostlarla “Min bir gecə”ni müzakirə edəndə ilginc bir qənaətə gəldik. Bu, Türkiyədə yeganə serial idi ki, orda bir azərbaycanlı qadın - söhbət təbii ki, Məlahət abladan gedir - müsbət obraz kimi təqdim olunmuşdu. Yəqin ki, türk filmlərində azərbaycanlı kişilərin istisnasız olaraq dələduz, qadınların isə əxlaqsızlıq yuvalarının daimi sakinləri kimi təsvir olunmasını nəzərə alanda “Min bir gecə”ni elə təkcə bu istisnasına görə təqdir etmək olar.
Nəsə, daha bir nağılımız da belə bitdi. “Min bir gecə”ni dinləyə-dinləyə üç ili geridə qoyduq. Almaları yeməyə başlayın!

740 dəfə baxılıb