AVROPAYA DAHA BİR ADDIM

	30 iyul 2010


Onlayn ictimai-siyasi qəzet

Sevinc TELMANQIZI

AVROPAYA DAHA BİR ADDIM?

Ötən həftənin ən yaddaqalan hadisələrinin Top 10-unda ön sıranı tutan, çox güman ki, qatil manyak Fərda Qədirovun videosüjeti və “Eurovision 2009" yarışması idi. Uğursuz paralel olsa da, deyim ki, Azərbaycan insanını daxilən tərpədən, onu həyəcanlandıran (yaxşı və ya pis mənada) bu iki olay gerçəkdən də imkan verdi ki, bəzi həqiqətlər insanın iliyinə işləsin. Mən də cəmi bir köşəlik yerim olduğundan eyni yazıda iki məqama toxunmağa çalışacam.

Sonuncunun üzərində çox dayanmayacam. Çünki builki nəticələr də bir daha göstərdi ki, sözügedən yarışma musiqi yox, siyasət yarışmasıdır. Ölkələrin bir-birinə verdiyi xallar, sıcaq-soyuq mövqelərin hamısı geopolitik münasibətlərin nəticəsiydi. Təbii ki, qalibdən başqa. Norveçi təmsil edən Aleksandr Rıbakı dinləyib, skripkasının müşayiəti ilə ifa etdiyi mahnıya heyran qalmamaq həqiqətən mümkünsüz idi. Norveçin demokratik ölkə olması, bir çox mühacirlərimizə də qucaq açması, üstəgəl belə gözəl ifaçını yarışmaya təqdim etməsi bu ölkəyə heyranlığımızı, yaxınlağımızı birə-on qat artırırdı.
Yeri gəlmişkən, “Patrissia Kass yarışmaya qatılıbsa, haqsız rəqabət olacaq, mütləq qalib olacaq” kimi önyarğının da yersizliyi bir daha aydınlaşdı.
Digər tərəfdən, yarışmada Azərbaycanı təmsil edən Aysel-Araş cütlüyünün performansı alqışlanmağa dəyirdi. İctimai Televiziyanın sözün böyük mənasında üzərinə götürdüyü missiyanı yerinə yetirməməsini bir kənara qoysaq, builki seçimlərinə “afərin” demək olar. Cütlüyün səs tembri, ifa, səhnə qabiliyyəti, şou bacarığına təbii ki... Bir də geyim faktoru. Heç kəsə sirr deyil ki, bu cür kütləvi yarışlarda diqqət cəlb etmənin, fərqlənmənin yolu həm də avropasayağı geyim tərzindən keçir. Ayselin də qiyafəsi buna müsaid idi, gözəlliyi də ki, öz yerində. (Redaksiya geyim faktoru ilə bağlı olan fikri bölüşmür - red.) Nəticə? İkinci il bu yarışmaya qatılan Azərbaycan artıq 3-cü pilləyə qədər yüksəlməyi başardı. Burda Araşın fars-əfqan mənşəli olması, bu xalqların isə dünyanın bir çox ölkələrinə səpələnməsi faktını da unutmayaq lütfən. Bütün hallarda 8-ci yerdən 3-ə yüksəlmə böyük uğurdur. İndi İTV rəhbərliyinin qabağında görək kim dayana biləcək?
Amma qoyun bir “ÇP”ni deyim, çox da fərəhlənməsinlər. Xalların açıqlandığı məqamda Azərbaycan ən sonuncu sırada idi. Və yeganə ölkə idi ki, onun canlı yayımında problem yarandı. Ekran ağardı, qaraldı, bir-iki saniyəlik fasilə və sair. Yəqin ki, rəhbərlik bunun səbəblərini araşdırıb, ictimaiyyətə açıqlama verər. Amma aylardır hazırlandıqları canlı yayımda bir neçə saniyəlik təqdimat bölümünə daha ciddi yanaşmaq olardı. Nəsə, ümid edək ki, ilk il 8-ci, ikinci il isə 3-cü yerə layiq görüldüyümüz yarışmada növbəti il biz lider olacağıq. Amma Allah üzümüzə baxsın ki, o vaxta qədər Bakı da bunca qonağı qəbul edə biləcək vəziyyətə çata bilsin.
Nəsə, bizi həyəcanlandıran növbəti olaya - manyak Fərda Qədirovun mobil telefonuyla özünü çəkdiyi o görüntülərə qayıdaq. Manyakın vətəni, milliyyəti olmur, orası bəllidir. Dünyadakı bütün manyakların xarakter, tip etibarilə bir-birinə bənzədikləri də həmçinin. İmkan olsa, interneti qurdalayın, orda minlərlə manyakın həyat hekayəsi ilə tanış olanda onların bir nöqtədə kəsişdiyinin şahidi olacaqsınız - valideyn tərbiyəsindən, sevgisindən, himayəsindən məhrum olanlardır onlar. Fərda nümunəsi həm də onu göstərdi ki, biz azərbaycanlılar nəyin bahasına olursa olsun, ailəmizi, balamızı dolandırmaq, qarnını doyurmaq üçün əzab-əziyyətlərə düçar olmağa hazırıq. Təki onlar ac qalmasın. Əvəzində isə sevgini də, qayğını da, diqqəti də azaldırıq. Uşağın cibinə puldan bas, qoy gözü tox olsun. Bu “tox” gözlərlə hansı dəhşətli arzuların (məsələn, qan tökmək kimi) arxasınca düşə biləcəyi isə valideyni bəzən az maraqlandıran məsələ olur. Halbuki cibini nisbətən boş, ürəyini isə sevgiylə doldursalar, belə hallar çox az yaşanardı. Fərdanın valideynləri Moskvada yaşayır, bazarda alver edir, soruşanlara isə “balalarımız üçün bu əziyyəti çəkirik” deyirmişlər. Halbuki o əziyyətin mində birini uşaqlarının tərbiyəsinə, onun psixoloji anormallığının düzəldilməsinə sərf etsəydilər, bütün bunlar yaşanmazdı.
Nəsə, bu həftə də belə anormal keçdi. Allah bütün manyakları islah etsin!

702 dəfə baxılıb