“QARABAĞIN AÇARI MƏNDƏDİR!” DEYƏN ADAM

	25 may 2012


Onlayn ictimai-siyasi qəzet

Şahvələd ÇOBANOĞLU

“QARABAĞIN AÇARI MƏNDƏDİR!” DEYƏN ADAM

Oxucu məktublarını həmişə yazılarımızdan razı qalan kəslərdən almırıq, narazı qalanlar da yazır. Bu, əksər hallarda oxucunun yazıya mənfi və ya müsbət münasibətinin kəskin olmasından doğur. Düzdür, bəzən mövzuya və yazıya dəxli olmayan məktublar da alırıq. Bu yaxınlarda bir oxucu yazıb soruşmuşdu: “Bilmirsiniz Aşxabada təyyarə bileti neçəyədir?” Mən də ona üstəlik dolların kursunu yazdım ki, hesabını düz aparsın və bunun müqabilində ondan təşəkkür dolu daha bir məktub aldım.

Son günlərdə ən çox məktubu “Türkiyəyə gedən ermənilər” adlı yazımla bağlı almışam. Gözləmədiyim halda. Məktub yazanlar arasında ölkəmizdə və xaricdə yaşayan soydaşlarımızla bərabər, türkiyəlilər də var.
Bu yazıda Ərdoğanın “lazım gələrsə, Türkiyədə icazəsiz işləyən 40 min ermənini ölkədən çıxararıq” məzmunlu bəyanatından danışılırdı. Məni bu bəyanatın siyasi tərəfləri, nə də başqa bir tərəfləri deyil, sadəcə 40 min erməninin iş dalınca Türkiyəyə getməsi faktı maraqlandırırdı. Doğrudan da, adi məsələ deyil. 40 min erməninin Türkiyəyə iş dalınca getməsinin ilginc tərəfləri var. Təsəvvür edin ki, bu adamlar soyqırımda günahlandırdıqları bir dövlətə iş dalınca gedirlər, daha doğrusu getməyə məcbur olurlar. Təbii ki, 40 min erməni türk sahibkarlar üçün ucuz işçi qüvvəsidir və yalnız bu faktor həmin ermənilərə Türkiyədə zərurət yaradıb. Yoxsa heç kimin orada onlardan ötrü ürəyi getmir. Bizim soydaşlarımızdan da Türkiyəyə iş dalınca gedənlər az deyil və azərbaycanlı işçilərin buradakı məşəqqətli əmək həyatı haqda bizdə xeyli məlumatlar var. İstanbuldakı “Naxçıvan hambalları” deyilən yer haqqında da mətbuatımızda xeyli yazılıb.
Oxucuların əksəriyyəti yazımın Qarabağa aid hissəsinə münasibət bildiriblər. Bu hissədə deyilirdi: “Ermənilər çörək qazanmaq üçün işləməyə İstanbula gedirlərsə, Bakıya da gələrlər. Qarabağ erməniləri də həmçinin. Deməli, onlar asanlıqla Azərbaycanın tərkibində yaşamağa da razı ola bilərlər. Amma hansı Azərbaycanın? Təbii ki, iş və aş tapa biləcəkləri, ədalət və qanuna əmin olacaqları bir Azərbaycanın. Güclü ordusu və iqtisadiyyatı olan, mütərəqqi və mənən mükəmməl bir Azərbaycanla üz-üzə gəlməkdənsə, məşəqqətdən qurtula bilməyən Qarabağ erməniləri onun tərkibində yaşamağın daha yaxşı olduğunu qəbul edəcəkdilər. Lakin özlərinin xeyrindən uzağı fikirləşməyənlərin hakimiyyəti bizi bu şansdan məhrum etdi. Əliyevlər rejimi bizi elə bir Azərbaycanı qurmaq yolundan döndərdi.”
Təkrara yol versəm də, bu mövzuya qayıtmağı faydalı saydım. Almaniyadan Rizvan adlı soydaşımız yazır: “Sizin mövqeyinizlə razıyam. Unutmayın ki, Qarabağın açarını özgə yerdə axtarmaq lazım deyil. Bu, açar bizdədir, Bakıdadır. Mən həmişə deyirəm ki, Qarabağın açarı məndədir. Lakin dövlətim məni inkar edirsə, Qarabağı da inkar edir. Vətəndəki qızıldiş polislərə və Elçibəyin satqın müavinlərinə salam deyin.”
Türkiyədən Songül yazıb: “Kacak göcmen hiç bir statüye ve hakka sahip olmayan insandır, kagit üzerinde varliklarini kimseye kanitlayamaz ve hic bir yerde hic bir sekilde haklarini savunamadiklari gibi, temsil de edilmiyorlar. Fark etmiyor, onlar ermenimi, azerimi? ... onlar sadece varolmaya calisan ve var ola bilmek icin bir cok insanlik dişı muameleyi göze almak zorunda kalmış insanlar.”
Söngül yazır ki, qardaş Azərbaycan elə inkişaf edə bilər ki, ermənilər qaçaq köçmən kimi deyil, elə Qarabağdan olan vətəndaşlar kimi bu ölkəni seçməyə can atarlar və buna inanmaq lazımdır.
İş dalınca gedən bir soydaşımız isə Rusiyada yaşadığı məşəqqətlərdən danışır: “İndi həyatım bir az rahatlayıb, amma o günlər məni qorxulu yuxu kimi izləyir. İnkişaf etmiş Azərbaycan bizim özümüzə də gərəkdir. İnanıram ki, Qarabağ erməniləri də bu ölkədə yaşamağı üstün tutarlar. Lap istəməsinlər, biz bütün hallarda bu ölkəni qurmalıyıq!”
Bakıdan Anar yazır (təbii ki, bu, yazıçı Anar deyil): “Şeyxin zəmanət verdiyi halal kolbasaya and içirəm ki, yalnız azad Azərbaycan Şuşaya və Təbrizə sahib çıxacaq! Amma gəlin əvvəlcə ona nail olaq ki, özümüzünkülər bu cür ədalətsiz, özbaşına və geridə qalmış ölkədə yaşamaqdan qurtulmaq üçün buradan qaçıb getməyə şans axtarmasınlar.”

1181 dəfə baxılıb