QIZIL SAAT VƏ “SON ZƏNG” ŞOUSU...

	03 sentyabr 2010


Onlayn ictimai-siyasi qəzet

Sevinc TELMANQIZI

QIZIL SAAT VƏ “SON ZƏNG” ŞOUSU...

Bəlkə də bu bəyanatı başqa vaxt versəydi, bu qədər təəccüblənməyəcəkdik. Təhsil naziri Misir Mərdanov hər şeyi, hamını ömürlük etdiyimiz, əbədiləşdirdiyimiz bu günlərdə məktəblilərin həyatında cəmi bir dəfə keçirdikləri əlamətdar günü - “Son zəng”i ləğv etmək qərarına gəlib. Deyib ki, “Son zəng”i qeyd etmək hər bir gəncin arzusu olsa da, bunu şouya çevirmək, müəyyən qüvvələrin bundan istifadə etməsinə şərait yaratmaq düzgün deyil. Ömürlük təhsil nazirimiz (o da ömürlük) sonra da məzunlara həmin gün maraqlı bir qrafik təklif edib: “Şagirdlər dərsə gəlib, sonra evə gedib, imtahana hazırlaşsınlar. Onlar ”Son zəng"i qeyd etməsələr də olar".

Dünən seyr etdim, bəzi telekanallar nazirin bu açıqlamasını Azərbaycan Dövlət Neft Akademiyasında baş verən qanlı terrorla əlaqələndirməyə cəhd göstərirdilər. Dil boğaza qoymurdular ki, sən demə, belə bir ərəfədə məktəblilərin gülə-oynaya, bir-birilərinin ağ köynəyini, ağ önlüyünü yazmaları ölkədəki psixoloji ab-havaya uymurmuş. Təkrar edirəm, bunu həmin telekanallar edirdilər ki, faciədən cəmi bir həftə sonra şəhərin mərkəzində “Gül bayramı” adlı rəzillik barədə dəqiqələrlə süjet göstərib, xalqın əsəblərində oynamışdılar.
Mən demirəm ki, “Son zəng” keçirilməsə, məzunların həyatı qaralar, yaxud təhsilimiz uçuruma yuvarlanar. Sadəcə, Misir Mərdanovun əsaslandırması, arqumenti acı gülüş doğurur: bu bayramı kütləviləşdirib, şouya çevirmək, müəyyən qüvvələrin bundan yararlanmasına şərait yaratmaq olmazmış. Tamam, lap gözəl. Tutaq ki, məramınız belə gözəldir. Amma gəlin, diqqət edək: doğrudanmı təhsildə kütləviləşən, şouya çevrilən, lap elə müəyyən qüvvələrin yararlanmasına şərait yaradan yeganə hadisə, törən “Son zəng”dir? Hörmətli nazirimiz bəlkə başlamışkən elə kütləvi rüşvətin, müəllimlərin seçkilərdəki saxtakarlığının, məktəblərdə kitab-gündəlik alverinin... və digər iyrənc halların da qarşısını alsın? Bəlkə seçkilərdən əvvəl və sonra müəllim ordusunu ekranlara çıxardıb, prezidentə təşəkkür etdirməsi, akademiyalarda, ali məktəblərdə bu və ya digər “ölməz” ədəbiyyatçıların, tarixçilərin əttökən yaradıcılıq gecələrinin təşkili, dərsliklərin kütləvi şəkildə səviyyəsizləşdirməsi, şagirdlərin indidən yaltaqlığa öyrədilməsi ləğv olunsun? Yenə sayımmı? Axı insaf naminə “Son zəng” bunların hamısından daha zərərsizdir. Tutaq ki, uşaqlar al-əlvan geyinib, məktəbə gələcək, bir-biri ilə sağollaşıb, kədərlənib, xatirə dəftərlərinə ürək sözlərini yazacaqdılar. Sonra da elə bu rüşvət yuvasından qurtulduqlarını bayram etmək üçün özlərinin təşkil etdikləri ziyafətdə bir araya gələcəkdilər. Bunun kimə nə ziyanı? Yaxşı, Milli Parkda baş verən qaçdı-tutdu oyunu, bir çox hallarda barbarlığı ilə seçilən “dövrəyə alma” kimi törənlər o qədər də xoş olmaya bilər. Amma nə olsun? Bundan hansı məzunun gələcəyi korlanır, kimlər bundan kütləvi yararlanır, hansı şoudan söhbət gedir? Bəzən elə təhsilimizin şanlı nümayəndələrinin liderlik etdiyi “şou”lara baxanda məzunların parkdakı bu cavanlıq oyunları, sadəcə, xoş təbəssüm yaradır.
Lənət şeytana, amma hərdən adama elə gəlir ki, “Son zəng”i ləğv etmək istəyi, sadəcə, bu törənin şanlı təhsilimizə maddi-mənəvi heç bir xeyir verməməsiylə bağlıdır. Yoxsa ki, kim idi belə “daşdan keçən” arqumentlər səsləndirib, həmin günü ləğv etməyə çalışan?
Bu yaxınlarda eşitdiyim, mövzumuza da az-çox aidiyyəti olan bir olayı danışmaq istəyirəm. Demək, Bakının rüşvətdən, müəllimə hədiyyə, pul vermə ənənələrindən xali olan özəl liseylərindən birində ibtidai sinif valideynləri bu durumdan çox narahat olublar. Bir gün valideyn şurası yığışıb qərara gəlib ki, müəllimin uşaqlara bunca qayğısına görə ən azı pul yığıb, bir qızıl saat bağışlamaq lazımdır. Təsəvvür edin, Bakının gözünü çıxarıb, rüşvətdən, korrupsiyadan, yaltaqlıqdan uzaq bir təhsil müəssisəsi tapasan, sonra da onu elə öz əllərinlə çirkləndirməyə çalışasan. Bax, bu təhsil sistemi insanların beynini, psixologiyasını, düşüncə tərzini beləcə, KÜTLƏVİ formada zəhərləyib. Hələ neçə illər, əsrlər lazımdı ki, bu virus canımızdan, genlərimizdən çıxsın. Təhsil naziri də deyir ki, “Son zəng” ziyanlıdır. “Son zəng”ə çatana qədər yolda nə qədər şouları məhv etməlisiz, bilirsinizmi?
Bilmək demiş, bugünlərdə ali məktəblərdən birində “Mən nəyi bilirəm” müsabiqəsi keçirilib. Təəssüf ki, tələbə deyiləm. Yoxsa mən deyərdim, bu təhsil sistemi barədə nələr bilirəm...

820 dəfə baxılıb