XORUZUN QUYRUĞU... | Yeni Müsavat

	30 iyul 2010


Onlayn ictimai-siyasi qəzet

Sevinc TELMANQIZI

XORUZUN QUYRUĞU...

Biz yazanda ki, bu “Son zəng”in ləğvi nəsə düz-əməlli məsələyə oxşamır, bundan ənənəvi rüşvət iyi gəlir, müdrik və çoxbilmişlər adamı qaramatlıqda, nə bilim qərəzlilikdə suçlayırdılar. Qərar verilən gün köşə yazarı həmkarlarımın yazdıqlarını oxudum. Nisbətən yaşlı nəslin nümayəndələri təhsil nazirinə sətiraltı dəstək vermişdilər. Həmin tarixdə Milli Parkda gənclərin çıxara biləcəyi həngamənin çərçivəsini vurğulamışdılar və sair. Nisbətən cavanlar isə olaya parodiya pəncərəsindən baxıb, bizi güldürmüşdülər.

Demək ki, bu məsələni düzgün dəyərləndirmək üçün daha gənc olmaq lazımdır. Gənclər bu təhsil sistemini yaşlılardan daha yaxşı tanıyır. Göz gördüyündən qorxar məsələsi var ən azı...
Keçim mətləbə. Anadolu türkləri demiş, məktəblərdən axın-axın gələn şikayətlər onu göstərir ki, sən demə, “Son zəng”in məktəb çərçivəsində keçirilməsi qərarının “fəlsəfi” qatı varmış. Təhsil nazirinin məlum yasağından sonra məktəb müdirləri problemin operativ həlli yolunu tapıblar. Bakı şəhərindəki məktəblərdən birində oxuyan uşaqların valideynləri deyir ki, rəhbərliyin təşkilatçılığı ilə “Son zəng” günü ora bir sintezatorçalan gətirilməsi qərarlaşdırılıb. “Sənətçi”nin (bu təqdimat direktora məxsusdur - S.T) 2 saat boyunca çalıb-oxuması üçün buraxılış sinif şagirdlərindən 25 manat məbləğində pul yığılıb. Bu il həmin məktəbi təqribən 100 şagird bitirir. Sürətli hesablama - 100 nəfərdən 25 manatdan yığmaq, eləyir 2500 manat. Bu “sənətçi” də Elton Con olmadığı üçün ona 2 saat üçün 2500 manat verilməyəcəyi yüz faizdir. O mərasimdən olsa-olsa 200 manat alar ki, onda da papağını göyə tullayar. Demək, qalan pul kimin cibinə gedir? Tər-bi-yə-çinin...
Amma Kərəmi burda ağlamaq tutmur. Kərəm orda dəsmalını götürür ki, bu məlum rəzilliklə bağlı heç kim Təhsil Nazirliyinin yaratdığı “Qaynar xətt”ə müraciət etmir. Nə narazı şagird, nə də valideyn. Məsələ burasındadır ki, sözügedən xidmət anonim şikayətləri qəbul etmir. Bizim millət də, maşallah, pis kişi olmaqdan, camaatın çörəyinə baisçilik etməkdən dəhşət qorxur. “Bu dünyanı mənmi düzəldəcəm” kimi fəlsəfi yanaşmanı da bura əlavə etsəniz, heç kəs barmağını belə tərpətmək istəmir.
Digər tərəfdən, özünü və uşağını da düşünür. Zəng eləsən, gərək özünü təqdim edəsən, uşağın oxuduğu sinfi, nə bilim pul yığan müəllimin adını deyəsən, sonra nazirlik işçilərinin iştirakı ilə rəhbərliklə üzləşəsən... Lənət şeytana. Qabaqdan dağ kimi buraxılış imtahanı, attestat alma mərasimi gəlir. Bunun qabağında hansı oğul duruş gətirə bilər? Eşitsələr ki, şikayət edilib, o 25 manatın onqat artığını valideynin canından çıxaracaqlar. Odu ki, “25 manat başımın-gözümün sədəqəsi olsun” deyib, bu rəzilliyə eyvallah deyirlər.
Təsəvvür edin, durumdan narazı olan, az-çox vicdan sahibi müəllimlər də dillənə bilmir. Onların da məntiqi Azərbaycan sayağıdır. “Filan qədər verib, məktəbə düzəlmişəm. İndi bu bəhanəylə çıxararlar”, “Demaqoqluğum direktorun qulağına çatsa, mənə gələn il əməlli-başlı dərs saatı verməyəcək, ”okno"lara salacaq". Bir sözlə, valideyn dinmir, müəllim susur, uşaq zatən ağciyər olub. Jurnalistin sözünə də ki, maşallah, güvənən yoxdu. Yuxarı tüpürürsən bığ, aşağı tüpürürsən saqqal. Odu ki, millət tüpürməməyə qərar verib. Sözünü, etirazını udduğu kimi tüpürcəyini də udur.
Nəticədə bazar başlayıb, nə başlayıb! İndi məktəb direktorları restoran müdirlərinin gününə düşüb. Manıslarla anlaşan kim, bir saat oxumaları üçün “qiymət öldürən” kim. Deyir, gözəl ağa gözəl idi... Onsuz da məktəblərimiz bu günə qədər məktəbdən başqa nəyə desən oxşayırdı. Bazar, xəstəxana, tövlə... İndi də oldu restoran. Bundan sonra orda “ulduz yağışı”nın da şahidi olacaqsız. Manısların biri gələcək, o biri gedəcək. Məktəb direktorları dönüb olacaqlar prodüser. Çalıb-oxuyanlarla o qədər səmimiləşəcəklər ki, bundan sonra onlarçün toy da “tutacaqlar”, reytinqlərini artırmaq üçün şou proqramlara çıxıb qalmaqal da qoparacaqlar.
Bir sözlə, tamaşa qabaqdadır. Sizə uğurlu seyrlər...

628 dəfə baxılıb