ÜRƏYİ YANAN, GƏL BƏRİ!

	03 sentyabr 2010


Onlayn ictimai-siyasi qəzet

Sevinc TELMANQIZI

ÜRƏYİ YANAN, GƏL BƏRİ!

Bilmirəm, havalar istiləşəndən şəhərin mərkəzinə çıxmısınız, ya yox. Çıxsanız, mütləq özünüzlə içməli su götürün. Gün-gündən bizi təəccübləndirən Bakımızın gözəlliyi qarşısında bayılandan sonra içmək üçün yox ha. Sadəcə, normal insan kimi su tələbatınızı ödəmək üçün. Neyçün ki, bu şəhərin su alveri ilə məşğul olan şəxslər də birər yeziddirlər. Dilini ağzında yandırarlar, amma su üçün elə qiymət oxuyarlar ki, cızdağın çıxar.

Adətən nəyinsə çox ucuz olduğunu göstərmək üçün “sudan ucuz” ifadəsi işlədirlər ha, bax o ifadə bizim dövrümüzlə heç səsləşmir. Neyçün ki, artıq su qızıldan da, neftdən də baha olma yolunda irəliləyir. Yay gələn kimi şəhərin su təchizatına fikir verin: qəsəbələr, rayonlar, məhəllələr qan ağlayır. Bir həftə bir məhəlləni susuzluqdan qırırlar, o biri həftə digərini. İnsanların vedrə-vedrə su daşımaqdan beli əyilib. Onsuz da dolanışıq xərciylə beli ikiyə bükülən Azərbaycan insanını indi də bu cür imtahana çəkirlər.
Keçək içməli suya. Hərçənd bizdə içməli suyun hansı keyfiyyətdə olması da özü boyda şübhə doğurur. Nəsə, ötən gün bir sadəlövhlük edib, şəhərin mərkəzinə çıxdım. “Torqovı” adlanan küçədə bir qədər dolaşdım, mağazaları gəzdim. Və təbii ki, bütün normal insanlar kimi susadım. Elə həmin küçənin su satıcılarına yanaşanda ayağımın altından yer qaçdı. Yarım litr təmiz su sizcə, neçəyə olsa yaxşıdır? Yəqin, bilirsiniz, üzərində də 20 qəpik yazılıb və bütün normal, özünə hörmət qoyan marketlərdə həmin qiymətə satılır. Amma nə danışırsınız? Burası “Torqovı”. Burda su belə adi deyil, içində qızılı, brilyantı, nə bilim gümüşü var. Bu küçədən su aldınsa, orqanizmindəki bütün xəstəliklər dərhal sağalır, əhvalın düzəlir və sair və ilaxir. Və hörmətli oxucu, bu cür su adını çəkdiyim küçədə 40-60-70 qəpiyə satılır. Kiçicik bir monitorinq keçirin, mən deyənə əmin olacaqsınız.
Hələ bu harasıdır? Birdən çaşıb, uşaqlarınızı Quala Park (Zorge bağı yaxınlığında) adlanan əyləncə məkanına apararsınız ha... Onda da özünüzlə ən azı 2 litr su aparın. Demək, bir ətək pul verib, uşağı həmin parka salmağın, adi parklarda 20-25 qəpik olan yelləncəklər üçün 80 qəpik ödəməyin az deyilmiş kimi, kafedə də səni bəs deyincə “qazlayır”lar. Adını çəkdiyim bu məkanda bir stəkan su nə az, nə çox düz 2 manatdır, əziz oxucu! Təsəvvür edirsiniz ki, 250 qram su tutumu olan bakalı adama 2 manata sırıyırlar. Halbuki yarım litr suyun qiyməti marketlərdə 20 qəpikdir. Uşağa suyu 20 dəfə baha satırlar. Azərbaycanlıların uşaqcanlı olmasını, övladları üçün hər şeydən keçdiyini bilən işbazlar bundan bəs deyincə istifadə edirlər. Demək, uşaq susuzluqdan özünü yerə sürtür, sən də bu məkandan çıxıb, başqa yerdən daha ucuz su ala bilmirsən. Çünki elə təkcə içəri giriş üçün 3 manat ödəmək lazımdır. Çıxıb yenidən içəri girmək adama 3 manata başa gəlir. Odu ki, suyun süzülə-süzülə həmin bahalı sudan almalı olursan. Uşağını yezid kimi susuzluqdan öldürməyəcəksən ki?
Hələ bu market siyasətinə nə deməli? Demək, girirsən marketə - su 20 qəpiyə satılır, amma bəziləri qəsdən içəridəki suyu soyuducuya yox, piştaxtaya düzürlər. “Sərini yoxdurmu” sualına isə “marketin bayırında satılır” cavabını verirlər. Çıxırsan bayıra, su birdən-birə olur 30-40 qəpik. Bir addımda suyun qiyməti 2 dəfə bahalaşır. Səbəbiylə maraqlananda da məlum olur ki, sən demə, burda yer haqqı bahaymış, filan qədər icarə haqqı ödəyirlərmiş, bunların da balası nəyləsə dolanmalıymış və sair və ilaxir. Tanış azərbaycançılıqdı, deyilmi?
Adam danışdıqca ürəyi partlayır. Bir stəkan su olsaydı, içərdik. Amma ucuzundan...

681 dəfə baxılıb