1 MANATI QAYTARIN! | Yeni Müsavat

	25 may 2012


Onlayn ictimai-siyasi qəzet

Şahvələd ÇOBANOĞLU

1 MANATI QAYTARIN!

Məni təəccübləndirən odur ki, nədənsə Goranboy rayon təhsil şöbəsi müdirinin seyfindən 2 milyon manatın tapılmasını çoxları gözlənilməz hadisə kimi qarşıladı. Adamlar heyrətlə danışırlar. Pulun miqdarı da əksəriyyətə çox görünür. A kişilər, siz indiyədək harada yaşayırdınız? Məgər Norveçdən köçüb gəlmisiniz! Bəlkə səyyah Tur Heyerdalsınız? Allahın Eskuderosunu dindirsəniz, o bu pulun çox olduğunu söyləməz. 2 milyon nə puldur ki?!

Yorulmadan yazdığım bir fikir var. İşə bax ki, bizim ölkədə universitet rektorları da oliqarxa çevrilib. Dünyanın heç bir yerində belə şey olmur. Elə bil, bunlar da neft hasil edirlər, ya da bina tikirlər, yaxud kolbasa satırlar. İndi adi orta məktəb direktoru vəzifəsinə də pul verib gedirlər. Çünki yaxşı gəlir yeridir. Təhsilin belə iyrənc vəziyyətdə olduğu az sayda ölkə tapa bilərsiniz: Azərbaycan, Özbəkistan, Tacikistan və s. Hətta Afrikada təhsilin çox zəif olduğu ölkələrdə də bu qədər çirkab yoxdur. Məsələ ondadır ki, artıq bizdə rayon təhsil şöbələrinin müdirləri də oliqarxa çevrilirlər.
Təhsil müdirinin seyfindən çıxan pulların mənbəyi və təyinatı üzrə çox fikirlər yazıldı. Baş sındırmağa, özünüzü yormağa dəyməz. 2 milyon manatı rayondakı şagirdlər və müəllimlər arasında böləndə orta hesabla adambaşına 30 manat düşər, ya düşməz. Məgər hər rüb ərzində şagird və müəllimlərdən bu qədər pul yığılmır? Süpürgə pulu, təmir pulu, kitabçalar və dəftərlərin satışı, hədiyyələr, tədbirlərlə bağlı yığılan pullar. Dərs saatı artıq verildiyinə görə müəllimlərdən hər ay geri alınan pullar, keçilməyən dərslərin pulları və s. O qədər mənbə var ki!
Hətta 2 milyon manat azdır. Bəs qalan pullar hanı? Mənim gümanıma görə, azı 1 milyon çatmır. İldə orta böyüklükdə bir rayonda hər rüb azı 3 milyon manat yığılır. Heç təəccüblənib-eləməyin. Düzdür, bu pullar başqa yağlı nazirliklərin “qazancının” yanında doğrudan da azdır, amma elə də pis deyil, Allah bərəkət versin.
Adətən biz bu mövzudan yazanda bizə irad tuturlar ki, fakt söyləyin. Faktın buynuzu olmur ki?! Ya da onu Təhsil Nazirliyinin yanındakı “Yaşıl bazar”dan alası deyilik ki... Misir müəllim “Yaşıl bazar”a alverə getməyi sevir, orada ucuzluqdur deyə. Amma özünün rəhbərlik etdiyi yaşıl bazardan heç söhbət açmır. Düzdür, indi yaşıl pul (dollar) dəbdə deyil, amma sonda manatı da yaşıla çevirirlər. Fakt isə ortadadır - seyfin içində. Bəzi şərhlərə görə, təhsil şöbəsi müdirinin seyfinin açılmasının səbəbi Misir Mərdanovla baş prokuror Zakir Qaralovun arasındakı ədavətlə bağlıdır. Bu da faktın dəyərini kiçiltmir. Misir Mərdanov da bacarır Goranboy rayon prokurorunun seyfini açdırsın. Görək oradan nə çıxır. Amma 2 milyon fakt olaraq qalır.
Daha bir fakta qayıdaq. Ötən həftə məktəbli kitabçaları (gündəliklər) bağlı bir araşdırma aparmışdıq. Bəlli oldu ki, şagirdlərə 1 manata satılan gündəliklər 20 qəpiyə başa gəlir. Onların üstündə tirajı və qanunun məcburi saydığı digər buraxılış məlumatları yoxdur. Bu kitabçalar məktəblərdə məcburi şəkildə, heç bir qəbz verilmədən satılır. Məktəb alverxanaya çevrilib. Məktəbdə də alver olar, məgər ora dükandır? Xatırladaq ki, məktəblərdə məcburi satılan bu cür kitabça, test və iş dəftərlərinin sayı isə hər il artır. Onların heç biri məktəbliyə lazım deyil. Hətta müəllim üçün metodik vəsaitlərin pulunu şagirdlərdən yığırlar.
Bəs niyə gündəliklərlə bağlı araşdırmaya heç bir qurum reaksiya vermədi? Hüquq-mühafizə orqanları da susdu, nazirlik də. Onda heç olmazsa bizim 1 manatımızı qaytarın. Axı bu ildən şagirdlərə gündəlik qiymət yazmaq da ləğv edilir. Şəxsən mən 1 manatımı geri istəyirəm. Onu Zimbabvedə təhsilin inkişafı fonduna köçürməyi düşünürəm.

1000 dəfə baxılıb