SAĞLIĞINDA KOR FATMA...

	03 sentyabr 2010


Onlayn ictimai-siyasi qəzet

Sevinc TELMANQIZI

SAĞLIĞINDA KOR FATMA...

Bilirəm, ölənin dalınca danışmazlar. Amma bütün dünyanın danışdığı mövzuda mən niyə susmalıyam ki? Danışmaq pis şeydisə, qoy hamı sussun. Pop kralı, əfsanəvi ulduz, sirli, mübhəm şəxs... Maykl Ceksonun ölüm xəbərinin yaratdığı əks-səda hələ uzun müddət dünyanın mərkəzində olacaq. Eynən şahzadə Diana kimi. Qadının ölümündən 12 il keçib, amma vaxtaşırı bu ölümün səbəbi barədə bir xəbər, versiya çıxır. Eyni aqibət mərhum pop kralı da gözləyir.

Düzü, nə Maykl Cekson fanatı olmuşam, nə də evimdə onun qalaq-qalaq diskləri olub. Səsini də xüsusi olaraq bəyənməmişəm. Musiqisevərlərin, musiqi mütəxəssislərinin “səviyyəsiz, zövqsüz” sözlərini eşidir kimiyəm və vecimə də deyil. Zövqlər dartışılmaz. Xüsusən də səhnə plastikası tamam ətimi ürpəşdirib. O əcaib hərəkətlərinin (nəyi nəzərdə tutduğumu anladınız yəqin ki) müşayiəti ilə “vau” deyə bağırmağı yox idimi, onu eşidəndə elə bilirdim dədəmə söyürlər.
Bu yazını yazmazdan əvvəl səsli şəkildə müzakirə etdim yan-yörəmdəkilərlə. İlahi, necə radikal təpkilərlə üzləşdim? Ömründə bəlkə də bir dəfə onun diskini alıb, evində qulaq asmayan adamlar mənə onun dahiliyi, sənətkarlığı, nə bilim musiqisindəki, klipindəki yüksək estetika barədə yarım saat mühazirə oxudular. Hətta redaktorlardan biri hirslə “hə də, yarım milyard dollar borcu olan adamdan sən də bu köşəni yazmaqla qonarar qoparmaq istəyirsən” deyib, öz aləmində öldürücü zərbə vurmaq istədi. Amma yooox, keçəl suya getməz. Yazacam.
Mən Ceksonun varidatı, sirli həyatı, Ginnesin Rekordlar kitabına düşməsi, sensasiyalı həyatı, super rəqqas olması, albomunun satış rekordunu yaxalaması və sairi və ilaxiri çox gözəl bilirəm. Az-çox savadımız var, nələrisə oxumuşuq. Amma onu da bilirəm ki, bu adamın həyatında pedofilliklə bağlı silsilə məhkəmə prosesləri keçirilib. Bilirəm deyəcəksiniz ki, nəticədə bəraət alıb. Amma kimin o cür güclü vəkillər ordusu, balta kəsməyən pulu olsa, prosesi uduzardı? Sevdiyimiz o el məsəli ilə desək, od olmayan yerdən tüstü çıxmaz. Məncə, elə təkcə bu fakt yetərlidir ki, ona olan hansısa dərin hissləri səssiz-səmirsiz içinizdə basdırasınız. Necə deyərlər, özünə rəva bilmədiyini başqasına rəva bilmə. Sizinki baladır, başqasınınkı dovşan balası? Bunu edən istəyir ulduz yox, lap qosqoca planet olsun, fərq etməz.
Mən cəhənnəm, hərdən psixoloqların dediklərinə də bir qulaq verin. Adamlar özləri ağırlıqda kitablar yazıblar ki, fanatlıq əslində anormallıq əlamətidir. O konsertlərdə bağıran, özünü “lezvalayan”, ayılıb-bayılanlar var ha... Çoxlarının heç Cekson sənətindən xəbəri yoxdur. Birincisi, küyə düşürlər. İkincisi isə sadəcə, o boyda qələbəliyin içində bu yolla seçilməyə, diqqət cəlb etməyə çalışırlar. Yeniyetmələri bəlkə də müəyyən mənada anlamaq olar, onların şəxsiyyəti hələ formalaşmayıb. Bu bığlı-saqqalı kişilərin, kül-külfət sahibi arvadların isterikasını görəndə adamın əti tökülür doğrusu. Məncə, sənətçini bəyənib, onun yaratdıqlarına aludə olanda hərdən onun şəxsiyyətini də göz önündə bulundurmaq lazımdır.
Pop-ulduzun 500 milyon dollar borcu varmış, deyilənə görə. Bütün dünyanı sanki bu pulun dərdi götürüb. Halbuki elə ölümündən bircə gün sonra şəxsi əşyalarının hərracı zamanı 250 min dollar gəlir əldə edildi. Musiqi şirkətlərinin rəhbərləri iddia edir ki, bircə həftəyə kasetlərindən əldə edilən gəlir bu borcu tamamilə qapadacaq. Dedim axı, ömründə bir dəfə də onun diskini almayanlar indi cumuşublar musiqi marketlərə.
Düzdü, deyəcəksiniz, 3 milyard insan nə hayda, bu nə haydı? Amma bu olayda mənim ən çox diqqətimi cəlb edən məqam Ceksonun evində işləyən xidmətçinin müğənni ölüm ayağında ikən 911-ə zəng vurub, bu barədə məlumat verməsi, sonuncuların isə 7 dəqiqədən sonra hadisə yerinə çatmasıdır. 911-in görəvlisi ilə xidmətçi arasında yaşanan dialoq da dünya televiziyalarında nümayiş etdirilir, yəqin, izləmisiniz. Servisə bax, sistemə bax - adamın lap ağzının suyu axır. Zəng vurursan, gələnə qədər yolda sənə xəstəylə necə davranmağı məsləhət görür, ürək-dirək verir və bir göz qırpımında qapına çatırlar. Öləndə də belə öləsən də... Yoxsa bizimkilər kimi. Təcili Yardım gəlib qapıya çatınca xəstə yazıq canını tapşırır, onu da zorla morqa aparmaq zorunda qalırlar.
Nəsə, “kral” gəldi-gedərdi. Sizə qalan boz “manıslarımız” olacaq.

735 dəfə baxılıb