60 YAŞLI LƏTİŞ XALANIN SİQARET SEÇİMİ

	25 may 2012


Onlayn ictimai-siyasi qəzet

Şahvələd ÇOBANOĞLU

60 YAŞLI LƏTİŞ XALANIN SİQARET SEÇİMİ

Bir deputat var, adını yadımda saxlaya bilmədim, qazın bahalaşmasından sonra qeyri-adi təkliflə çıxış edib. Deyib ki, adamlar siqaret çəkməsin və siqaretin pulu ilə qaz xərclərini ödəsin.

Əsl millət vəkili belə olar. Axı xalqa bundan yaxşı yolu kim göstərə bilər? Dünyada hələ buna bənzər bir çıxış yolu tapılmayıb. Analoqu olmayan təklifdir. Nə əcəb bu təklif prezidentin fərmanına və yaxud parlamentin qərarına düşməyib? Mən təklif edirəm ki, siqaret çəkməyən kişilər, tək yaşayan qadınlar, qocalar təcili siqaret çəkməyə başlasınlar ki, heç olmasa gələn aydan siqareti buraxıb pulunu qaza verə bilsinlər. Məndə olan məlumata görə, dükanlarda siqaret alanların sayı artıb.
Bu gün 60 yaşlı Lətiş xala redaksiyaya zəng etdi. Dedi ki, siqaret çəkmək istəyir, amma bilmir hansını alsın. Mən də ona bir siqaret adı dedim, çox xoşbəxt oldu. Lətiş xala dedi: “Bala, sənə də, o deputat Nazim müəllimə də, qazın qiymətini qaldıran başbilənlərimizə də qurban olum, gələn aydan siqareti buraxıb pulunu qaza verəcəyəm”.
Elə Lətiş xaladan öyrəndim ki, bu dahiyanə təklifin müəllifinin adı Nazim müəllimdir. Onu heç öncəgörən yanına gedib-gələndən sonra siqareti elə qaza görə hələ martda atan Famil Cəfərli də tanımır, amma deyir ki, soyadı deyəsən, Məmmədovdur. Bilmirəm, siqaretə allergiyası olanların axırı necə olacaq?! Buna da bir çıxış yolu tapsaydılar, daha nə dərdimiz olardı. Deyirəm ki, başqa şey çəkənlər lap kefdədir, axı onlar o şeyə xeyli pul verirlər. İşin başını atsalar, hələ işıq pulunu, su pulunu da ödəyərlər. Əgər bahalaşma hər il bir neçə dəfə təkrarlanarsa, xalqımız bütün zərərli vərdişlərini, daha sonra o qədər də zəruri olmayan ehtiyaclarını unudar.
O gün mən də yazmışdım, Tacikistanın əbədi prezidenti İmaməli Rahmon xalqa müraciət edib ki, Həcc ziyarətinə getməsinlər və ziyarət pulunu ölkədə xeyriyyə işlərinə xərcləsinlər. Yoxsa ölkə batıb gedir. Şərq xalqlarındakı müdriklik indi əsl tərifə layiqdir. Yazıq qərblilər ona görə pis gündədir. Kim deyirsə ki, çıxış yolu yoxdur, səhv edir. Çıxış yolu da var, lider də, komanda da. Hələ o qədər atılmalı şeylər var. O ayaqyalın, dombagöz, səfil Sokrat çox qədim zamanlarda bazara getmişdi və söyləmişdi: “Bu dünyada nə qədər artıq şey varmış!”
Sokrat demişkən, hər il xalq bir şeyi atar, bir dəfə yeməyindən, bir dəfə içməyindən, bir dəfə də geyməyindən. Gərək Lətiş xala saçına xına qoya? Qoy telefon pulunu versin. Saç əgər ağarıbsa, ağ da görünməlidir.
Lətiş xala qaz pulunu ödəmək üçün siqaret axtaranda xəbər gəldi ki, qaz da artıq Neft Şirkətinə baxacaq. Xalq üçün nə fərqi var, xalq qaz pulu axtarır, bu pulu kimin yığacağının ona nə dəxli var. Başa düşürük, pul bir ələ cəmləşir və bunun bizə heç bir xeyri-şəri yoxdur. Amma neft və qaz artıq bir quruma aid edilirsə, Yanacaq və Energetika Nazirliyi nə üçündür? Bu məsələni hörmətli Mirvari Qəhrəmanlı qaldırıb. Düz və haqlı irada nə deyəsən! Yanacaq və energetika işinə Dövlət Neft Şirkəti baxırsa, nazirlik nə üçündür? Nazirlik varsa, şirkət nə üçündür?
Axı Nazim Məmmədov bunu niyə görməyib? Camaatın ağzında siqaretin artıq olduğunu görür, o boyda nazirliyin boşuna durduğuna fikir verməyib. Dərinə varanda bizdə parlament də artıq bir şeydir. Prezident olan yerdə və həmişə doğru qərarlar verdiyi halda parlamentə nə ehtiyac ola bilər? Qanunlar aparatda hazırlanar, orada da imzalanar. Daha çevik, daha asan! Bir də Çevik Polis Alayı!

1021 dəfə baxılıb