“İŞ YOLDAŞIM XƏSTƏXANADA HEPATİTƏ YOLUXUB”

	25 may 2012


Onlayn ictimai-siyasi qəzet

Şahvələd ÇOBANOĞLU

“İŞ YOLDAŞIM XƏSTƏXANADA HEPATİTƏ YOLUXUB”

Yaxud yenə əsgər meyiti gətirəcəklər

Daha bir əsgər meyiti gətirilib. Bu dəfə Astaraya. Bir o bəllidir ki, ölümlə bağlı cinayət işi açılıb, deməli, yenə də əsgər xidməti vəzifəsini yerinə yetirərkən yox, hansısa cəncəl situasiyada həlak olub.

Neyləyəsən?! “Daha bir əsgər meyiti” sözləri ilə dəfələrlə qəzetə baş yazı vermişik, dəfələrlə də eyni başlıq altında, sadəcə, xəbər dərc etmişik. Məndə artıq bir qorxu var ki, yaxın günlərdə yenə əsgər meyiti gələcək. Mən qorxuram ki, bu xəbər bizdən heç vaxt əl çəkməyəcək. Dəhşətlidir, əsgər ölümü xəbəri telefon oğurluğu xəbəri qədər adiləşib...
Əsgər əsgəri öldürür, əsgər komandiri öldürür, komandir əsgəri öldürür və s. Ağıla gəlməyənlər hadisələrlə rastlaşırıq. Nə baş verdiyini bir daha izah etməyə nə lüzum var?! Pul bu ölkənin gözünü kor edib. Deyirlər ki, eşqin gözü kor olur. Bizim ölkəni pul kor edib. Qazanmaq hərisliyi eşqə çevrilib. O isə istənilən məsuliyyətsizliyə, istənilən qanunsuzluğa, istənilən absurda yol açır. Başqa izaha ehtiyac qalmır.
Səfər Əbiyevi dəyişsək, vəziyyət dəyişəcəkmi? Sizcə, meyit gətirən bu sistem dəyişməsə, yaxşı nəticə ola bilərmi? Amma biz Səfər Əbiyevin də dəyişdiyini görmədik. Siyasi mövqe budur, kimin balasına nə olursa olsun, bunlara təsir etmir. Bunlara dəxli yoxdur. Yəni bu təkcə Səfər Əbiyevlik bəla deyil, həm də ona aid bir problemdir. Ondan yuxarı və aşağıya doğru bu cinayətləri var edən bir sistem var. Bu siyasi sistem, bu idarəçilik əsgəri sevə bilməz, onun üzərində əsə bilməz. Çünki pulu sevənlərin hakimiyyətidir.
Lakin məni düşündürən odur ki, cəmiyyəti bürüyən dərdlərin çarəsi tapılacaq bir meydanı hamı tərk edib və etməkdədir. Son illərin aparıcı düşüncələrindən biri bu olub ki, siyasət və ona qarışmaq ancaq dərd gətirir, bəladır, hamı da siyasətdən və siyasi tələblərdən daha uzaq durmağa çalışıb. Amma uzaq durmaqla deyil, dərd yenə də üstünə gəlir. Hamı övladını siyasi fəallıqdan qoruyur, amma onda da övladın meyiti başqa yerdən üstünə gəlir. Nəticədən danışanda isə ağır bir mənzərəyə şahidlik edirsən. Təkcə siyasi haqlar pozulmur, təkcə azadlıqlar məhdudlaşdırılmır, təkcə sənə də aid olan milli sərvətlər talan edilmir. Adamlar ölür, övladlar ölür...
Dünən hepatit virusunun Azərbaycanı bürüməsini yazmışdım. Xəstəliyin burada müalicəsi olmadığı üçün imkan tapanlar xaricə üz tutur. Avropanın tibb mərkəzlərində Azərbaycanda bu xəstəliyin geniş yayılması ilə bağlı bir həyəcan siqnalı qaldırırlar. Bu gün bir oxucu yazıb: “Siz nə yazırsınız? Xəstəxanalardakı vəziyyətlərdən nələr yazırsınız? Xəstəxanada hepatit C virusuna yoluxmuş iş yoldaşımla bağlı qəzetinizdə yazı getmişdi, bir səlahiyyətli isə maraqlanmışdı ki, vəziyyəti araşdıracaq. Amma onlar maraqlıdır ki, belə xəstələrin sayı çox olsun. Hörmətlə, Həqiqət”.
Bəli, həqiqətdir. Həmin diaqnozdur, dövlət qazanc vasitəsinə çevrilib, pul bütün sistemin gözünü tutub. Elə bilirsiniz ki, oxucu yalan deyir? 50 hamilə qadını bilərəkdən, yəni müalicədən pul qazanmaq üçün hepatitə yoluxduran həkimin hekayəsini bilirsiniz. Bu haqda çox yazmışıq, pul qazanmaq istəyən başqa orqanlar da bu işi cinayət kimi qeydə alıblar.
Yorğanı başınıza çəkin və rahat yatın. Amma heç vaxt əmin olmayın ki, daha bir əsgər meyiti xəbərini eşitməyəcəksiniz, yaxud hepatitə yoluxmayacaqsınız, ya da başqa bir bəla ilə üzləşməyəcəksiniz. Bəlamı yoxdur? Yorğanı qabağınıza qoyub fikirləşməyə ehtiyac yoxdur, yorğanı başınıza çəkin və yatın! Astaraya meyiti gətirilən əsgər sizin övladınız deyil ki...

1008 dəfə baxılıb