MİRMAHMUD BƏYİN EYNƏK SÖHBƏTİ

	25 may 2012


Onlayn ictimai-siyasi qəzet

Şahvələd ÇOBANOĞLU

MİRMAHMUD BƏYİN EYNƏK SÖHBƏTİ

Səmavi dinlərə və bir çox teokratik yanlı fəlsəfi doktrinlərə görə hər şeyi yalnız Tanrı bilir. Başqa sözlə, Tanrıya hər şey bəllidir. Amma çox nüfuzlu kommunikasiya nəzəriyyələrinə və elmi modellərə görə də hətta ən çox gizlədilən xəbər də gec-tez Bakıdan Qazağa, Qazaxdan Zaqatalaya çatacaq. Heç nə gizli qalmır. Xalq deyir ki, uzağı 40 gün çəkər.

Bunları həm də nəyə görə deyirəm. Bir də baxırsan, xırdaca bir səhvin də düzəlişi dərhal adamın üstünə qayıdır. Bugünlərdə “Azadlıq” radiosunda dəyərli həmkarlarımızdan birinə açıqlama verdim. Gənclərin həbsinə və hakimiyyətin öz rəqiblərinə qarşı apardığı mübarizə barədə suala cavab idi. Sonradan bu açıqlama haqda radionun saytında olan “Bunun adı siyasi repressiyadır” başlıqlı yazını oxudum, başa düşdüm ki, fikirlərimdə bir səhvə yol vermişəm. İnsan haqlarının pozulmasına və demokratiyanın durumuna görə Monqolustanın adını Azərbaycanla eyni sırada çəkmişdim.
Mən özüm Monqolustanda gedən demokratik dəyişikliklər barədə bir neçə dəfə yazmışam. Bu necə ola bilər? Mən bunu necə deyə bilərdim? Hətta radioya zəng edib dəqiqləşdirmək istədim. Amma vaz keçdim. “Ola bilər”- dedim. Amma elə bircə saat sonra oxuculardan məktublar almağa başladım. Monqolustan Azərbaycanla müqayisə oluna bilməz, Monqolustan demokratik seçkiləri olan, xeyli irəlidə olan bir dövlətdir. Bəli, tamamilə doğrudur, bütün oxuculardan üzr istədim. Hətta Monqolustandan üzr istəməyə hazıram. Eyni zamanda sevinirəm ki, oxucular çox diqqətlidirlər, onlar ölkəmizdəki durumun nə qədər ağır olduğunu anlayırlar.
Mən bu səhvimi anladım. Amma Klassik Xalq Cəbhəsi Partiyasının sədri Mirmahmud bəyin mənim gözlərimin zəifləməsi haqda fikirlərini heç anlaya bilmədim. Ötən yazımda mən Pənah Hüseynə sual vermişdim. Təbii ki, ritorik suallar idi, onlar cavab vermək hökmən tələb olunmur. Məsələ ondadır ki, millət vəkili Pənah Hüseyn bugünlərdə bəyan etmişdi ki, əgər Qarabağla bağlı Azərbaycanın mənafeyinə zidd, Qarabağın verilməsi ilə nəticələnəcək hansısa hadisə baş versə, buna görə İlham Əlıyevlə birlikndə İsa Qəmbər də məsuliyyət daşıyacaq. O mənada ki, bu gün sıyasi müxalifəti onun ən nüfuzlu lıderi olan İsa Qəmbər simvolizə edir. Axırıncı cümlə hörmətli Pənah bəyə məxsusdur. Mən də sual vermişdim ki, Pənah bəy doğrudan da İsa Qəmbəri ən nüfuzlu sıyasi lıder sayırsa, niyə özü İsa bəyin yanında deyil? Daha zəif tərəfdaşları nıyə seçib? Onların üstünlüyü nədir? Vəssalam.
Bundan sonra Mirmahmud bəy açıqlama verdi ki, “Şahvələd bəyin bızi zəif saymasının səbəbini onu görmə qabiliyyətində axtarmaq olar” . Bu sözləri heç cür anlaya bilmədim. Siyasətin çox dərin söhbətləri varmış. Belə çıxdı ki, problem mənim eynək taxmağımla bağlıdır. Açığı, mənim gözlərim son vaxtlar həqiqətən də zəifləyib, hətta eynək də taxmalı oluram. Amma anlaya bilmirəm ki, siyasi məsələlər mənim eynək taxmağımla, gözlərimlə necə izah edilə bilər. Odur ki, aydınlıq üçün Mirmahmud bəyə də suallar verməyə məcburam.
Hörmətli Mirmahmud bəy, mən İsa Qəmbərə simpatiyamı gizlətmirəm, kaş onun kimi bir lider bu ölkəyə rəhbərlik edəydi. Onun prezident olmasını üçün eynəksiz də səs verərdim. Siz də hörmətim olan bir şəxssiniz. Amma bilmirəm ki, sizin zəif olmağınız barədə mən harada və nə vaxt yazmışam. Axı bu məsələ mənim üçün prioritet mövzu olmayıb. İsa bəyin ən nüfuzlu siyasi lider olması fikrini isə həmin yazı çərçivəsində sizin müttəfiqiniz Pənah Hüseyn söyləmişdi. Deməli, onun sizdən güclü olduğunu da Pənah bəy demişdi. Mən ona etiraz etməmişəm. Ümumiyyətlə, mənim yazım güclü və zəif liderlər haqda deyildi. Mən də sadəcə Pənah bəyə sual vermişəm ki, ən güclü İsa bəyi hesab edirsinizsə, niyə onun yanında deyilsiniz. Mən bu ritorik sualı cəmiyyət üçün faydalı saydığım üçün vermişəm. Son günlərdə cəmiyyətin toparlanması yolları barədə çoxlu yazılarım olub və bu sual da tanınmış bir adamın timsalında hamıya yönəlib. Konkret götürdükdə isə hər şey Pənah bəyin etirafları üzərində cərəyan edib. Qəzəbiniz mənə çatmadı. Qətiyyən, acığa və qəzəbə demirəm, öz müttəfiqiniz sizi ən güclü hesab etmirsə, deməli, düşünməyə dəyər. Hər şeyi gözlərdə axtarmaq olmaz.

***

Tanrı hər şeyi bilir. Amma elə şeylər var ki, onları bəndələr də bilir. Üstəlik, elə şeylər var ki, bəndələr onları hökmən bilməlidir.

862 dəfə baxılıb