ŞƏN OĞLANLAR | Yeni Müsavat

	05 fevral 2012


Onlayn ictimai-siyasi qəzet

Sevinc TELMANQIZI

ŞƏN OĞLANLAR

Bilmirəm, onları televiziyada izləmisiniz, ya yox. İmkan varsa, bircə dəfə gözucu baxın. Bircə dəfə ha... Çox baxmaq insanın səhhətinə, özəlliklə də əsəblərinə ziyandır. Ev əhlinin tez-tez kanaldəyişmə xobbisi olmasa, bəlkə mən də bu “xoşbəxt”liyə çata bilməyəcəkdim. Nəsə, bəxtim gətirdi. Deməli, “Xəzər” televiziyasında Səbuhi adlı bir aparıcı “Sualım var” adlı layihəsi ilə paytaxtı, Azərbaycanın bölgələrini qarış-qarış gəzir. Öz aləmində dilxoşluq etməyə çalışır, camaatı söhbətə tutub, onların dərdini soruşur və sair.

Amma bu arada “krutoy oğlanlığın” barıtını çox eləyir. Bir də görürsən, qarşısındakının yaşını, kimliyini nəzərə almadan elə yekəbaş(bəli, məhz yekəbaş) “zarafat” edir ki, az qalırsan, əlini ekrandan içəri salıb, yaxasından silkələyəsən ki, bəlkə özünə gələ. Və paralel olaraq düşünürsən ki, görəsən, bu telekanalın böyüyü, eləcə də telekanallara nəzarət etməli olan böyüklər hara baxırlar? Qoy örnəkləri verim, mənzərə aydın olsun.
Demək, özünü şən, hazırcavab, “bomba” oğlan hesab edən bu aparıcı bir də görürsən, düşüb şəhərdəki parkların canına. Özəlliklə ağsaqqal təqaüdçülərin nərd oynadığı skamyalara yaxınlaşıb, onlarla söhbətləşməyə başlayır. Suallar da ki, səviyyəsizin səviyyəsizi. Əslində bəzi aparıcılarda, xüsusən yaşlı nəslin nümayəndələrini lağa qoyub, publikanı güldürmək azarı son illər populyarlaşıb. Təxminən Arif Quliyev modeli - yıxılır və ya kimisə yıxır, bununla kimlərisə güldürür. Bu Səbuhi qardaşımız da təqaüdçülərin pulu, necə dolanması, “bu dünyanın elə belə gəlib belə də getməsi” kimi dəhşət “gülməli” suallardan sonra onlarla sağollaşır və gedəndə son “bomba zarafatı”nı edir: “Salamat qalın, ağsaqqallar. Baaax, mən gedən kimi təpikləşməyəsiniz haaa...”
Və faciə təkcə bunda deyil. Həm də ondadır ki, bu təhqiri eşidən yaşlı kişilər də qəhqəhə çəkir. Demirəm, tutub Səbuhinin yaxasından silkələsinlər - onsuz belə etsələr də, bunu efirdə göstərməyəcəklər - heç olmasa, biri üzünü turşutsun, o biri başını bulasın, bir başqası əyri-əyri baxsın. Daha qəhqəhə çəkmək yox da, əmilər...
Qəhrəmanımız daha sonra yolunu Lənkərana salır. Çoxuşaqlılığın norma olduğu bu bölgədə də “mırt” hədəfi kimi ağbirçək bir qadını seçir, neçə uşağı olduğunu soruşur, ikirəqəmli bir nəticə eşidib, anası yaşında qadına bax belə cavab verir: “Rəhmətlik ərin heç boş dayanmayıb ki...Ay halal olsun hər ikinizə!"
Bu kadrları görəndə istər-istəməz rəhmətlik Barış Mançonun ruhuna dua oxumadan keçə bilmirsən. Rəhmətlik “40 gündə devri-aləm” adlı verilişlə dünyanı başdan-ayağa gəzir, 7-dən 77-yə hamını öz dili ilə dindirirdi. Amma bir dəfə də olsun, kimisə zarafatıyla rəncidə etdiyini, aşağıladığını görməmişdim. Bizimkilər elə bilir, əlinə mikrofon götürüb, küçələrə düşmüsənsə, camaata ağzına gələni deyə bilərsən.
Həm də bu Səbuhi tək olsa, dərd yarıdır. Elə həmin kanalda özü kimi birisi də var - Zaur. “Burc FM”də, Xəzər TV-də də veriliş hazırlayır. Yaşlı adamlara “filankəs kişi” deyib, özünü dəhşət hazırcavab hesab edənlərdən biri də odur. Tutaq ki, studiyaya bir xanım zəng vurub, özünü təqdim edir - Gülnarə xanım. “Mədəniyyət abidəsi” olan aparıcı dərhal dinləyicinin ağzından vurur: “Siz nə vaxt xanım olduz elə?” Müzakirəyə qoyduğu suallar, mövzularsa içlər acısıdır, inanın. “Yaş 70-i keçibsə kişi neyləməlidir?”, “Arvadın yaxşısı necə olur”, “Nəyiniz var, nəyiniz yox” kimi beldən aşağı, səviyyəsiz cavablara rəvac verən belə verilişin insanı necə qıcıqlandırdığını təsəvvür edə bilərsiniz. (Oxucu bu yerdə “əsəbləşirsənsə niyə baxırsan, niyə dinləyirsən” deyə sual verirsə, deyim ki, məcburiyyətdən - avtobus sürücüləri radio dalğasını dəyişmədiyi kimi, evdəkilər də pult hakimiyyətini əldən vermirlər. Digər tərəfdənsə, yaxşının qədrini bilməkçün hərdən pisə də baxmaq lazımdır-S.T.)
Bir dəfə kaman ustası Habil Əliyevə “Deyəsən, ipini arvadın əlinə vermisən ha...” deyib, öz aləmində super zarafat etmişdi ki, hər dəfə yadıma düşəndə gülməkdən gözlərim yaşarır.
Amma dəhşət orasındadır ki, bu verilişlər yayımlanmaqda davam edir, reklam alır, aparıcıları öz səviyyəsizlikləri ilə pul qazanır və camaat da onlara BAXIR. Çıxaq küçəyə, rastlaşdığımız 10 nəfərdən Zauru və Səbuhini, eləcə də həbsdəki redaktor Qənimət Zahidi, Eynulla Fətullayevi soruşaq. Mən ölü, siz diri. Camaat sonuncuları tanımayacaq...
Bax, Kərəmi məhz bu yerdə ağlamaq tutur. Dəsmallarınızı çıxarın!

1325 dəfə baxılıb