ANTİVİRUS PROBLEMİ | Yeni Müsavat

	14 mart 2010


Onlayn ictimai-siyasi qəzet

Şahvələd ÇOBANOĞLU

ANTİVİRUS PROBLEMİ

Hepatit virusu mövzusu bir az da böyüdü. Bakı sakini Arzu Abdüləzizovaya bəzi klinikalar hepatit diaqnozu qoyub, bəzilər yox. Vətəndaşın əlində möhürlü, imzalı müayinə sənədləri var. Bəs indi necə olsun? Biz kimə inanaq - “var!” deyənlərə, yoxsa “yox!” yazanlara?

Arzu Abdüləzizova özü uzun bir dramadan sonra o qənaətə gəlib ki, bu xəstəliyə yoluxmayıb. Təbrik edirik. Mən isə bu klinikalardan hansına inanacağımı bilmirəm. Necə inanmaq olar?! Sidiyə oxşayan məhlul üzərində sidik analizi aparıb nəticə yazan bu mərkəzlərə necə inanasan?
Hippokrata and içməyə nə var axı, kimdir bu Hippokrat?! Heç peyğəmbəri də görməyib. Bizim həkimlərin böyük əksəriyyəti görücü Zirəddinə Hippokratdan daha çox inanır. Düzdür, bizim camaatın bir az oxumuş qismi həkimlərdən narazılığını bildirən kimi bu adı yada salırlar: “Axı siz Hippokrat andı içmisiniz!”
Rahat qoyun bu kişini, başınızı qaldırıb konstitusiyaya və Qurana and içənlərə baxın. Bundan sonra Hippokratı sayan olar?! Bir də ki, andla dövlət, səhiyyə qurulmur. Bunlar simvolik məsələlərdir. Hanı bu ölkədə saat kimi işləyən idarəçilik sistemi? Yoxdur, çünki pul bütün sahələrdə idarəçilik sistemini və idarəçiləri kor qoyub. Aşağı yığıb yuxarı ötürür. Bundan sonra nəzarət necə ola bilər? Mən sənə pul ötürürəmsə, sən mənə necə nəzarət edə bilərsən? Məndən nə tələb edə bilərsən? Bütün sahələrdə belədirsə, səhiyyədə necə fərqli ola bilər? Bu, hər şeydən öncə siyasi məsələdir.
Problemin kökü yalnız səhiyyə ilə bağlı olmadığı kimi, özəl klinikalarda da deyil. Onlar da pis-yaxşı manevr edib pul qazanmağa çalışır. Bu klinikalar ya imtiyazlı sahibkarların, rüşvətxor bürokratiyanın mülküdür, ya da öz dövrünə uyğunlaşıb pul mövsümündən xeyirlə çıxmağa çalışanlarındır. Ciddi dövlət nəzarəti, ədalətli tələblər və yoxlamalar, rəqabət və azad sahibkarlıq üçün imkan isə yoxdur. Odur ki, sidik olmayan məhlul üzərində sidik analizi aparıb nəticə yazırlar. Hamı ortada pulunu qazanır. Bir sözlə, Hippokratı hərləyib-eləyən yoxdur, pul bizim ölkədə səlahiyyətləri, ağılları, könülləri və vicdanları işğal edib. Ölkə korrupsiya və rüşvət birjasına oxşayır.
Bəzən belə yazılardan sonra bizə deyirlər ki, haqsızlıq etməyək, axı bizdə yaxşı həkimlər də var. Axı bunu kim inkar edir? Əvvəla, çox azdır, üstəlik yaxşı səhiyyə yoxdur. Hippokrat özü indi Azərbaycanda yaşasaydı da xeyri olmazdı, ya rəislərin əlindən cana doyub qaçmışdı, ya da haradasa oturub cərrah bıçağı ilə pul kəsirdi.
Hepatitə gəldikdə, bir şeyi təkrar olaraq demək istəyirəm. Hazırda Avropanın tibbi mərkəzlərində Azərbaycandan gələn hepatitli xəstələrin çoxluğuna görə bir həyəcan var. Azərbaycanda bu xəstəliyi müalicə edə bilmirlər, amma indi bəlli olur ki, heç onu aşkar da edə bilmirlər...
Özbəkistanın dünya lideri olması yalandırmı?
Maraqlıdır, dünən eyni məzmunlu 3 oxucu məktubu almışam. Bu məktublarda məni qınayırlar ki, niyə ümumi daxili məhsulun artım sürətinə görə Özbəkistanın dünyada birinci yerə çıxması barədə yalan yazmışam. Guya bu yazıda mən ironik üsluba aşırı aludə olmuşam və yalan xəbər yaymışam. Mənə sual verirlər ki, bu xəbər doğru olsaydı, onu birinci olaraq iqtisadçılar yazmazdımı. Heç dəxli var?! Azərbaycan ÜDM-in artım sürətinə görə dünyada birinci olanda heç kim şübhə etmirdi. Hətta bu fakta ironiya ilə yanaşan bizlər də demirdik ki, bu, yalandır. Bəs Özbəkistan niyə birinci ola bilməz?
Əziz oxucular, bu, yüzə-yüz doğru məlumatdır. Bəli, Özbəkistan ÜDM-in artım sürətinə görə dünyada birinci yerə qalxıb. Azərbaycanı iki dəfə geridə qoyub. Onu da xatırladım ki, burada təəccüblü heç nə yoxdur. Bu göstərici adətən ən geridə qalmış ölkələrdə yüksək olur. Çünki bu göstərici adambaşına düşən ÜDM, ÜDM-in ümumi həcmi, yaxud adambaşına düşən milli gəlir demək deyil, sadəcə, məhsul artımının keçən ilkinə nisbətən artım faizidir. Bu ölkələrdə ÜDM o qədər azdır ki, bir xırda zavod qurmaqla ÜDM-in ötən ilkinə görə artımı xeyli irəli gedir. Amma inkişaf etmiş ölkələrdə ÜDM-in həcmi çox böyükdür, nə qədər zavod açmalısan ki, onun artımı azacıq irəliləsin. Yəni Özbəkistana inanın! Elə hepatitə də!

602 dəfə baxılıb