HADİSƏ DANIŞANDA | Yeni Müsavat

	05 fevral 2012


Onlayn ictimai-siyasi qəzet

Sevinc TELMANQIZI

HADİSƏ DANIŞANDA

Bir-birinin ardınca iki “Eurovision” qalibinə əxlaqsız təklif edilməsindən xəbəriniz var yəqin ki. Öncə beynəlxalq müsabiqənin azərbaycanlı mükafatçısı Aysel Teymurzadəyə “gəl nikahsız birgə yaşayaq”, ardınca Türkiyə təmsilçisi Hadisəyə “baş-başa yemək yeyək” təklifindən danışıram. Hər iki təklif müəllifi Bakıdadır və ilkin ehtimallara görə, eyni adamlardır. Neyçün ki, ilk baxışda bu söhbət eyni adamın “tutar qatıq, tutmaz ayran” taktikasına oxşayır. Niyəsini izah edim.

Hər iki xanım qosqoca müsabiqənin uğurlu iştirakçılarıdırlar və xarici görünüşləri ilə kifayət qədər diqqət çəkirlər. Bizim varlı-hallı məmurların, habelə məmur balalarının məşhur qadın azarı da ki göz qabağında. Artıq onlara sərvətlərinin, imkanlarının sərhədsizliyi, neft quyularının fontan vurması barədə danışılan əfsanələr bəs etmir. Qadın kolleksiyaları da bol və məşhurlardan ibarət olmalıdır ki, şöhrətlərinə şöhrət gəlsin.
Girişdə də dediyim kimi, hər iki faktın Azərbaycanda baş verməsi təsadüf deyil. Çünki məmləkətimizdə əksər oliqarx, məmur balalarıyçün bütün bağlı qapılar pulla açılır. Eləcə də şou-biznesin məşhur qadınlarının ürəyinə gedən yoldakı qapı. Bir nazirlə eşq macərası yaşayan müğənninin sonradan onun oğluna “könül verməsi” kimi dosyelər də məhz bizdə yaşanıb. Məmur-müğənni, məmur oğlu-aktrisa... cütlüklərinin bizimki kimi ölkələrdə geniş yer açmasınınsa bir səbəbi var: ələbaxanlıq. Mövzunu akademik yönə salmaq istəmirəm, amma bu ölkədə müğənni də hətta sənəti ilə normal pul qazana bilmir. Çünki şou-biznesin eləcə adı şou-biznesdir; burda şounun yox, başqa şeylərin biznesi xod gedir. Bədbəxt Rəqsanə illər əvvəl cahilliyinə salıb “üzdə olan bütün müğənnilər sponsorların hesabına klip çəkdirir, disk çıxarır” deyən kimi həmkarları onu hoydu-hoyduya götürdülər. Özlərini elə apardılar ki, guya bunlar süddən çıxmış ağ qaşıq imişlər, bahalı-bahalı disklərini dədə pulu ilə çıxarır, kliplərini disklərinin qonararından əldə etdikləri vəsaitlə çəkdirirmişlər. Heç uzağa getmirəm: təkcə Hacı Məmmədov olayı bizə göstərdi ki, bu şou biznesin çirkin üzü necədir. Adi polis polkovnikinin də əlinə beş qəpik pul keçəndə fikirləşir ki, mən niyə məşhur bir qadınla əlaqə yaratmayım, şəkil çəkdirib kolleksiyama qatmayım.
İmkanınız olanda maraqlanın: üzdə olan bütün qadın müğənnilər gözəllik salonu, nə bilim hansısa obyekt sahibləridir. Bu ölkədə illərin biznesmenləri rüşvət-korrupsiya tələsinə görə kiçicik bir budkanı saxlaya bilməyib iflasa uğrayırlarsa, yumurtasından təzəcə çıxmış bu qızcığazlar nəyin hesabına baş dolandırırlar? Hələ mən onların qonşu bağrı çatladan bahalı maşınlarını, bahalı nömrələrini demirəm. Deməli, burda da bir hadisə var da.
Amma bütün hallarda hər iki xanıma - Ayselə də, Hadisəyə də qosqoca bir “afərin” düşür. Neyçün ki, xanımlar ilk növbədə bir çox həmkarları üçün başgicəlləndirən xarakterdəki təkliflərdən imtina ediblər. İkincisi, bu təklif xəbərlərini tirajlayıb, həmin adamları (ad çəkməsələr də) biabır ediblər, sevdiyimiz ifadəylə desək, sındırıblar. İlin-günün bu vaxtında hələ özünü təsdiqləmə yolunda olan iki gənc xanımın bu cəsarətli addımını sadəcə, alqışlamaq lazımdı. Ümid edək ki, sözügedən olay milli “manıslarımıza” da bir örnək olsun, yeni bir ənənənin əsasını qoysun. Lazımi məqamda “yox” deyə bilmə ənənəsinin ən azı..
Bilənlər bilir, bilməyənlərə də o məşhur lətifəni mən danışım. Deyilənə görə, 15-16 oktyabr hadisələri ilə bağlı keçirilən məhkəmə proseslərindən birində yalançı şahid “bir qatıq banka”nı yerə dağıdıb. Belə ki, prokuror şahiddən “hadisə necə oldu” deyə baş verənləri danışmasını istəyib. Sonuncu da bilmirəm ya qəsdən, ya da keyliyindən qayıdıb ki, “vallah, mən heç nə bilmirəm. Bir də gördüm, hadisəni maşına qoyub apardılar”.
İndi onun sözü olmasın, hadisə (həm ümumi, həm də xüsusi isim mənasında) yaman təhlükəli şeydi. Və əsas odu ki, bu dəfə onlardan müğənni olanını maşına qoyub apara bilmədilər. Yoxsa lap biabır olardıq. Özü də iqtidardakılar demiş, analoqu olmayan şəkildə.

1338 dəfə baxılıb