AÇARSIZ AÇIQLAMALAR...

	30 iyul 2010


Onlayn ictimai-siyasi qəzet

Sevinc TELMANQIZI

AÇARSIZ AÇIQLAMALAR...

Biz onları ürəklə «media kapitanları» adlandıranda nə biləydik ki, gün gələcək, elə həmin bu media gəmisinin piratlarına çevriləcəklər? Əslində mövzunu tamamilə qapadıb, iqnor siyasəti yürütmək olardı. Jurnalistin 5-10 manatını da ondan əsirgəyib, «kserokopiyaya», şəraba xərcləyən media «bilicilərinə» bundan artıq nə deyəsən? Yəni biz susur, fakt özü danışırdı. Amma neyləyəsən ki, bunlar susmurlar və danışdıqca da...

Bu mövzuda bir dəfə yazıb, əslində ürəyimi boşaltmışdım. Amma sonra «Media açarı» mükafatının təsisçisi, «Yeni Nəsil»in sədri Arif Əliyev arqumentsizlikdən (bunu «cığallıqdan» kimi də oxuya bilərsiniz) qayıdıb dedi ki, bəs ay camaat, xəbəriniz olsun, «Azadlıq»ın baş yazarı Qənimət Zahidi məhz «Yeni Müsavat»a verdiyi açıqlamaya görə tutublar. Hənək, hənək, axırı dəyənək... Bu işin içində olmasaq, bütün söhbətləri qulağımızla eşitməsək, bəlkə də başımızı müdrikcəsinə bulayıb, «fikir ver ey, gör biz nə etmişik?» deyə özümüzü qınaya bilərdik. Axı məhz Arif Əliyev Qənimət bəy həbs olunanda «Azadlıq» qəzetinin yazdığı son məqalələrin hakimiyyəti necə qəzəbləndirdiyini öz diliylə, bizim redaksiyada demişdi. Xatırlayırsınızsa, baş yazar həbs olunmamışdan bir müddət qabaq «Azadlıq»ın manşetində baş prokuror Zakir Qaralovun oğlunun «Azadlıq» meydanında avtoşluq etməsi ilə bağlı məqalə və fotolar yer almışdı. Və içi Arif Əliyev qarışıq çoxları deyirdi ki, onsuz da «Azadlıq»ın əlindən zəncir çeynəyən hakimiyyət üçün bu material bir təkan oldu. Elə həmin gündən media camiyəsində səksəkəli bir əhval vardı, Qənimət Zahidin həbs olunacağı əndişəsi hamını bürümüşdü.
Onu da çoxları xatırlayır ki, sözügedən materialın dərc olunmasından qısaca müddət sonra Sevgiladə-Vüsal cütlüyünün «Azərbaycan» nəşriyyatı qarşısında «qısqanclıq dolu, atəşli məhəbbət səhnələri» yaşandı. O Sevgiladə ki, hələ də şəkli polis şöbələrinin önündə «axtarılanlar» siyahısındadır, o Vüsal ki, hadisə baş verən vaxt barəsində şərti cəza hökmü qüvvədə idi və hər ikisi polisçün «açanda əlində, yumanda ovcunda» olan personalara çevrilmişdi. Yəni, doğrudanmı hörmətli Arif müəllim bütün bunları «unudub»? Yoxsa bunun sistemli bir polis əməliyyatı olduğunu bilməyəcək qədər sadəlövhdür? Yox, əsla, haşa, mən Arif Əliyevi heç vaxt sadəlövh adlandıra bilmərəm, heç unutqan birisi də deyil. Sadəcə...
Hə, onda belə çıxır ki, Eynulla Fətullayevi də biz tutdurmuşuq, Mirzə Sakiti də, Müşfiq Hüseynovu da. Sonuncuya əməliyyat qurub, əlinə rüşvət verən də biz olmuşuq, Xocalı qaçqınlarını «Gündəlik Azərbaycan» qəzetinin üstünə qaldıran da, Tatyana Çaladzeni hardansa eşələyərək tapıb, Eynullanın üzünə qoyan da. Cümlə xəyanətlərə bais «Yeni Müsavat»mış sən demə... Türkiyənin məşhur MFÖ qrupunun çox sevdiyim bir mahnısı var, nəqərat hissəsində deyir ki, «sən nəymişsən bə abi...» Həqiqətən də biz nəymişik?
Eyni məntiqlə biz də deyə bilərik ki, «Yeni Nəsil» sədrinin tez-tez monitorinq keçirib, sonra da jurnalistlərin «qeyri-peşəkar», «tərəfli», «qərəzli» olması barədə ortaya qoyduğu «faktlar» jurnalistlərin həbsinə rəvac verib. Bəli, bəli, siz ortaya «fakt» qoyursuz, hökumət də həvəslənib tutur, sonra da deyir ki, «tərifləyib göyə qaldırdığınız təşkilatlar da sizin qeyri-peşəkar olduğunuzu deyir və türməni haqq edirsiniz». Necədi, xoşunuza gəldi?
Özü də maraqlı nədi, bilirsiniz? Adamlar hesab edir ki, bunlara hər şey olar. Yəni bizim adımıza milyonlarla dollar qrant da ala bilərlər, onu yeyib üstündən su da içə bilərlər, qəzet çıxarıb, sonra işçilərinin pulunu aylarla gecikdirə də (heç kəs inkar etməsin, «Gün Səhər» kollektivinin qəzet bağlanandan sonra qalan qonorarlarını almaq üçün nə əziyyətlər çəkdiyini şəxsən özüm yazmışam-S.T), «Media açarı»nın pul mükafatını 400 manat elan edib, sonra 255 manat verə də bilərlər... Amma biz bunu nəinki yaza, heç bu mövzularda cınqırımızı da çıxara bilmərik. Yazanda, deyəndə «məlum olar» ki, kiminsə oyununu oynayırıq, kimsə bizi öyrədir və sair və ilaxır. Bunlarsa aydan arı, sudan durudular, lap mələkdilər. Sadəcə, qanadlarını biz görmürük.
Yeri gəlib, bunu da deyim. O gün «Media açarı»nın smeta xərclərinə baxdım. Demək, adamlar yerin icarəsi və yemək xərclərinə 2500 manat ayırıblar. Qardaşım, nə vacib idi o yemək? Bu nə şöhrətpərəstlik? Hansı gününüzə yaraşırdı həmin ziyafət? 8 jurnalistin pulundan kəsib, ziyafət təşkil etməyin adı nə vaxtdan qonaqpərvərlik olub? Hamam suyu ilə dost tutursunuz özünüzə?
Və sonda qayıdaq Qənimət Zahid söhbətinə. Baş yazar həbs olunan gündən onun barəsində ən çox yazan biz olmuşuq, hətta rəhbərlik etdiyi qəzetlə bu sahədə yarışa da bilərik. Baş redaktorun həbsinin qurama olması, üzünə duranların gerçək cinayətkarlığı ilə bağlı araşdırmaları da özümüz çap etmişik. Qəzetimizin üçüncü səhifəsində isə həbs olunduqları gündən etibarən hər gün məhbus jurnalistlərin fotosu və «onlara azadlıq» şüarı yerləşdirilib. Hakimiyyət bizim sözümüzlə hərəkət edəndirsə, elə yazdığımız araşdırmaları nəzərə alıb onu azadlığa buraxsın da...
Arif Əliyevə həmişə böyük hörmətim olub, xüsusən də qıvraq zəkasına və söz oyununa görə. Yadımda qalan ən maraqlı zarafatı isə belədir ki, «kimsə məni aldatmaq istəyəndə mən sadəcə başımı aşağı salıram. Bununla da qarşımdakı adama seyrəlmiş saçlarımı göstərirəm ki, mən bu yolda saç tökmüşəm, məni aldatma». Həqiqətən də, Arif bəy, adam hərdən başını aşağı salsa yaxşıdır...

840 dəfə baxılıb