ƏGƏR OĞLUN NARKOMANDIRSA...

	25 may 2012


Onlayn ictimai-siyasi qəzet

Şahvələd ÇOBANOĞLU

ƏGƏR OĞLUN NARKOMANDIRSA...

Görün oğru məmurlar bir-birini nə ilə hədələyir? Övladlarının narkoman olmasını açıqlamaqla! Bu oğru dəstəsi başa düşmür ki, öz övladları da özlərinin qulluq etdiyi, yürütdüyü siyasətin qurbanı olur. Yaxud indiyəcən olmayıblarsa da gec-tez qurbana çevriləcəklər. Dəyənəyin həmişə iki başı var: biri bizim və bizim övladların başına dəyirsə, o biri öz başlarında çatlayır.

Baş nazirin müavini Əli Həsənovun yüksək vəzifəli məmurları övladlarının narkoman olduğunu açıqlayacağı ilə hədələməsi xəbəri günümüzün adi reallığından başqa bir şey deyil. Buyurun, bu da bizim taleyimiz - başını itirmiş toplum, onun oğru hökuməti, qanunsuz əməllər, insafsız sözlər və xalqın başına gündə bir corab hörmək...
Tutaq ki, açıqladınız. Nə dəyişəcək? Xalq arasında nüfuzdan düşən bu adamları vəzifədən atacaqlarmı? Xalqın rəyi nəyisə həll edirmi? Guya o vəzifə sahiblərinin xalq arasında düşəcək bir nüfuzumu var? Bəlkə xalq bilmir ki, bunlar kimdir və bunlardan olanlar kim ola bilərlər? Əgər xalq malını talayan bir məmurun oğlu narkoman deyilsə, o, digərindən nə ilə üstün ola bilər?
Ən dəhşətlisi odur ki, bu qədər çirkabın, ədalətsizliyin içində olan adamlar narkomanlıq damğasından qorxur. Bir narkoman öz cəmiyyəti üçün təhlükəli sayıla bilər, amma hər şeydən öncə, o, bir qurbandır. Bəli, bu adamlarda adi humanizm də çatışmır. Çünki adi faşizmin içinə yuvarlandıqlarını hiss etmirlər.
Mirzə Sakiti də məhz bu cür düşüncə ilə cibinə narkotik atıb şərləmişdilər ki, özlərini ağa çıxarsınlar, onları tənqid edənləri gözdən salsınlar. Soruşmaq ayıb olmasın: cənablar, siz nə ilə bir narkomandan yaxşısınız? Narkomaniyanın yayılmasını artıran başlıca səbəb məhz təmsil etdiyiniz, qulluq etdiyiniz hakimiyyətin ziyanlı siyasəti, ölkədəki qanunsuzluqlar, rüşvətxorluq deyilmi?!
Bütün bunları ona görə demirəm ki, narkomanlar, narkomanlıq açıqlanmamalıdır. Yox, əksinə, cəmiyyətdə hər kəs bilməlidir ki, bir narkomanı heç vaxt gizlətməzlər. Amma bunu onun özünü və ya ailəsini şantaj etmək, aşağılamaq, polisə verib tutdurmaq, varını-yoxunu soydurmaq üçün etməzlər. Onu bu bəladan qurtarmaq üçün açıqlayarlar. Yaxınlarına, həkimlərə. Hər kəs bilməlidir ki, əgər sənin və ya başqa birisinin oğlu narkomandırsa, ilk vəzifə onu bu yoldan qurtarmaq cəhdidir. Onu gizlətmək isə özü də daxil olmaqla heç kimə xeyir verməz. Vəzifə sahiblərinin isə gizli heç nəyi olmamalıdır.
Maraqlıdır ki, sadə, namuslu adamlar arasında narkomaniya ilə bağlı ziyanlı bir mentalitet var. Yaxınlarının narkotik istifadəçisi olmasını gizlətməyi hər şeydən üstün tuturlar. Amma bu, bir xəstəlikdir, yoluxmusansa, ondan qurtulmağın yolunu tapmalısan. Göz bəbəyi kimi sevdiyin insan da buna yoluxa bilər. Ya zəlzələdən, ya vəlvələdən. Normal cəmiyyət bunu isterika və komplekslərlə qəbul etməli deyil. Normal insan buna ağıllı reaksiya verməlidir. Onu gizlətmək vəzifə deyil, məqsəd ondan qurtulmaqdır. Boş yerdən yalançı və ziyanlı mentalitet düzəltmək lazım deyil.
Dövlətin vəzifəsi isə narkomaniyanı gəlir mənbəyinə çevirmək deyil. Narkoman adı gələndə hüquq-mühafizə orqanlarının ağzı sulanır. Axı yaxınları evlərini də olsa satıb gətirəcəklər ki, onun adını ağa çıxarsınlar, həbsdən qurtarsınlar.

***

Baş nazirin müavini Əli Həsənov bildirib ki, əfqan narkotiki Avropa ölkələrinə 113 lokal marşrutla ixrac olunur. Bunun 37-si isə Azərbaycandan keçir. Bəs görəsən, bir illik qanunsuz dövriyyəsi 320 milyard olan narkotik tranzitindən bizim gözünü pul tutmuş məmurlar nə qədər qazanır? Yəqin ki, ildə ən azı 1 milyard. Bunlara Əfqanıstandan da pul gəlir.

923 dəfə baxılıb