İSA QƏMBƏRİN PİS NÜMUNƏSİ NƏ OLARDI

	03 sentyabr 2010


Onlayn ictimai-siyasi qəzet

Şahvələd ÇOBANOĞLU

İSA QƏMBƏRİN PİS NÜMUNƏSİ NƏ OLARDI?

Dünən qəzetdə gözüm bir başlığa sataşdı - “İsa Qəmbər nümunəsi”. Dərhal ağlıma gəldi ki, bu yazı da son vaxtlar gündəmə atılan mövzuya aiddir. İsa Qəmbərin növbəti qurultaydan sonra Müsavat başqanlığından getməsi barədə. Axı İsa Qəmbər yaxşı bir nümunə göstərmək istəyir, yəni partiyanın mövcud nizamnaməsinə, demokratik prinsiplərə uyğun olaraq partiya rəhbərliyindən getməyə hazırlaşır.
Nizamnamə İsa Qəmbərə növbəti dəfə başqan seçilməyə imkan vermir. O da təsdiq edib ki, nizamnaməyə əməl olunacaq. Yaxşı nümunə isə ona görə deyirik ki, Azərbaycanda bunun biabırçı və olduqca ziyanlı bir nümunəsi var.
Amma qəzetdəki yazı bu mövzuda deyildi. İsa bəyin parlament sədri olduğu dövrlərin uğurları barədə idi. Buna baxmayaraq, mövzunu davam etdirmək qərarına gəldim. Onsuz da bu mövzunu zaman-zaman gündəmə gətirəcəklər. Digər tərəfdən, kifayət qədər ciddi bir məsələdən söhbət gedir.
Birincisi, məlum referendumdan sonra İsa Qəmbərin də sədrlikdə qalması üçün cəhdlər edib-etməyəcəyinə çox ciddi maraq var. Yaxud əksinə, onun başqanlıqdan getməsi hakimiyyətlə bağlı heç nəyi dəyişməsə də, ona bir mənəvi şillə olardı.
İkincisi, İsa Qəmbər Azərbaycan siyasətində öz yeri olan siyasətçidir, o, vaxtilə parlamentin sədri olub, 2003-cü il seçkilərində xalqın böyük əksəriyyətinin səsini alıb, çox təlatümlü və birmənalı qəbul edilməyən siyasi fəaliyyət yoluna rəğmən, siyasi səhnədə öz ciddi yerini bu günəcən saxlaya bilib. Onun siyasi partiya rəhbərliyindən, özü demişkən, sıravi üzvlüyə düşməsi adi hadisə deyil. Bəzi amilləri (məsələn, Müsavatın sonrakı taleyini) nəzərə alsaq, az qala siyasətdən getmək təhlükəsi kimi qiymətləndirilə bilər.
Nəhayət, Müsavat kimi iri partiyanın taleyi sual altına düşür. Açıq deməkdə heç bir eyib yoxdur, partiyada nüfuzlu və təcrübəli funksionerlər var, amma İsa Qəmbəri əvəz edəcək lider yoxdur. Üstünə partiyadaxili qruplaşmaların münasibətlərindəki gərginlikləri, hakimiyyətin bu partiyanı sıradan çıxarmaq üçün məqam gözləməsini gəlsək, vəziyyət əcaib bir sonluq vəd edir.
Necə deyərlər, İsa Qəmbərin yaxşı nümunəsi - nizamnamənin qoyduğu məhdudiyyətə uyğun olaraq başqanlıqdan getməsi Müsavatın başında çatlaya bilər. Bilmirəm, Müsavatın parçalanıb kiçilməsi, ölkədəki əvvəlki nüfuzunu və rolunu itirməsi, yekə-yekə danışan bəzi liderciklərin xırda partiyalarına oxşayan bir partiyaya çevrilməsi ölkə üçün yaxşımı haldır? Ən azı çox sayda müsavatçı üçün bu çox ağır itkidir, üstəlik avtoritar hakimiyyətin köhnələri dağıdıb yenilərini yaranmağa qoymadığı bir dövrdə Müsavat kimi bir ciddi partiyanın sıradan çıxmasında ölkə üçün yaxşı nəsə ola bilərmi? Bir daha altını cızıram - avtoritar hakimiyyətin köhnələri dağıdıb yenilərini yaranmağa qoymadığı bir dövrdə!
Elə düşünməyin ki, mən İsa Qəmbərin yaxşı nümunədən əl çəkib başqan qalmasını təklif edirəm. Baxmayaraq ki, ilin-günün bu vaxtlarında onun başqanlıqdan getməsi heç könlümə yatan iş də deyil. Hətta onu da demirəm ki, bu onun və partiya qurultayının seçimidir. Yox, mən, sadəcə, yaxşı nümunəyə pis nümunənin əlavə edilməsini istəmirəm. Yəni İsa bəyin başqanlıqdan getməsinin xeyli fəsadlar törətməsinin əleyhinəyəm.
Üçüncü yol var. Yaxşı nümunəyə yaxşı nümunə əlavə edilsin. Proses elə getsin ki, Müsavat səhnədə ən azı əvvəlki kimi qalsın, hətta əvvəlkindən də güclü bir təşkilata çevrilməsi mümkün olsun. Yaxud ümumilikdə bu proses fəsadlarından çox yaxşı nəticələr törətsin.
Bəs necə? İkinci yaxşı nümunə elə bu olardı. Bəlkə heç ağıla gəlməyən bir liderin kənardan da olsa partiyaya gətirilməsi mümkündür! Hətta xaricdən ola bilər. Yaxud partiyanın başqa partiya ilə birləşməsi və yaxud Xalq Cəbhəsi ideyasının (ya da bu kimi bir ideyanın) reallaşması. Bəlkə idarəçiliyin yeni formasının tapılması çıxış yolu ola bilər?!
Bütün bunlar İsa Qəmbərdən birbaşa asılı məsələdir. O, yaranacaq boşluğu doldurmaq yolunu tapmalı, yaxud yeri gəlsə, itkini faydaya çevirməyi bacarmalıdır. Şəxsən mən bunun mümkünlüyünə inanıram. Vaxt çatanda, sadəcə, çıxıb getmək yaxşı nümunəyə pis nümunə əlavə etmək olardı. Bu halda, bu addımı belə başa düşənlər də olacaq - “mən getdim ki, mənim qiymətimi biləsiniz”.
Müsavatçılar isə bu məsələyə tələsmədən, isterikasız, ambisiyasız, ağılla və fədakarlıqla baxmalıdırlar.

809 dəfə baxılıb