ŞEYX NƏSRULLAH GƏLƏNƏDƏK...

	03 sentyabr 2010


Onlayn ictimai-siyasi qəzet

Sevinc TELMANQIZI

ŞEYX NƏSRULLAH GƏLƏNƏDƏK...

Bir neçə gündür ekstrasens Zirəddin Rzayevlə mətbuat arasında gedən davanı diqqətlə izləyirəm. Demək, «Bakı xəbər» qəzetinin onunla bağlı məqaləsi, ekspertlərdən bu mövzuda öyrəndiyi rəy böyük bir qalmaqalın təməlini qoyub.
Qəzet yazıb ki, ekstrasens «son zəng» günü Bakıda terror həyata keçiriləcəyi, kütləvi insan tələfatı olacağı barədə proqnoz verib, nəticədə isə məzunların Milli Parka axışmasına mane olub. Hətta Zirəddin bəyin bu məsələ ilə bağlı polis orqanlarına əvvəlcədən xəbərdarlıq etdiyi də yazılanlar sırasındadır. Bir sözlə, ekstrasensi hökumətlə əlbir olmaqda suçlayıb. Sonuncu da eləmə tənbəllik, qəzeti məhkəməyə verəcəyi ilə hədələyir, onu «KİV haqqında» qanunun normalarına əməl etməməkdə ittiham edir və sair... Nəticə? Adamı heyrət bürüyür. Yəni bu qədərmi mövhumatın əsirinə çevrilmişik? Ekstrasens, falçı, astroloq proqnozları doğrudanmı həyatımızın mərkəzi nöqtəsinə çevrilib? Ciddi, köklü səbəblər qalıb bir tərəfdə, hər şeyin təməlində bir ekstrasens əli axtarırıq...
Tamam, biz ölkənin ən ciddi qəzetini əlimizə alan kimi öncə 16-cı səhifəsinə gözümüzü zilləyib, bürcümüzdə bizi gözləyənlərlə maraqlanan millətik. İşimiz dara düşəndə falçı qapısını döyməyi, türk qəhvəsi içən kimi stəkanımızı ağzı üstə qoyub, «nəysə halım, çıxsın falım» deməyi də bacarırıq. Bəzi yerli telekanalların axşamlar efirə çıxan astroloqlarına telefon açıb, «başımıza nə iş gələcəyini» də öyrənməklə ad çıxarmışıq. Amma bu qədər də yox axı...
Özünütənqid olmasın, amma 21-ci əsrin şıdırğı dövrlərində hələ də Məhəmmədhəsən əmi kimi sadəlövhük. Hələ də hamımız ovcumuz qaşınanda pul gələcəyini, qulağımız cingildəyəndə, yanağımız pörtəndə kiminsə haqqımızda danışdığını, gözümüz səyriyəndə qonaq gələcəyini yalan olmasın «Quran» ayəsi kimi qəbul edənlərdənik. Məsələn, onu da əzbər bilirik ki, uşaqlıqda kiminsə yuxarı damaqdakı iki dişi aralıdırsa, o, gələcəkdə varlı olacaq, tərs dönmüş ayaqqabı uğursuzluq gətirir, gecə ötən bayquş pis xəbərin, qabağımızdan keçən pişik isə böyük bir uğursuzluğun carçısıdır. Zarafatsız, bu qədər «strateji» məlumatı beyində saxlamaq hər igidin işi deyil.
Bu yaxınlarda həmkarlarımızdan biri pirlərdən reportaj hazırlamışdı. Orda oxumuşdum ki, bu dəqiqə pirə üz tutanların böyük əksəriyyəti abituriyentlərdir. Hətta onlardan biri avtobusdan düşüb, sürünə-sürünə pirə tərəf gedibmiş. Neyçün ki, əhdi varmış. Hələ mən itiyi olanlar, borca düşənlər, nə bilim mənzil davası olanları demirəm. İnsanlar real aləmdən, faktlardan aralı düşüb. İndi heç kəs bunların həlli üçün polisə, bələdiyyəyə, nə bilim əlaqədar strukturlara inanmır, bel bağlamır. Onlar artıq bir qayda olaraq, ümidlərini inanclarına bağlayıblar. Mən insanların seçiminə böyük sayğı ilə yanaşanlardanam. Kim necə xoşbəxtdirsə, elə də yaşamalıdır. Amma bu məqamda suçu onların üstünə atmağın tərəfdarı deyiləm. Ölkə artıq o vəziyyətə çatıb ki, millətin əli hər şeydən üzülüb. Falçı, ekstrasens qapısı pənah yeri olub.
Razılaşıram ki, bu tip şəxslər xaricdə də populyardır, hətta Amerika kimi ölkələrdə insanlar ekstrasens qapısında növbəyə düzülürlər. Amma vallah-billah, oralarda bu, bir əyləncədən uzağa getmir. Adamlar adrenalinlərini artırmaq üçün baş vururlar o qapılara. Nə bilim ruh çağırırlar, beş il sonra arıqlayıb-arıqlamayacaqları ilə filan maraqlanırlar. Amma bizdə maşallah yekə-yekə dövlət məmurları da falçı qapısını yağır ediblər. Bir dəfə yazmışam, fikrimi möhkəmləndirməkçün qoy bir dəfə də təkrarlayım: yaşadığımız kasıb binanın qabağı hər gün «zerkalnı» nömrəli, inomarka maşınlarla dolub-daşanda təəccübümü gizlədə bilmirdim. Bu kasıb-kusub hara, bu maşınlar hara? Qısa araşdırmadan sonra öyrəndim ki, bu məmurlar, varlılar qonşumuzdakı falçının müsafirləriymiş. Kimi kreslosunu itirmək təhlükəsi, kimi sənədləşmədə yol verdiyi qüsur, bir başqası isə kadrlarından konkret hansının ona xəyanət etdiyini öyrənmək marağı ilə üz tuturmuş qonşumuza. Hamısı da qara eynəklərini gözünə taxıb, heç kəsin onları görməməsinə çalışırdılar. Təsəvvür edin, camaatın taleyi onların əlindədir, onlarınkı isə falçının. Belə bir məmləkətdə ekstrasens Zirəddinin dediklərindən necə uzaqgedən nəticələr çıxarmayasan?
Bu gedişlə az sonra Şeyx Nəsrullahlara da inanmağa başlayacağıq, onların dirildəcəyi ölülərə də. O günlərdə görüşənədək!

766 dəfə baxılıb