ƏRDOĞAN VƏ “GEN” MMC

	30 iyul 2010


Onlayn ictimai-siyasi qəzet

Şahvələd ÇOBANOĞLU

ƏRDOĞAN VƏ “GEN” MMC

Türkiyədə Ərdoğanı yumruqlamağa görə ittiham edilən bir vətəndaş tutulub. Amma vətəndaş özü iddia edir ki, o, qətiyyən baş naziri yumruqlamaq istəməyib, əksinə, onu qucaqlayıb bağrına basmağa çalışıb. Sən demə, adam bir etirazçı yox, sadəcə bir yaltaq imiş.
Ürəkbulandıran əhvalatdır. Yumruqlamaq da yaxşı hərəkət sayılmaya bilər, xüsusən də başqa dinc və normal etiraz üsullarına imkan olduğu halda. Amma ölkəsini idarə edənlərə vətəndaşın istənilən etirazı onlara yaltaqlanmaqdan min dəfə yaxşı işdir. Dünən özüm televizorda seyr etdim. Ərdoğan coşqunluqla çıxış edirdi, müavinləri isə ağlayırdı. Noolub axı, məgər ürəyiniz bu qədər doludur? Onda siz də bu cür odlu-alovlu çıxış edib ürəyinizi boşaldın. Siz ki, hakim partiyanın ikinci-üçüncü adamlarısınız. Tribuna elə uzaqda deyil ki! Daha niyə rəhbərin çıxışlarına ağlayırsınız?!
İşin başqa tərəfinə baxın ki, bir yaltaq olması bəzən insanı xilas edir. Ona görə vətəndaş deyir ki, Ərdoğanı yumruqlamaq istəməyib, sadəcə qucaqlayacaqmış. Beləsinə deyirlər ki, utanmır, hələ danışır da!
Həbsdə olan, məhkəməsi gedən məşhur lGEN» MMC tikinti şirkətinin rəhbəri Elbrus Əliyev də siyahı açıqlayıb ki, bəs, onda günah yoxdur, ev satmaq istədiyi vətəndaşlardan yığdığı pulları ona-buna paylayıb. İcra başçılarından şoumen Murad Dadaşovacan, hamıya yaxşı məbləğlər verib. Axı, sənə kim demişdi ki, camaatın pulunu yığıb rüşvət kimi payla? Özünü də bədbəxt elə, başqalarını da. Tutaq ki, səni oğru Azərbaycan məhkəməsi yox, vicdan məhkəməsi mühakimə edir. Axı sən nə haqla Muradı, Çeliyi, icra başçılarını, deputatları qucaqlayır, kasıb-kusubun puluna isə yumruq atırsan?
Necə deyərlər, utanmırsan, hələ danışırsan da! Biz başa düşürük ki, sən bir qurbansan, bu ölkədəki oğurluq və rüşvət sisteminin qurbanısan. Onu da başa düşürük ki, rüşvətsiz ev tikmirlər. Bu ölkənin özü RÜŞVƏT MMC-dir. Amma başqaları rüşvəti də verir, pis-yaxşı evi də tikir, mənzilləri də paylayır. Bəs sən neyləmisən? Belə çıxır ki, yalnız rüşvət vermisən.
Həm də Elbrus Əliyev elə danışır ki, guya rüşvət verən tək budur və biz onun kimlərəsə rüşvət verməsindən təsirlənəcəyik, həyəcan hissi keçirəcəyik. Yaxud guya bunun məhkəməyə dəxli var. Halbuki məhkəmənin özü də rüşvət alır. Burada Murad Dadaşovun adı kimlərəsə yeni görünə bilər. Şəxsən mən təəccüblənmirəm. Murad Dadaşov bu hakimiyyətin qara qaşına aşiq olmayıb ki... Yaxud Murad Dadaşov Məhəmməd Füzuli, Nizami Gəncəvi-zad deyil ki... Vermisən, o da alıb. Üstəlik, səni reklam ediblər.
Sonda bunların zərərçəkənlərə nə dəxli var? Bəs camaatın pulu hanı? Görürsən ki, bu camaat Türkmənistanın bizdən almaq istədiyi neft yataqlarına görə narahat deyil. Nəyinə lazımdır bu onların?! Neftdən onlara nə? Neftə başqası sahib çıxıb. Camaatı yalnız öz əlinə gələn və əlindən çıxan pullar maraqlandırır ki, bu pulu da sən ona-buna yedirtmisən.
İctimai-siyasi həyatda da belə hallar olur. Biri özünün yaltaqlığına, satqınlığına əsas qazandırmaq üçün o cür bəhanələr tapır. Məsələn, deyirlər ki, filankəs belə etdi deyə mən də belə elədim. Yaxud iqtidara satılanlar bir qayda olaraq müxalifəti əlində bəhanə tuturlar. Belə çıxır ki, müxalifət pisdirsə, yaxud filan partiyanın sədri yaxşı deyilsə, bu, kiməsə əclaflıq etməyə haqq verir.
Hələ bundan da betəri var. Birdə baxırsan ki, biri öz hərəkətinə belə don geydirir: “Mən Azərbaycanın naminə belə etdim”. Məgər Azərbaycanın marağı səndən yaltaqlıq, yalan danışmaq, oğrulara xidmət etmək, oğru olmaq tələb edir?! Utanmırlar, hələ danışırlar da...

787 dəfə baxılıb