KASIBIN SEVİMLİ EŞŞƏYİ

	03 sentyabr 2010


Onlayn ictimai-siyasi qəzet

Sevinc TELMANQIZI

KASIBIN SEVİMLİ EŞŞƏYİ

Bəlkə yaşım çatmadığı üçün belə danışıram. Amma məncə, Bakı əhli tarix boyunca builki qədər ağır su sınağına çəkilmədi. İyun ayı təqvimə qədəm qoyan gündən paytaxtın rayonlarında növbə ilə suyu kəsdilər.
Gün gəldi ki, bəzi məhəllə və rayonlara su gecə 2-dən sonra, cəmi bir neçə saat verildi, bir neçə həftə günaşırı sistem tətbiq olundu. Bakının «xoşbəxtlər məhəlləsi» də yarandı bu aralar, «gözüqıpıqlar məhəlləsi» də. Birincilərdə daha çox «ağ adam»ların yaşadığından hökumət onların suyunu kəsməyə sadəcə, risk etmədi. Neyçün ki, sonuncuların bu hərəkət qarşısında Polad Alemdar sayağı bəzi məmurların «həyatını kəsə biləcəyi» ehtimalını gözdən qaçırmadılar. Gözüqıpıqlar isə elə adından da göründüyü kimi, gözü qıpıq vəziyyətə salınan kasıbların məskunlaşdığı məhəllələr idi.
Sadəcə, ssenari hər il eyni olduğu halda, «baş rejissor» bu ssenarini doğuran səbəbləri hər dəfə dəyişdirir. Məsələn, iki il əvvəl «Azərsu»nun «Azərenerji»yə borcu vardı deyə, sonuncu işıqları kəsmiş və əhaliyə su verilməsi dayandırılmışdı. Ötən il şəhərə çəkilən su borularında partlama olmuşdu, bu il isə məlum oldu ki, su xətləri yenilənir. Görürsüz, bircə səbəbə görə də «mıqq» eləmək olmur, hamısı «daşdan keçəndi». Uzaqbaşı dodaq altında mızıldanmaq olar ki, balam, bəs bu qədər göydələni tikəndə bilmirsiniz ki, bədbəxt boru buna davam gətirəcək, ya yox?
Mızıldanmaq demiş, mən bu susuz günlərdə bir dəfə də olsun şəhər sakinlərinin, cəhənnəm, ayrı-ayrı məhəllə sakinlərinin etiraz aksiyası keçirdiyini görmədim. Zarafat deyil ey, insanları həyat mənbəyindən məhrum edirlər. Halbuki özgə vaxt o məşhur sitatı gözümüzə soxurlar ki, bəs xəbəriniz olsun, su həyat mənbəyiymiş. Nəsə, deməyim o ki, cəmi bir-iki qonşu «JEK»-in qabağında çığır-bağır saldı və məsələ bitdi. Uzaqbaşı onlara da deyildi ki, qonşularınızın yarısı su borcunu ödəmədiyi üçün bütöv məhəllənin suyu kəsilib. Öz aramızdı, bu səbəb bizlər üçün o qədər strateji əhəmiyyət kəsb edir ki, səsimizi də çıxara bilmirik. Müsəlmançılıqdı, neyləyəsən, gedib hansı qonşunun üzünə durasan ki, niyə su pulunu vermirsən? Yəni, insanlar bir-birindən xəbərsiz, bir-birinə jest edə-edə yayın qovurucu günlərini başa vurmağa qərar verdilər. Hərdənbir də mənim kimi qonşu jurnalistləri gözüqıpıq elədilər ki, nə günün qəzetçisisən, öyrən gör, bu suyu niyə kəsiblər? Denən, su gəlməsə qəzetdə yazaram. (Amma inandığımız haqqı, bu sözü deyənlərin bircəciyi həmin qəzeti əlinə alıb oxumaz ki, görəsən, mən o yazını yazdım, ya yox. Halbuki elə yay girəndən ən çox bu sosial mövzuya müraciət edirik - S.T)
Yay boyu fikir verdim, camaatın başına itin oyununu açdılar. Bir dəfə yazmışam, müəyyən periodlarda müəyyən rayonlara suyu gecə saat 3-dən, «seçilmiş»lərə isə 12-dən sonra verdilər. Camaat üçün həyat bu saatlardan sonra başladı, ailə-uşaq bayquşsayağı gecə həyatı yaşamağa məhkum edildi. Soruş gör, bircəciyinin cınqırı çıxdımı? Uzaqbaşı dedilər ki, əşşi, buna da şükür, verməsələr, neyləyəcəkdik? Yəni, təsəvvür et, bu ölkədə sənin səsini də əlindən alırlar, təhsil, müalicə hüququnu da, normal yaşayış standartlarını da. Üstəlik, bundan sonra - üzüm ayağınızın altına - sənin saat neçədə, neçə dəqiqə çiməcəyini də həyasızcasına bunlar müəyyənləşdirirlər. Və sən yenə də deyirsən ki, buna da şükür... Artıq etiraz immunitetimiz tamam sıradan çıxıb, hər şeyə «bəçeşm» deməyə öyrədilmişik.
İndi gözümüz aydın, mənim və bəzi yaxınlarımın yaşadığı məhəllədə tam şadyanalıqdır. Məşhur məsəldəki kimi, artıq bizim küçədə də bayramdır. Suyla təmin olunma nisbətən normaya düşüb, qonşular həyatından məmnun vəE Nə qədər maraqlı olsa da, sonuncular hər gün şanlı hökumətə alqış yağdırmaqla məşğuldular. «Ay görüm bu hökuməti su kimi aydınlığa çıxsın» deyən tükəzban xalaların duaları göylərə ucalmaqdadır. Allah kasıbın sevimli eşşəyini itirtdirib, sonra özünə qaytarır məsəli bax burda yerinə düşür.
Biz belə, «kasıb» olmağa bir növ adətkarda olmuşuq. Neyləyək ki, başqa cür yaşamağı, sevinməyi bacarmırıq artıq...

814 dəfə baxılıb