MİLLİ SMS QALMAQALI | Yeni Müsavat

	30 iyul 2010


Onlayn ictimai-siyasi qəzet

Şahvələd ÇOBANOĞLU

MİLLİ SMS QALMAQALI

Yaxud Avropa yolunda qəza

Bizim hakimiyyətin Avropa dəyərlərinə yox, «Eurovision» kimi yarışmalara can atmasının xalqı aldatmaq yolu olduğunu yazanda irad tuturdular ki, hər şeyə çamur atmayın, bizə qələbə lazımdır. Bizə beləmi qələbələr lazımdır? İdman yarışları haqqında da bunu deyirlər: bizim qələbəyə ehtiyacımız var. Halbuki ölkə sərvətlərini talayan hakimiyyət idmanla, şou-bizneslə və bu kimi müxtəlif üsullarla ölkədəki real durumu pərdələməyə can atır. Bu, qədim üsuldur - bir az çörək, bir az da tamaşa!
Bunların hamısı siyasi tamaşalardır. İstismar tamaşaları və korrupsiya teatrlarıdır. Son günlər futbol klublarımızın bizi sevindirən kövrək uğurlarından da belə siyasi tamaşalar düzəltməyə can atdılar. Hakimiyyət tez fürsətdən istifadə edib futbolun inkişafından danışmağa başladı. Nə olsun? Ən böyük futbol ölkəsi Braziliya idealımız ola bilərmi? Dünyada ən böyük futbolçu Maradona deyilmi? Dopinq atdığına görə dünya çempionatından qovulmadımı? Bəlkə onun başındakı digər iyrənc qalmaqallar bizim gəncliyə və insanlığa yaraşır? Heç ondan danışan yoxdur ki, Azərbaycanın az qala yarısı futbol qumarı oynayır.
İdman quldarlıq dövründə də olub. Qullar arasında da yarışlar keçirilib. Ümumiyyətlə, idman, mədəniyyət və sənət azadlığa, ədalətə, humanizmə söykənmirsə, cızma-qaradan, tappa-turupdan, nayna-naydan, qovhaqovdan başqa bir şey deyil. Bir ölkədə azadlıq yoxdursa, mədəniyyət, sənət, idman nə üçündür? Qullar üçünmü, qulların mədəni olması üçünmü? Yoxsa ağalar üçün?
Buyurun, bu da sizə «Eurovision» yarışmasındakı qələbə. Ermənistandan olan mahnı qrupuna səs verənlər MTN-ə çağırılıb dindirilir. Bəs nə üçün iştirak edirdik bu yarışmada? Bunun nəyi yarışma oldu? Nəyi Avropa yarışması oldu? Yalançı avropaçılıq dərhal üzə çıxdı. Urafaşizm işə düşdü. Bunun başqa bir adı erməni xəstəliyidir. Elə ermənilər də belə düşünür.
MTN nə axtarır? Bu adamlar erməni agenti olsaydılar, kimə məxsusluğu asanlıqla aydınlaşacaq nömrələrdən səs verərdilərmi?! Bu da təhlükəsizlik şousudur - başqa heç nə. Üstəlik, mahnı səsverməsində açıq şəkildə ermənilərə səs vermək ölkəmizə hansı ziyanı verə bilər? Ziyan verə bilərsə, onda bu yarışmada niyə iştirak edib xalqa qələbə şousu göstərirsiniz? Hələ onu soruşmuruq ki, niyə dövlət səviyyəsində barışıq səfərləri təşkil edirsiniz? Bəs deyirsiniz ki, Qarabağ münaqişəsi sülh yolu ilə çözüləcək?! Erməni mahnısına səs verənlərin təqib olunduğu bir dövlətdə yaşamaq istəyəcəkmi Qarabağ erməniləri?
Bilirəm ki, kimsə hökmən deyəcək: bəs bu adamların milli qüruru hanı ki, ermənilərə səs veriblər? Bəlkə «Eurovision»da ermənilərə səs verənlər ölkəmizə ermənilərdə rəğbət qazandırmaq istəyənlərdir? Bu adamlardan biri deyib ki, ermənilərin mahnısı ona daha çox milli görünüb, nəinki Araşın mahnısı, məhz ona görə də ermənilərə səs verib. Nə deyəsən? Bəlkə ölkəsindəki haqsızlıqdan boğulub bu addımı atanlar da var. Onlar cəmi 43 nəfərdir. Ümumiyyətlə, bu haqda düşünməyə dəyməz. «Eurovision» deyilən yarışmanın mahiyyəti belədir. Yəni o, bir mahnı yarışmasından başqa heç nə deyil. Ötən il Türkiyə Ermənistana ən yüksək xal vermişdi. Bu adamların seçimini sevməyə bilərsiniz, amma onlar qanunla qadağan edilən bir əmələ yol verməyiblər. Sadəcə mənasız bir yarışmada SMS israfçılığına yol veriblər. Mənə qalsa, ümumiyyətlə o yarışmada Azərbaycana da SMS yollamaq israfçılıqdır.
Çağdaş dövrün azərbaycanlısı ölkəsini doğrudan da sevirsə, ona düzgün bir gələcək arzulayırsa, ilk öncə qanun və haqlara hörmət etməli, ilk öncə qanun və haqların qorunmasını istəməlidir. Milli vəzifə buradan başlayır. Sənə ən ziyanlı və ən acı görünən fikir və əməlin də qanuna zidd olmadığını biləndə duyğularını boğaraq onlara dözməlisən ki, arzuladığın müasir və mütərəqqi ölkəni görəsən. Milli duyğu bundan başlayır. Sənin sevmədiyin seçimi edən adamın da haqqının pozulmasına qarşı çıxmalısan ki, başqalarının da haqlarının, ümumiyyətlə, haqqın və ədalətin qorunduğu bir ölkədə yaşayasan. Yəni azad ölkədə yaşayasan. Milli qurur bundan başlayır. Və bilməlisən ki, yalnız belə bir ölkə güclü və rifahlı ola bilər, inkişaf edə bilər, həqiqi qələbəyə yetə bilər. Yalnız belə bir ölkədə xalq öz milli mahiyyətini də qoruya bilər, üstəlik, yeni bəşəri uğurlara da yetə bilər. Yalnız belə bir ölkə öz milli maraqlarını qoruya bilər. Başqa bir yol yoxdur.

738 dəfə baxılıb