KONDUKTOR HAQDA SUSANDA | Yeni Müsavat

	03 sentyabr 2010


Onlayn ictimai-siyasi qəzet

Şahvələd ÇOBANOĞLU

KONDUKTOR HAQDA SUSANDA

Söhbəti erməniyə nifrət müstəvisinə çəkmək bizdə qaydaya çevrilib. Dalınca da bol-bol vətənpərvərlik çağırışları. Amma biz insan haqlarından, qanun və hüquqların müqəddəslik kimi qorunmasından danışırıq. “Eurovision” yarışmasında erməniyə səs verən 43 nəfəri təqdir etmirik. Ümumiyyətlə, bu adamların hərəkətlərinə necə qiymət vermək hər kəsin öz işdir. Söhbət onların sorğulanmasının qanuna uyğun olub-olmadığından gedir.
Əvvəla, “ Eurovision” bir mahnı yarışmasıdır. Başqa heç nə. Həm də əhəmiyyətsiz bir yarışmadır. Oradakı uğuru ölkənin inkişafı kimi təqdim edən hakimiyyəti isə indi heç cür anlamaq olmur. Əgər dövlət kiminsə erməni musiqiçilərinə səs verməsini istəmirdisə, bu yarışmaya getməyəydi. Yaxşı iş deyilsə, qanun çıxarıb Ermənistana səs verməyi qadağan edəydilər. Ümumiyyətlə, bu nə deməkdir, həm “Eurovision”a qatılırsan, həm də ona səs verməyi qadağan edirsən? Bu ölkə hansı məntiqlə idarə edilir? Gah dostluq diplomatiyası başlayırsan, gah da düşmənçilikdən danışırsan?
Bəli, bu adamları təqdir etməkdən söhbət getmir, söhbət ondan gedir ki, dövlət onlara “Eurovision” yarışmasında erməniyə səs verməyi qadağan etməyibsə, bu adamlar həmin əməli ilə heç bir qanunu pozmayıbsa, deməli, onları sorğu-suala çəkmək özbaşınalıqdır. Bunu başa düşməyə nə var axı?!
Bu, məsələnin qanuni tərəfidir. Birdəfəlik anlamaq vaxtıdır, qanun və haqların qorunmasını hansısa hissə qurban vermək torpaqlarımızın 20 faizinin ermənilərinin işğalında, 80 faizinin milli varlıqların tapdağında saxlamasına yardım etmək deməkdir. Bu, dövləti gücdən salan, ölkəni talamağa imkan verən, dövlətin və xalqın güvənliyini təhlükəyə salan bir prosesə xeyir-dua verməkdir. Sən bununla insan haqqına qarşı çıxırsan, sən qanunun pozulmasına tərəfdar olursan. Bu isə sənin ölkəni hüquqlar ölkəsi olmağa qoymur, o, qadağalar ölkəsi kimi qalır, inkişaf etmir, talanır və məqsədlərinə çata bilmir. Qanunsuz sorğulanmaya haqq qazandırmaq dövlətə və onun məmurlarına özbaşınalıq, qanundankənar səlahiyyətlər tanımaqdır. Bu, bilirsinizmi nə ilə nəticələnir? Sabah səni də qanunsuz olaraq sorğuya çəkirlər. Ölkədə azmı adama haqsız olaraq erməni damğası vurublar? Azmı adama haqsız olaraq agent deyiblər? Azmı adamın haqqı pozulub və pozulur? Yeri gələndə müxalifətə səs verənləri də belə sorğulamırlarmı?
Əgər kimlərsə bu an fikirləşirsə ki, nə hüquq, nə qanun, erməniyə səs verəni boğmaq lazımdır, bunun ayrı cavabı var. Əzizlərim, hüquqlar ölkəsi 43, yaxud 430 nəfər vətənpərvər olmayan adamı toxunulmaz edə bilər, amma bu, eyni zamanda hər cür ziyankardan və ziyanlardan dövləti qoruyan, güclü və rifahlı bir ölkənin yaranmasının yeganə yoludur. Üstəlik, 9 milyona yaxın hüquqlu, güvənli, rifahlı vətənpərvəri ortaya çıxaracaq. Bədbəxt ölkəni ədalət və rifah ölkəsinə çevirəcək. Bizə hansı lazımdır?
Bəs vətənpərvər olmayan adam necə ortaya çıxır? Nə üçün kimsə Ermənistana səs verir? Kimsə yaxşı bir misal çəkdi. Konduktora acıq edib bileti cırmazlar. Bəli! Amma acıq edənlər də tapılır. Ona görə də konduktoru düşünün. Başını götürüb ölkədən gedənləri düşünün. Övladını əsgər yollayıb komandir təpiyindən sonra onun meyitini alanları fikirləşin. Qəlbi ədalətsizlikdən parçalananları fikirləşin. Növbəti pul tələbi zamanı ölən mağaza sahibini fikirləşin. Polis idarəsində basqı və təhqirdən qəlbi çatlayan Alimi düşünün. Hamı bileti cırmır. İstəməzdik belə olsun. Amma neçə adam haqsızlıqdan boğulanda açıq şəkildə qışqırıb ki, Ermənistandan siyasi sığınacaq alacaq. Təəssüflər olsun ki, bileti cıranlar da tapılır. Bəs biz nə edirik, bileti cıranı ittiham edib, onu buna təhrik edən konduktora təbəssümmü göstəririk?!
Söhbət konkret olaraq nə bu 43 nəfərdən, nə də ermənilərdən, yaxud “Eurovision”dan, ya da MTN-dən getmir. Söhbət qanundan gedir. “Eurovision” yarışmasında uğur qazanmaqdan yox, Avropa ölkəsi olmaqdan gedir. Azərbaycanın ötəri hisslərlə yaşamasından yox, köklü uğurlarından gedir.
Vətənpərvərlik prizmasından baxanda ümumiyyətlə gülməli vəziyyət yaranır. Əgər söhbət vətənpərvərlik hisslərinin pozulmasından gedirsə, onda həmin məntiqlə sevinmək də olar. Axı Azərbaycan nümayəndəsinə səs verən ermənilər daha çoxdur. Biz onlardan daha vətənpərvər çıxmışıq bu səsvermədən. Bəs həmin erməniləri alqışlamaq olarmı? Onları sevmək olarmı? Bəs onları Azərbaycan agenti, yaxud Ermənistan düşməni saymaq olarmı? Gəlin bu komik dramanı davam etdirib xain azərbaycanlılar və sevimli ermənilər axtarışına çıxmayaq.

1045 dəfə baxılıb