CADUGƏRİN CİBƏ ŞEY ATMASI

	30 iyul 2010


Onlayn ictimai-siyasi qəzet

Şahvələd ÇOBANOĞLU

CADUGƏRİN CİBƏ ŞEY ATMASI

Ölkəmizə xas hər cür problem və mənfiliklərdən yazmışıq. Amma əhali arasında cadugərliyin hansı dərəcədə yayılmasından şəxsən mən xəbərsiz idim. Azərbaycanın əyalətlərində cadugərlik 5-ci hakimiyyətə çevrilib. Qara hakimiyyətə. Onların niyə belə uğur qazanması, hansı üsullardan istifadə etməsi adamı xeyli düşündürür...

Dünən bir qrup həmkarımla Masallıdan qayıtdıq. Yazar dostumuz Rövşən Hacıbəylinin region mətbuatına dəstək layihəsi çərçivəsində bir gün Masallıda yerləşən “Cənub xəbərləri” qəzetinin redaksiyasında işlədik. “Cənub xəbərləri” Azərbaycanın regionlarında çıxan ən fəal qəzetdir. Müstəqildir, tənqidçi ruhunu, sağlam mövqeyini, peşəkarlığını saxlaya bilib. Heç kəsin, heç bir partiyanın marağına bağlı deyil, eyni zamanda çəkinmədən hər kəsi də tənqid edə bilir. Böyük çətinliklərə baxmayaraq, əyalətdə belə bir qəzetin mövcudluğu qeyri-adi haldır.
Biz bu qəzetin işinə kömək üçün dar vaxt çərçivəsində əlimizdən gələni etməyə çalışdıq, maraqlı təkliflərimiz də oldu, bundan sonra da qəzet üçün köməkdən qaçmayacağımızı düşünürük. Bilmirəm, bizim kömək cəhdlərimizin “Cənub xəbərləri” qəzetinə nə qədər faydası olacaq, amma o qəzetin təcrübəsi və onun əməkdaşları ilə birlikdə Masallı həyatını öyrənməyimi bizə çox kömək etdi.
Hər cür ictimai və sosial problemlərinə görə ölkəmizin cənub rayonları Azərbaycanın digər kənd rayonlarından ciddi fərqlənmir. Bəzi özəllikləri var, amma digər yerlərdə olan rüşvətxorluq, özbaşınalıq, ədalətsizlik burada da tüğyan edir və “Cənub xəbərləri” ustalıqla bu halları tənqid edir. Təbii ki, tənqidlər vəziyyəti köklü dəyişə bilmir, dəyişə də bilməz. Amma bu qəzet bölgəyə bir oksigen verir. Bu kiçik pəncərə bölgədə alternativ fikrə, tənqid mövqeyə, rayonlarının ab-havasına xeyli müsbət təsir edir. Söhbət həm də deputat Əhəd Abıyevin və onun qardaşlarını xüsusi toxunulmazlığı olan Masallıda onları çəkinmədən tənqid edən bir qəzetdən gedir...
Qəzetin mövzuları rəngarəngdir. Onun yazılarının bəziləri ölkənin aparıcı qəzetləri üçün baş yazıya çevrilə bilər. Arxivdən “16 yaşlı qız faciə ilə üz-üzə” yazısını oxudum. Bu yazıda dəhşətli bir hadisə araşdırılıb. Yazılara bir-bir qayıtmaq yersizdir, amma bir mövzu məni xüsusilə çəkdi və bu mövzu üzrə təsəvvürlərimiz genişləndirməyə çalışdım.
Bölgədə cadugərlərin, görücülərin, falçıların, bəxtə baxan, bəxt yazan mollaların sayı görünməmiş dərəcədə çoxdur. Onlar olduqca yaxşı qazanc sahibləridir. Məmurların xalqın başına açdığı oyun bir yana, onlar da bir yandan əhalinin bir qisminin qanını sovurur. Bəs onlar necə uğur qazanır? Müxtəlif yollar var. Sən demə, onların xüsusi texnologiyaları, köməkçiləri, “reklam menecerləri” olur. Məsələn, adam qabağında xüsusi “xəritə”yə baxır və deyir, gedin, filan yerdə filan ağacın dibini qazın, oradan bir bağlama çıxacaq və bağlamanı gətirin. Lazım gələndə adamın öz həyətində axtarış aparırlar. Hətta cibində. Polis adamın cibinə şey atdığı kimi onlar da adamın cibinə, bağına, otağına bir şey atır və sonra onu görücülüyün sübutu kimi ortaya çıxarırlar.
Komandada iş bölgüsü var və hərə işin bir detalını həyata keçirir. Xüsusi adam müştəri toplamaqla məşğuldur. Taleyin ümidinə buraxılmış, hər tərəfdən əngəllərlə üzləşən, min bir dərdin içində qovrulan, azadlığı boğulan, təhsili qısır məktəblərə həvalə edilən bir toplum isə cadugər texnologiyaları üçün əsl münbit tarladır.
Mənə dedilər ki, axı niyə bütün bunlara təəccüblənirəm, hətta vəzifəli adamlar orada cadugərlərə üz tutur. Doğrudan da Bakıda da belə deyilmi? Bakıda Zirəddin dövrü deyilmi? Ümumiyyətlə, “Cənub xəbərləri” qəzeti hər cür fanatizmə, o cümlədən dini fanatizmə qarşı Bakıda çıxan qəzetlərdən daha ardıcıl mübarizə sərgiləyir. Qəzetin baş redaktoru Zahir Əmənov deyir ki, sağlam dini təsəvvürlərin mövcudluğuna əngəl olan din xadimləri daim onların tənqid hədəfi olur. Ümumiyyətlə, belə bir peşəkar, savadlı və sağlam adamla tanışlıq bizə xüsusi zövq verdi.
Təbii ki, qəzetin başıbəlalı əməkdaşı Pərviz Əzimovun işləri ilə də maraqlandıq. Onu yazdığı tənqidi məqaləyə görə Lənkəran Dövlət Universitetindən qovulmasından xeyli keçib, amma tələbə-jurnalistin universitetə bərpası hələ baş tutmayıb. Haqsızlığın qurbanı olmuş Pərviz məhkəməyə müraciət edib. Məhkəmənin gedişi haqqında isə danışanda zarafatından qalmır: “Hacı Məmmədovun məhkəməsi kimi uzanır”. Düşündürücü zarafatdır.

1345 dəfə baxılıb