OKSFORDA, YOXSA BAKI MƏKTƏBİNƏ

	16 mart 2010


Onlayn ictimai-siyasi qəzet

Sevinc TELMANQIZI

OKSFORDA, YOXSA BAKI MƏKTƏBİNƏ?

Bu günlərdə Aysun adlı oxucu maraqlı məktub yazıb. İxtisasca müəllimə olan Aysun xanım sivil ölkələrdə olduğu kimi iş axtarmaq üçün Təhsil Nazirliyinin internet saytına baş vurmasından, oradakı vakant yerlərə müsabiqədə iştirak üçün ərizə doldurmasından yazıb. Oxucu xahiş edib ki, maraq üçün sayta girib ərizədəki suallara baxım: “Onda nə demək istədiyimi anlayacaqsınız”.

Maraq məni götürdü, sayta girib ərizə ilə tanış oldum. İnsafən, saytın özü də, oradakı ayrı-ayrı bölümlər də diqqətlə, lap deyərdim, beynəlxalq standartlara uyğun hazırlanıb. Hiss olunur ki, buna çoxlu pul xərclənib. Di gəl, “üstü bəzək, altı...” məsəlində olduğu kimi, orada yazılanları oxuyanda hirslənmədən keçə bilmirsən. Eləcə ərizədə oxucumun diqqətini çəkənləri sadalasam, qalanlarının nə gündə olduğunu özünüz təxmin edəcəksiniz.
Təsəvvür edin ki, siz Bakıda işsiz qalmış sıravi bir müəllim və ya pedaqoq diplomu almış gənc məzunsunuz. İşə düzəlmək üçün pulunuz, bədbəxtlikdən məktəb direktoru, lap ölüsü, “zavuçu” olan bir qohumunuz da yoxdur. Son gümanınız isə Təhsil Nazirliyinin elan etdiyi müsabiqədir. Müsabiqəyə qatılmaq üçün aşağıdakı keyfiyyətlərə sahib olmalısınız: 1. Son 5 ildə ixtisasartırma kurslarından keçməli; 2. Pilot və digər inkişafyönümlü layihələr çərçivəsində təşkil olunan treninqlərdə iştirak etməli; 3. Bilavasitə yeni təlim texnologiyalarının tətbiqi üzrə təşkil olunan təlim kurslarından (treninqlərdən) keçməli; 4. Təcrübə mübadiləsi məqsədilə digər ölkələrdə təşkil edilmiş müvafiq kursda (kurslarda) iştirak etməli; 5. Son 10 ildə Təhsil Nazirliyi tərəfindən təşkil olunan «İlin ən yaxşı müəllimi" müsabiqəsinin, “Pedaqoji mühazirələrin” yekun turunda mükafata layiq yer (yerlər) tutmalı; 6. Son 10 ildə ümumi təhsilin təkmilləşdirilməsi və yeniləşdirilməsi ilə bağlı məsələlərə həsr olunmuş elmi-təcrübi konfranslarda məruzələrlə çıxış etməli; 7. Son 5 ildə ümumi təhsil sahəsində aktual hesab edilən məsələlərə (fənnin tədrisi metodikasının təkmilləşdirilməsi, yeni təlim strategiyalarının tətbiqi, qabaqcıl iş təcrübəsi, proqram və dərsliklər, yeni fənn kurrikulumları haqqında rəy və təkliflər və s.) aid elmi-pedaqoji və pedaqoji mətbuatda çıxış etməli; 8. Son 10 ildə nazirlik tərəfindən təsdiq edilmiş dərsliyin (dərsliklərin) müəllifi olmalı; 9. Son 10 ildə nazirlik tərəfindən təsdiq edilmiş tədris vəsaitlərinin müəllifi olmalı; 10. Son 10 ildə nazirlik tərəfindən təsdiq edilmiş dərslik və dərs vəsaitlərinə rəy verməli, onların metodik cəhətdən işlənməsində iştirak etməli; 11. Əvvəlki illərdə «Baş müəllim», «Metodist müəllim» adına layiq görülməli, dövlət və hökumət mükafatları ilə təltif olunmalı; 12. İKT-dən istifadə etməyi bacarmalısınız.
Başqa? Adama deyərlər, turnikdən hoppanmaq, suyun altında 10 dəqiqə nəfəssiz qalmaq, salto vurmaq da lazımdır? Tələbləri oxuyanda gözün kəllənə çıxır. Sanki adamlar Oksford Universitetində dərs deməyə iddialıdır, buna görə də sadalanan keyfiyyətlərin hamısına sahib olmalıdır. Binəva məzun və ya işsiz müəllim bütün bu kriteriyalara sahibdirsə, Misir Mərdanovun rüşvətxorluq və ələbaxanlıq qoxuyan məktəblərində nə işi var? Gedər elə xaricdə dərs deyər də... Digər tərəfdən, guya hazırda Azərbaycan məktəbləri elə bu keyfiyyətlərə sahib müəllimlərlə dolub-daşırmış, xəbərimiz yox. Bütün müəllim(ə)lər bir ucdan kitab yazır, gecə-gündüz təhsili təkmilləşdirəcək ixtiralara imza atır, ilin qabaqcılı mükafatını qazanırmış və sair. Kimə gəlirsiniz ey?
O başqa söhbətin mövzusudur ki, mən cani-dildən məktəblərimizdə bu normalara cavab verən müəllimlərin dərs deməsini arzulayıram. Amma bunları kim yetişdirməlidir? Kənddəki nənəm? Axı Təhsil Nazirliyi belə məzunlar, kadrlar yetişdirəcək potensiala malik deyil. Nə tökərsən aşına, o da çıxar qaşığına söhbəti var ortada. Məktəb direktoru, rayon təhsil şöbələri və ondan yuxarılar dərs ili boyunca müəllimdən heç də ərizədə sadalananları tələb etmirlər. Onların menzurkasına görə “nümunəvi müəllim” obrazı tamam başqa cür olur: rəhbərliyin tələblərinə can-başla əməl edən, aybaay “taksa”nı masanın üstünə qoyan, yaxşı sinifləri, sərfəli dərs saatlarını əldə edə bilmək üçün nə etmək lazım gəldiyini bilən, sədaqətli YAP-çılar, seçki günü “müqəddəs” qutunu matros sayıqlığı ilə qoruyan, lazım gəlsə, məntəqələrdəki müxalifətçilərin başını yaranlardır əməkdar müəllimlər. Onda bu nə saxtakarlıqdır, qardaşım?
Mənə qalsa, bu ərizənin özü elə Aysun kimi sadəlövh oxuculara buranın Azərbaycan olduğunu anlatmaq üçündür. Yəni bu da bir məktəbdir. Misir müəllimin həyat məktəbi...

709 dəfə baxılıb