AKVARİUMDA BALIQ OVU | Yeni Müsavat

	30 iyul 2010


Onlayn ictimai-siyasi qəzet

Şahvələd ÇOBANOĞLU

AKVARİUMDA BALIQ OVU

Biz çox ağıllı xalqıq, qazı Türkiyəyə satmaqdan imtina edib erməniləri silahlandıran, Qarabağı işğal edib ermənilərə verən Rusiyaya satırıq; qardaşlığı, dostluğu, fədakarlığı isə Türkiyədən umuruq. Biz çox uzaqgörənik, Qarabağın qıfılı Rusiyada ola-ola, ora açar salmaq istəyən Türkiyəyə qarşı çıxırıq. Biz çox məharətli bir toplumuq, bilə-bilə ki, Qarabağı, Qarabağdan kənardakı torpaqlardakı durumun düzəlməsi xilas edəcək, amma bundan ustalıqla yayınırıq.

Biz dəhşətik, bilərək ki, erməni özü Rusiyanın işğalında olan bədbəxt və aciz durumdadır, amma ondan basılmaz düşmən obrazı düzəldirik və gecə-gündüz onunla “vuruşuruq”. Ermənini Rusiyanın “əsgəri və nökəri” statusundan çıxarmaq planlarını isə xəyanət adlandırırıq. Vuruş üçün azad, güclü, ədalətli bir ölkəni qurmaq əvəzinə, bu ölkənin yeganə sadiq müttəfiqi olan Türkiyəni gözdən salan, qəlblərdən silən oyunların küləyinə aldanırıq. Biz inanılmaz xalqıq, öz insanına qoyun kimi baxan bir hakimiyyətdən Qarabağ gözləyirik.

***

Mərkəzi Bankın sədri dünən jurnalistlərə deyib ki, o hələ şokdan ayılmayıb. Bankdakı məlum oğurluqdan sonra ölkənin baş bankiri özünə gələ bilmir. Şokda olmayanda bu adamın yanından nəğd pulla 7 milyard aparıblar. Gör indi şok vəziyyətində olarkən nələr baş verə bilər? Bank sədrini tez ayıltmaq lazımdır, yoxsa yenə ağlımıza gəlməyənlər başımıza gələr. Məsələn, eşidərik ki, gənc və cüllüt bir proqramçı qız 70 milyon pulu Mərkəzi Bankın hesabından köçürüb mənim hansısa bankın filialında olan hesabıma. Məgər bir neçə qadın 7 milyard nəğd pulu daşıyıb apara bilir, ağıl dəryası olan proqramçı qız bunu edə bilmir?!
Elman Rüstəmov az qalıb ki, hıçqırtı ilə ağlaya. Pullara görə yox. Onu kövrəldən başqa məsələdir: “Mən hələ də başa düşə bilmirəm ki, bu, onların nəyinə lazım idi? Həmin nənələrin, anaların müttəhimlər kürsüsündə oturması onlara, ailələrinin reputasiyasına yaraşırmı? Sakit təqaüdçü həyatına hazırlaşmaq əvəzinə, nəvələrini böyütmək əvəzinə onlar bu yolu seçiblər”.
Bu yerdə Kərəmi də ağlamaq tutur. Elman Rüstəmov elə düşünürmüş ki, pul sadə işçilərə lazım deyil. Bu ölkəni talayıb milyoner, milyarder olanlardan onların nəyi əskikdir? Hərə bir tərəfdən oğurlayır, onlar da bu yolu seçiblər.

***

Dəyərli həmkarımız Çingiz Sultansoy dəniz mövsümünü başa vurandan dərhal sonra yazmağa başlayıb. Dünən o da pul məsələsinə girişib. “Novoya vremya” qəzetində gedən yazıda müəllif bankda oğurlanan pullarla bağlı maraqlı mülahizələr söyləyir. Onun fikrinə görə, 7 milyard köhnə manat 50 minlik (“beşşirvanlıq”) əskinaslarla hesablansa, bu, 140 min kağız pul əskinası edir. Yəni 1400 bağlama pul. Müəllif yazır ki, iki il ərzində bu qədər pulun bankdan daşınması üçün (500 iş günündə) gərək hər gün bankdan 280 ədəd əskinas çıxarsan. Bu isə mümkün görünmür. Bunu qapıdakı yoxlamalar, aparatlar görmədimi? Təcrübəli jurnalist Çingiz Sultansoyun yazısından görünür ki, bu əməliyyat üç-dörd qadının işi deyil. Bunun altında çox şeylər var.
Ümumiyyətlə, nə deyəsən axı, bizim pulumuz çoxdur...

572 dəfə baxılıb