PALTAR NAZİRİ | Yeni Müsavat

	30 iyul 2010


Onlayn ictimai-siyasi qəzet

Şahvələd ÇOBANOĞLU

PALTAR NAZİRİ

Bu ay şanlı ölkəmizin ən böyük qayğısı paltarla bağlıdır. Hamı uşağına paltar axtarır ki, onları məktəbə yollasın. Paltar məsələsi mətbuatın da gündəmini tutub. Maraqlı mövzular var. Kim paltarı necə satdı, hansı rayonda paltardan kim qazanır, hansı icra başçısı öz fabrikinin paltarlarını satdırır və s. Hər yanda paltardan danışırlar. Hətta ictimai yerlərdə müzakirələr gedir ki, məktəblinin vahid formada geyinməsi doğrudur, ya yox. Elə bil, ölkə paltar tok-şousuna qatılıb.

Hələ təhsil naziri, 28 dərsliyin müəllifi, professor Misir Mərdanovu demirəm. Cənab nazir ağzını açıb yalnız paltardan danışır. Xüsusi göstərişlər verir, məsləhətlərini əsirgəmir. Hətta direktorlara barmağını silkələdi ki, onlar paltar işinə qarışmasınlar. Onsuz da bu direktorların başqa işi-gücü yoxdur, hətta təlim-təhsil işinə qarışmırlar, amma Misir müəllim qəti deyib, oturun yerinizdə, paltar işi azad seçimdir, hər kəs istədiyi paltarı seçə bilər. Bu sizə prezident seçkiləri, yaxud deputatxana səsverməsi deyil axı! Darıxmayın, tezliklə torpaqsatanlar seçkisi gəlir, sonra təzədən deputat siyahısı hazırlanacaq, orada sizə rol veriləcək. Paltar seçimi isə azad seçimdir. Heç kim xalqımızın bu seçiminə müdaxilə edə bilməz.
Misir müəllim icra başçısına da xəbərdarlıq edib. Bilmirəm, Yevlaxın balaca padşahı E.Vəliyev bu xəbərdarlığı saya salıbmı, yaxud çaya salıbmı, amma Misir müəllim bəyan edib ki, yox, icra başçısı paltar seçkilərinə müdaxilə edə bilməz. Zəhmət çəkib özünün fabrikində istehsal etdirdiyi paltarları məktəbdə oxumayan uşaqlara satdırsın, ya da Kürə töküb axıtsın. Mətbuatda yazılana görə, bu paltar haqq-hesabına görə Misir müəllim hərbi prokurorun qardaşına (sən demə, icra başçısı hərbi prokurorun qardaşıdır) hücum etməklə hərbi prokurorla toqquşmalı olub. Hərbi prokuror da indi öz növbəsini gözləyir, yəqin o da havadan və yerdən əks hücuma keçməli olacaq.
Ümumiyyətlə, paltar mövzusu cənab nazirin dilindən düşmür. 5 qiymətlərlə attestat alanların bu yay qəbul imtahanlarında iki alması kimi böyük biabırçılıqdan sonra məsələ təhsilimizin əsas qayğısına çevrilib. Belə çıxır ki, Məleykə Abbaszadənin imtahanlardan iki alanların sayını aləmə faş etməsindən sonra təhsilimizin baş bilənləri qərara gəliblər ki, bütün problemlərin kökündə paltar məsələsi durur. Ona görə də, təhsil naziri daha çox paltardan danışır.
Görün bu iş haralara gəlib çıxdı. İndi də müəllimlərin paltarları müzakirə edilir. Hörmətli nazir müəllimləri öz geyimlərinə fikir verməyə çağırıb. Onun sözlərinə görə, müəllimələrin çoxu qısa geyinir. Yəqin monitorinq aparıblar. Nazir deyib: “Müəllimlər öz geyiminə fikir verməli, əsl müəllim kimi, özünə hörmət gətirən formada geyinməlidirlər. Mən geyim formasının adını çəkmək istəmirəm. Amma elə şalvar geyinmək olar ki, başqa geyimlərdən daha yaxşı olsun. Ona görə də müəllim özünə və qarşısındakına hörmət etməlidir ki, ona da hörmət etsinlər. Cəmiyyət hansı geyim formasını xoşlayırsa, müəllimlər də onu geyinir. Amma insanların hamısını bir çərçivəyə salmaq mümkün deyil. İndi onlara təzədən forma geyindirmək... Müəllim də sərbəst insandır, amma gərək geyimlərinə fikir versinlər.”
Yəqin hər şey sizə aydındır, müəllimlər dərs keçməyə də bilər, amma abırlı geyinməlidirlər. Çünki nazir bu məsələdən narahatdır. Ümumiyyətlə, paltar məsələsi hörmətli nazirin sevimli mövzusudur. Bir dəfə o, televizorda müğənni Zülfiyyə Xanbabayevanı tərifləyirdi ki, başqa müğənnilərdən fərqli olaraq, Zülfiyyə xanım milli adət-ənənələrimizə görə geyinir.
“Lüt-üryan halına” salınmış başıbəlalı təhsilimizin özünü “geyindirmək” haqda danışmağa ehtiyac yoxdur. Amma Misir müəllim repetitorların geyimindən hökmən danışmalıdır. Bizdə olan məlumata görə, elə repetitorlar var ki, evinin zirzəmisi soyuq olduğundan qışda paltoda və qulaqlı papaqda dərs keçir. İsti olsa gör neynəyərlər...

765 dəfə baxılıb