ÇEMPİON KÖRPÜ | Yeni Müsavat

	30 iyul 2010


Onlayn ictimai-siyasi qəzet

Şahvələd ÇOBANOĞLU

ÇEMPİON KÖRPÜ

(Uzun körpüyə sevinənlər barədə)

Qəzetlər yazır ki, yeni açılan «Xalqlar dostluğu» körpüsü MDB məkanının ən uzun körpüsüdür. Yəni bu körpü (uzunluğu 2116 m.) MDB çempionudur. Hakimiyyət mətbuatı artıq onu Azərbaycandakı analoqu olmayan inkişafın göstəricisi kimi, həm də xüsusi sevinclə təbliğ edir. Sanki böyük bir rekorda imza atmışıq. Yəqin ki, bundan sonra İlham Əliyevin çempion körpünün açılışında kəsdiyi qırımızı lenti təkrar-təkrar bizə göstərəcəklər ki, biz də doyunca sevinək...

Belə çıxır ki, Azərbaycan hakimiyyəti əvvəlcə paytaxtı yarıtmaz tikinti siyasəti ilə keçilməz hala salır, sonra isə bu problemi həll etmək adı ilə körpülər tikib öyünür. Gəlin onu da unutmayaq ki, körpü pulla tikilir. Uzun körpü isə daha çox pulla tikilir. Həm də bizdə körpülərə o qədər çox pul ayrılır ki, bir dəfə Pənah Hüseyn deputatxanada maraqlı bir sual səsləndirməyə məcbur olmuşdu: «Bu körpülərin armaturları qızıldan deyil ki?!» Çünki körpülərin şübhəli dərəcədə nəhəng büdcələrinin şişirdilməsinə inanmayan adam tapmazsınız. Bəs onda nəyə sevinirik? Çoxlu pulu bir körpüyə xərcləməyimizəmi?
Əvvəla, körpünün uzun tikilməsi qoçaqlıq-zad deyil. İkincisi, bu körpü xüsusi bir quruluşa, konstruksiyaya, estetikaya da malik deyil ki, onu ya novatorluq, ya da arxitektura əsəri kimi qəbul edib şənlənək. Üstəlik, bu körpü materikləri, körfəzləri, vadiləri, keçilməz çay sahillərini birləşdirmir, yəni xüsusi və əlahiddə bir keçidi reallaşdırmır. Bir prospekti digər iki küçə ilə birləşdirir. Heç şəhərin iki müxtəlif hissəsini də xüsusi qısaltma ilə birləşdirmir. Daha bunun nəyinə sevinirsiniz ki?
Kimsə yenə deyə bilər ki, bu körpü zəruri idi. Bəs nə üçün zəruri idi? Axı bu uzun körpü paytaxtın keçilməz şəhərə çevrilməsinə yol açan bir siyasətin nəticəsində ortaya çıxan problemin həlli üçün zəruri deyilmi? Onda belə çıxır ki, əvvəlcə körpü tikməyə zərurət yaradıblar, sonra da körpüləri tikməyə başlayıblar. Necə deyərlər, problemi yaradıblar ki, onu həll etsinlər. Dərd yaradıblar ki, dərmanını tapsınlar...
İndiyəcən «körpü yolun bir hissəsi idi», indən belə Bakıda yol körpünün bir hissəsi olacaq. Nə zarafatdır, artıq dünyanın ən uzun körpülərini bu şəhərdə tikirlər. Biz isə bu biabırçılığa sevinirik. Əslində, hesabat istəyən lazımdır ki, nə üçün bu qədər yeni körpü tikməyə zərurət yarandı. Elə etmək olmazdımı ki, şəhər bunlarsız da keçinəydi, yaxud bu qədər körpüyə və hətta ən uzun körpüyə ehtiyac olmasın. Körpü pulun bir hissəsidir deyə, şəhər körpülərə qərq edilməli deyil ki?!
Bakı belə deyildi ki?! Tikinti biznesindən gələn pullar görən gözləri elə bağladı ki, şəhər anormal bir hala düşdü. Onu körpülər belə xilas etməyəcək. Halbuki şəhərin xilası üçün xərclənən pullara Yeni Bakının infrastrukturunu qurub onu əsas Bakı ilə iri yollarla, sürətli ictimai nəqliyyatla birləşdirmək olardı. Yaxşı planı olan yeni şəhəri isə tikinti biznesi özü tikib-quracaqdı...

Kağız üzərində körpü

Körpü büdcələri ilə bağlı müzakirələr səngisə də, yenə də aktualdır. Büdcə şəffaflığına aid layihələrə böyük pullar xərcləyən QHT-lərə təklif edirəm ki, kağız üzərində bir körpü tiksinlər. Yəni virtual körpü. Görək bu körpülər neçəyə başa gəlməlidir. Azacıq gerçək fərqlər ola bilər, amma bir körpünün xərclərini ortaya çıxarmaq çətin iş də deyil. Nəticədə armaturların qızıldan olub-olmadığına aydınlıq gətirmək olar. Çünki bu hakimiyyət indi də dünyanın ən uzun körpülərini tikməyə başlayacaq...

464 dəfə baxılıb